الليل موحـــش ...

الحب لولا عيونك · #1 (**permalink**) 04-09-2008, 07:10 AM

الليل موحش لارفيق ولا صديق ولا ونيس
مافيه من يسعد مساك بخير والا تسعده

حتى الرفيق اللي تنومس به وتختاره جليس
اقفى عليه الحظ من جور الليالي وابعده

امسيت وين امسيت ليه امسيت ياليل الخميس
واللي سراك بخير لكن طول مسراك اجهده

واللقمه اللي تبلش الحنجور والحظ التعيس
ان ما كلاها الذيب عداها على ضرس ولده

والطيب يزرع في مكان الطيب ماهو في الخسيس
اللي ليا ضاقت عليك الارض باعك وجحده

والله مدري ويش اقول .. أقول يا لعبة ابليس
اشوفها وحده على لسانه والاخرى في يده

عرضت نفسي للتعب واشغلني الدر النفيس
واقول بكره .. لا بعد بكره .. لا .. اللي بعده

ماكني اعرف ليلة الجمعه ولا بشت العريس
ولكني اعرف ليلة الفرقا عذاب الافئده

لكن فمان الله ياشئٍ وسط صدري حبيس
كان العيون تشوف عثراته قبل ماترصده

وفي ذمتي ذمه .. معاد ابكي على ليلى وقيس
الا باغمض جفن عيني واشكر الله واحمده

للشاعر // حـمد بن صالح