السلام عليكم ورحمة الله وبركاته

تقريبآ انقبلت نهائي في سجون النساء بالشرقية (سجانة) ..

الامر اللي يحيرني في نآس👂 تحطم وتشغل بالك بدال ماتتتفائل وتعطيك امل بالحياه 👏👍 !!!!

يقولون الشغل بالسجن👎 متعب وشاق ومقرف ومشاكل ومامنه راحه لدرجة الرجال يفصلون منها 😒

.. علما عمري بالعشرينيات 😳ومريت بتجارب قاسية وملمه بالحياه لكن لهدرجة وصفهم لسجون داخل 😦.. ابي تجاربكم يااخواني واخواتي اذا في وحدة قد اشتغلت او تعرف وحدة تبلغني وانتم اخواني انصحوني وتجاربكم وراح ادعي بالوتر لكل من ريح بالي وبالي مشغول الله يريحكم دنيا واخره ويوسع لكم ويرزقكم. ♥♥♥♥♥ 🌹🌹

وعليكم السلام
اعرف واحد شغال عريف بالسجون يقول بوقت دوام عادي زي أي عسكري بس احتكاك بسيط مع المسجونين و لازم يكون تعامل بين العسكري و المسجون رسمي معهم لان الطيبة مع المسجونين يخلوهم يتمردون
ودايم يقولي تجيهم اوامر ان لا يتعاطفون مع المسجون لانه يلعب بنفسيتك و ممكن تستغل فانتبهي ترا انتي بسجن نساء اغلبهم داخلين لمشاكل اخلاقية يعني احذري منهم مهما كان برائتهم امامك

الله يوفقك اختي ويرزقك من حيث لاتحتسبين عليك بالاستخاره

السلام عليكم ورحمه الله وبركاته
اختي الله يوفقك ويكتب لك الخير فيه
اقسم بالله العظيم انني انا حاليا بسجن النساء اعمل واقول لك بالتفصيل الممل عن العمل وطبيعته والراي الاول والاخير لك
طبعا العمل بالنسبه للنساء نظام استلامات البعض منهن والبعض الاخر دوام رسمي من 8 صباحا الى 2:30 ظهرا
واذا لزم الامر وصار نقص بالنسبه للسجانات يبلغون اللي تداوم دوام رسمي مثلا يقولون لها وحده طالعه اجازه انتي مكانها شهر لين ما تحضر

نجي لطبيعه عمل اللي يستلمن
تستلم من 8 صباحا الى 8 مساء وتتسهل لأهلها 48 ساعه
وتجي تستلم 8 بالليل الى 8 صباحا وتتسهل لاهلها 48 ساعه

ومرات يصير ضغط عمل بدال ماتسلمين 48 ساعه 👇 كذا يصير اذا صار ضغط عمل
تستلمين 8 صباحا وتسلمين 8 مساء وتتسهلين 24 ساعه 👉
وتجي ثاني يوم بالليل يعني كم طلعتي يوم بس وترجعين تستلمين بالليل واذا طلعتي الصبح 48 ساعه
يعني تسلمين بالليل يوم واذا سلمتي الصباح يومين

بالنسبه للعمل ومخاطره ما فيه شي يستاهل اني اذكره اساسا كل شي منظم مثلا صرف الاعاشه الوجبات للسجينات معروف والسجينات اغلبهن تبي السلامه اللي تبي تحفظ قران عشان تنقص محكوميتها وما انتي بلحالك بالغالب معك سجانه بس انا مو بالشرقيه بمنطقه غير الشرقيه عندنا تناوب سجانه وحده وبينك وبين السجينات باب حديد واذا جيتي موظفه جديده مايخلونك تستلمين لحالك يعني راح تكون معك وحده خبره وتعلمك بكل شي لمده اسبوع اقل شي ومعك منوابين رجال امن في حاله اي طارئ عليك ضغط زر وتلفون عندك للمناوبين وفيه مناوبه على التلفون بشكل يومي اذا حصل تحويل للمستشفئ او حاله حرجه تجي وتطلع مع السجينه وفيه دكتور خاص بالسجن يناوب على الجوال
واي شخص يجي لعمل لا بد يكون متخوف لكن بالدوام معك مايقارب 10 موظفات على الاقل واتوقع بالشرقيه تستلمن كذا سجانه اخر الليل مستحيل سجانه وحده

عموما توظفي اشوف انها ولا شي بس 👌 العمل ونظامه شوفيه اذا يناسبك وغيره ما اشوف فيه اشكال والامر الاول والاخير لك

واي استفسار بالخدمه
دعواتك لي بالذريه
اسئل الله لكل عاطل الرزق الحلال والوظيفه اللي تسره وتعينه على التقوى

الله يجزاك بالخير ويوفقك
الدوره الي قبل الوظيفه اذا فيه لمصلحتك يعني انظمه السجون والممنوعات اللي ماتدخل يعلمونك عليها
مثلا جتك سجينه تفتشينها واذا ضبطتي معها ممنوعات تحطينها بضرف وتسلمينها المناوبين حاجات تافهه عموما راح تتذكرين كلامي الوحده يالله تحصل وظيفه بالوقت ذا مايمر عليك 3 شهور إلا وانتي فاهمه كل شي وش فرقك عن اللي خدمتها سنتين واللي خدمتها 5 سنوات واللي خدمتها 20 سنه
بس شوفي الزميله الطيبه والكويسه بالعمل وهي تعلمك على كل شي ومع السجينات بحدود الانظمه والتعليمات اللي عندك والله ولا وحده تجسر عليك واي وحده قلت ادبها معك عندك مديره مباشره ومدير تكتبين فيها سوا هددتك او سبتك راح يتخذون فيها إجراء بحسب انظمه السجون والله يسهل لك امورك وعموما لو ما ارتحتي فيها ترا الوضع جدا سهل

معروض استقاله بس اهم شي لا تروح عليك
الله يوفقك