السلام عليكم

بذكر لكم تجربتي الوظيفية في شركة معذبتني
انا كنت موظف في معهد براتب 6000 ريال بعد الخصم
بس المعهد الادارة مشاكله كثير والرواتب تتأخر والدوام فترتين
ففكرت ادور وظيفة غيرها
والحمدلله لقيت وظيفة بشركة مسؤول موارد بشرية لما سويت المقابلة وتم قبولي عطوني العرض الوظيفي وكان فرق كبير بالمبلغ
كان العرض ان الراتب يكون 4655 ريال بعد الخصم
الشركة كانت جديدة وتوها مبتدئة المهم قالي ان راتبك بعد فترة التجربة بيزيد الى 6000 ريال
ووافقت
المهم مرت الشهرين الاولى والامور ماشية تمام فجأة بدأت الشركة تستغني عن الموظفين اللي رواتبهم عالية جداً (اتكلم عن اللي رواتبهم من 8 الاف وتوصل الى 35 الف ووجودهم وعدهم واحد)
مشت موظفين كثيرين جداً منهم مديري مدير الموارد البشرية
المهم مابقي الا انا وصاحبي في الموارد البشرية بعد ماكان معنا باكستاني والمدير
طبعاً انا وصاحبي ننتظر دورنا وجلسنا على هالموال كل اسبوع موظف يمشي

المهم جاني المدير العام وقال انتم الاثنين بالموارد البشرية ماينفع والشغل مو كثير واحد يقدر يمشي الامور والثاني ننقله للمحاسبة (امين خزنة) ولما سألتهم من تبون رشحوك انت لانك ملتزم بالدوام ومن كلامه فهمت لو رفضت واحد منا بيمشي وبيجيب امين خزنة من برا
(يعني علشاني انا ملتزم بالدوام ومااغيب واخلص الشغل بأكمل وجه ينزلني من منصبي الى منصب اقل !)

المهم وافقت وودوني امين خزنة وبصراحه ماحبيتها فلوس وفواتير وقلق وانا والله مالي في المالية انا خبرتي موارد بشرية
المهم خلصت ال4 شهور ولا احد تكلم برفع الرواتب رحت وتكلمت مع المدير كان رده ان وظيفتي اللي انا فيها الحين هذا راتبها قلت له طيب انا كنت موارد بشرية وانت وديتني هنا
قال خلاص اصبر 3 شهور كمان لين تشتغل الشركة وابشر ، انا ماتطمنت بصراحه وعندهم قطع الارزاق شي عادي جداً
وللعلم للحين مو راضين يوقعون عقودنا والى الحين جالسين يمشون ناس

وجتني وظيفة حالياً بشركة ثانيه بس الراتب اقل ورفضتها في البداية لاني عزوبي وساكن لوحدي بالرياض وعلي ايجار ومصاريف وقالو انهم بيزودونه وبكرة بيكلموني عن الراتب بعد التعديل

وش رايكم بهاللي صاير معاي بصراحة وعود الشركات كلام فاضي لاتاخذ منهم ولا وعد ولاكلمة لانهم بس يبون يضمونك لهم وبعدها يسحبون عليك
وانا والله افكر اتركها مع ان البيئة كويسة والموظفين علاقتي فيهم ولا احلى بس عاد مافي ثقة اني اكون معهم الخوف منهم يستغنون عنا بأي لحظة وهالشي عندهم عادي جداً

،

عليكم السلام ورحمة الله

والله ياخوي ما شاء الله شكل سيرتك الذاتيه مميزه ..
وهذا يستدعي أنك تسعى للأفضل حتى لو خسرت دخلك فتره من الزمن ..
وحتى لو كان تعطلك مغامره بالوقت الحالي ..بيكون نجاح بالمستقبل ..
أنا مثل حالتك ولكن برواتب 2000 و3000 ..
كملت مبلغ يصرفني ع الأقل شهر ونص ..
بحيث لو فشلت بالعمل الجديد ابحث عن غيره وانا معي مصروف ..
والحمدلله نجحت ومشت أموري والآن بأكمل سنه بالعمل الجديد ..
ومن أفضل إلى أفضل ..

المغامره مطلوبه ..لو كانت مادياتك وسط ..
إعمل جدول إدخار بحيث بعد فتره زمنيه معينه لو شهرين تتركهم وتبحث عن غيره ..
بعض الفرص بين أيدينا غاليه
وبسبب هالشي نخاف نهدرها ولكنها بالواقع حرمتنا من فرص أغلى وأفضل ..


الله يوفقك و أستخير قبل كل شي ..

الله يكون بعونك
كثر من الاستغفار
ورزقك مكتوب فوق مع رب السماء
لا تياس من روح الله

اخوي / تقدر حتى واذا الادارة سرحوك تطالب بتعويض عن مدة العقد المتبقية وذلك لانك تضررت وتقد ترفعها لوزارة العمل

العقد شريعة المتعاقدين / بقوة النظام لايمكنه لتعيينك على وظيفة اقل من الحالية او تعيينك لوظيفة ليس لديك خبرة فيها او بدون موافقتك


مع اطيب تحياتي ,,

انا اشوف ان الشركه واثقه فيك عشان كذا سلموك الماليه ..

لكن انت جرب اجلس مع مديرك وقله ان الوضع كذا ماينفع لازم اكتب عقدي ولا فيه شركه ثانيه تستناني واعطيه مهله مثلا اسبوع او اسبوعين اذا ماكتبوا العقد استقيل..اذا والله شايفينك موظف مميز ومرتاحين معاك ماراح يقصرون واذا لا الله يسهل وشوف لك مكان افضل ..

الله يكون بالعون شي غريب