ابشري , جاري كتابة المشاركة

بدايةً .. نزل إعلان التوظيف في موقع الخارجية و عبّيت طلب التوظيف و بعدها بكذا شهر أرسلوا رسالة ع الجوال على أساس نحضر في جامعة الإمام محمد بن سعود في قاعة الأمير سلمان للمؤتمرات .. حضرت و كان فيه عدد كبير جدّا لكن ما فقدت الأمل و قلت إذا لي في نصيب فيها الله بيكتبها لي .
كانت خمسة إختبارات موزعة على يومين .. إختبار في تخصّصك الجامعي و إختبار في اللغة الإنجليزية و كان متوسّط المستوى و إختبار عن الأخبار السياسية الجارية في العالم في الوقت اللي اختبرنا فيه و إختبار معلومات لغوية وكميّة و آخر إختبار كان عبارة عن سؤال واحد فقط و كان عن إنه في إحصائية أخيرة تبيّن أن عدد المستثمرين السعوديين في دبي كان أكبر عدد بعد الجنسية الإماراتية .. فيه ناس أيّدوا هالوضع و فيه ناس عارضوا .. السؤال يطلب إنه نفسّر وجهة نظر كل طرف و إنت مع مين فيهم و ليه .. توقيت كل إختبار كان كافي و مناسب .

بعدها قالوا خلاص روحوا و راح نبلغكم بمسجات , فعلاً بعدها بكذا شهر ( تأخروا علينا ) طلعت النتائج في الموقع و الصحف و أرسلوا لنا مسجات ع جوالاتنا .. كان عدد المختارين 101 و كنت بفضل الله من ضمنهم ..بعدها بأربعة أشهر تقريبًا جاء وقت المقابلة في الوزارة و تحديدًا كانت في رمضان .. المقابلة فيها خمسة أشخاص ( العدد هذا يختلف من يوم إلى الثاني ) في المقابلة لا تحاولي تفتحي مواضيع لأنهم يسألونك عن أي شيء تقوليه و يطلبون منك تتوسّعي فيه ( يعني بالعربي لا تتفلسفي جاوبي ع قد السؤال ) و الجو العام للمقابلة فيه أريحيّة كبيرة فـ ما بتتوتّري ..

في ذي القعدة أعلنوا النتائج النهائية للمقابلات و اختاروا 48 شخص و بفضل الله للمرة الثانية كنت من ضمنهم و اتصلوا علينا و طلبوا نتواجد في الرياض في معهد الدراسات الدبلوماسية لبدء الدورة التأهيلية اللي كانت مدتها أربعة أشهر ..

في المعهد الدبلوماسي : كانت الدراسة مقسّمة إلى جزئين .. الجزء الأول شهرين و كان عبارة عن إعداد عام أخذنا فيه مواد مختلفة مثل القانون الدولي و أنظمة المراسم و إعداد التقارير الدبلوماسية و تحليل التقارير الدبلوماسية و بعض من المواد اللي تتعلق بالعمل بالسلك الدبلوماسي .

الجزء الثاني : كان عبارة عن دراسة اللغة , اللي إنجليزيته متوسطة يدرس إنجليزي و اللي إنجليزيته عالية يدرس فرنسي و اللي إنجليزيته و فرنسيته عالية يدرس إسباني .. طبعًا كان قبلها إختبار تحديد مستوى على أساس يوزعوا كل واحد في قسم .

مرحلة الدراسة في الخارج : أرسلوا شباب الإنجليزي لبريطانيا و شباب الفرنسي لفرنسا و شباب الإسباني لإسبانيا .. كنت من ضمن اللي راحوا لبريطانيا و تحديدًا في مدينة أكسفورد , مدينة معروفة إنها مدينة تعليمية بحت , كان مستوى الدراسة في المعهد اللي أرسلوني له جدًا عالي و من أفضل معاهد بريطانيا على مستوى اللغة ( معهد King's Oxford ) كانت الفترة ستة أشهر انتهت في 2 رمضان , رجعنا بعدها كل واحد عند أهله , و في تاريخ 18 رمضان كان فيه إختبارتحديد مستوى يقيسوا فيه مدى تقدم اللغة عندنا بعد العودة , الإختبار كان متدرّج الصعوبة ( مافي نجاح و رسوب فقط تقييم ) بعدها رجعنا لأهالينا مرة ثانية و قبل 4 أيام طلبوا مننا نجي للوزارة علشان الفحص الطبي و البصمات و المباشرة المتوقعة الاسبوع القادم .

أي استفسارات أنا تحت أمر الجميع .

أخوي, سعودي ثقة,

يعطيك العافيه على مشاركتك, جداً مفيده واحنا نحتاج اننا نقرأ مثل هذي التجارب بتفاصيلها
بس لو تكرمت, عندك أي فكره عن اذا كانت الدورة التأهيلية المنظمة لنا (النساء) هي نفسها اللي قدمت لكم واذا ايه, هل اللغة راح تُدرس برا زي مادرستوها انتم؟

شكراً جزيلاً لك أخوي

اقتباس:

المشاركة الأصلية كتبت بواسطة سعودي ثقة مرحلة الدراسة في الخارج : أرسلوا شباب الإنجليزي لبريطانيا و شباب الفرنسي لفرنسا و شباب الإسباني لإسبانيا .. كنت من ضمن اللي راحوا لبريطانيا و تحديدًا في مدينة أكسفورد , مدينة معروفة إنها مدينة تعليمية بحت , كان مستوى الدراسة في المعهد اللي أرسلوني له جدًا عالي و من أفضل معاهد بريطانيا على مستوى اللغة ( معهد King's Oxford ) كانت الفترة ستة أشهر انتهت في 2 رمضان , رجعنا بعدها كل واحد عند أهله , و في تاريخ 18 رمضان كان فيه إختبارتحديد مستوى يقيسوا فيه مدى تقدم اللغة عندنا بعد العودة , الإختبار كان متدرّج الصعوبة ( مافي نجاح و رسوب فقط تقييم ) بعدها رجعنا لأهالينا مرة ثانية و قبل 4 أيام طلبوا مننا نجي للوزارة علشان الفحص الطبي و البصمات و المباشرة المتوقعة الاسبوع القادم . أي استفسارات أنا تحت أمر الجميع .

الله يعافيك أختي ، بالنسبة للدورة للأخوات هي نفسها ، و بالنسبة للدراسة بالخارج بتبقى مثل ماهي و يمكن تُقدّم أسبوع ع أساس الكورس ينتهي قبل بداية رمضان لأن الصيام برا مُتعب ( بريطانيا 19 ساعة صيام ) ، أتمنى أكون أفدتك

اقتباس:

المشاركة الأصلية كتبت بواسطة اسم عربي معاصر أخوي, سعودي ثقة, يعطيك العافيه على مشاركتك, جداً مفيده واحنا نحتاج اننا نقرأ مثل هذي التجارب بتفاصيلها بس لو تكرمت, عندك أي فكره عن اذا كانت الدورة التأهيلية المنظمة لنا (النساء) هي نفسها اللي قدمت لكم واذا ايه, هل اللغة راح تُدرس برا زي مادرستوها انتم؟ شكراً جزيلاً لك أخوي

أخوي شكرا جزيلا على ردك
بس البعثات السابقة تقصد نفس المسابقة الوظيفية هذي؟ اتمنى هالشي يكون ضمن برنامجهم للمسابقة هذي لان الفايدة راح تكون اكبر اذا درسنا اللغه في البلد اللي يمارسها

اقتباس:

المشاركة الأصلية كتبت بواسطة سعودي ثقة و يوفقكم إن شاء الله بالنسبة للبعثات السابقة للأخوات كانت في الخارج , و بالنسبة للإلتزامات المادية يدفعون لك تبع المعهد و العائلة و مصروف يصرف لك قبل السفر عبارة عن 36 ألف ريال .

والله معلومة جديدة بصراحة
لأن المقبولات في وظيفة ملحق السابقة ماتكلموا عن بعثة خارجية خلال الدورة التأهيلية،

كل اللي قالوه انو الدورة كاملة تكون في جامعة الفيصل فقط.