اول حاجه لازم نعملها اننا نقيم نفسنا ونصنفها من خلال اربع تصنيفات ودى نقطه مهمه جداااااا

والتصنيفات هى:
المتجنب
المتردد
المتقبل
الباحث



طبعا هتقولولى ايه الكلام اللى قلتيه فوق ده

اقولكم

الشخص المتجنب: يهرب من مواجهه الاخرين وتقديم العروض

الشخص المتررد: اول ماحد يطلب منه انع يعلن عن حاجه قدام الناس بيكون حجته انه بيخاف من كده ولما فعلا بيعرضها
دايما بيبن معاناته اثناء العرض

الشخص المتقبل: ده بقى بيحب يتكلم قدام الناس لكن مش بيدور على العروض يعنى سايب الحاجه تجيله على الجاهز

الشخص الباحث: يبحث عن الفرص للتحدث امام الاخرين ويحول القلق لدافع علشان ينجح فى تقديم العرض اللى بيتكلم عنه

بعد كده بقى يجى تقيم المهارات
ازاى يعنى؟
اقولكم يعنى كل واحد يقعد كده مع نفسه ويشوف المهارات اللى عنده ايه هى والمهارات اللى ناقصاه والمهارات اللى العرض ده بيتطلبها فيحاول بقى يكتسب المهارات التى تنقصه

بعد كده بقى يجى دور السيطره على القلق


كيفيه التغلب على القلق


القلق بصفه عامه له اشكال عده
فى البدايه هتكمل عن القلق بشكل عام وبعدين هانتقل للقلق اللى بيكون موجود اثناء تقديم الاشياءوعرضها


النقطه الاولى


تعالوا نشوف الايه الكريمه الجايه


فقال سبحانه وتعالى: (إنَّ الإنسانَ خُلِقَ هَلوعاً إذا مَسَّهُ الشَّرُّ جَزوعاً )(المعارج)


وتفسير الايه السابقه :ان الانسان شديد الجزع والهلع إذا أصابه الضر فزع وجزع وانخلع قلبه من شدة الرعب


ومن هنا فان الاسلام اعترف بفطرية الخوف عند الإنسان


اذن فكيف نتغلب على القلق طبقا لاسلامنا


قال سبحانه وتعالى: (ما أصابَ مِن مصيبةٍ في الأرض ولا في أنفسكم إلا في كتابٍ مِن قبلِ أن نَبْرَأَها إنّ ذلك على اللهِ يسيرٌ) [الحديد،22]


وقال سبحانه وتعالى: (قل لن يُصيبَنا إلا ما كتبَ اللهُ لنا هو مولانا وعلى اللهِ فليتوكّلِ المؤمنونَ) [التوبة،51]


ومن هنا فانه لاداعى للقلق فكل شىء مقدر للانسان ومكتوب له فما يصيب الانسان من مكروه او فرح انما هو مقدر من عند الله سبحانه وتعالى
ولو كل واحد فينا حط فعلا المعنى ده جواه وحط الاياتين السابقتين قدامه فى اعتقادى ان ده هيكون احسن حل للتغلب على القلق


فى مره سمعت عمرو خالد قال كلمه دايما بتحضر فى ذهنى قال حسبما اتذكر


ملوش لازمه انك تقلق ولا تعمل حاجه حرام علشان توصل لحاجه انت عاوزاها يعنى لو عاوز توسع رزقك اتجه الوجه الصحيحه وحاول توسعه بعمل شريف وقال ساعتها جمله عجبتنى ( والله يا جماعه ما حد هيموت فيكم ومقدر له انه يشرب نقطه مياه من غير ما يشربها )


النقطه الثانيه
مثلا كان فيه احصائيه اتعملت بين رجال الاعمال وكان متوةسط اعمارهم 44 سنه فى الولايات المتحده وجد ان حوالى 80 % منهم مصاب بالامراض الاتيه( قرحه المعده_ ضعف فى القلب_امراض الدم)


والسبب مش سبب جسمانى انما سبب نفسى بسبب قلقهم على المستقبل بكره


البيزنس بتاعهم وهكذاااا


لو بصينا خلال التاريخ هنلاقى فى طريقه معظم المشهورين اتبعهوا واولهم سيير كاريير مؤسس صنناعه التكيفات فى العالم
سير كاريير لما كان شاب اتحط فى مشكله وكان هيخسر شركته 20000ريال وطبعا كانت مشكله رهيبه طيرت النوم من عينه لفتره كبيره وبدات صحته فى الانهيار
لكنه اتبع مبدا حلو اوى


اول حاجه تحليل الموقف بامانه تامه وتقدير اسوء ما يكون لنتيجه الفشل او الخطا فقدر سير كاريير انه لن يموت ولكن الشركه سوف تخسر 20000 ريال


تانى حاجه توطيد النفس على اسواء احتمال وكيفيه التعامل معه


تالت حاجه تكريس الوقت والجهد لانقاذ ما يمكن انقاذه وبكده تحل المشكله اللى عندك وتتخلص تماما من القلق


طيب انا فى اللى فات حاولت اتكلم عن القلق بصفه عامه وطرق التخلص منه والموضوع ده بالذات كبير جداااا وميكفيهوش موضوع ولا اتنين ولكنى تطرقت اليه تطرقا سريعا


وارجع واقول الخلاصه هنا تكمن فى قول الله


قال سبحانه وتعالى: (قل لن يُصيبَنا إلا ما كتبَ اللهُ لنا هو مولانا وعلى اللهِ فليتوكّلِ المؤمنونَ) [التوبة،51]


قال سبحانه وتعالى: (ما أصابَ مِن مصيبةٍ في الأرض ولا في أنفسكم إلا في كتابٍ مِن قبلِ أن نَبْرَأَها إنّ ذلك على اللهِ يسيرٌ) [الحديد،22]


النقطه التالته


نرجع بقى للقلق المصاحب لمهارات العرض والتقديم



اثناء عرضك للاشياء هيكون هناك بعض القلق وده فطرى الذكى هو اللى يوظف القلق ده لخدمته وكحافز ليه علشان يقدم عرض قوى
والخطوات اللى تتبعها علشان كده اول حاجه


1.التنظيم: ازاى يعنى؟ اقولكم نظم افكارك كويس ورتبها ورتب الاشياء والpointsاللى هتتكلم فيها حسب الاولويه ده هيساعدك على الثقه بنفسك وبالتالى التخلص من القلق


2.التخيل الايجابى: زى ما القاعده بتقول التخيل الايجابى بيولد التخيل الايجابى والسلبى بيولد السلبى يعنى تخيل كده انك عملت بريزنتيشن تحفه ده هيبقى حاافز ليك علشان توصل للى فى دماغك وتقدمه بافضل شكل


3.التدريب: ازاى يعنى ؟ يعنى درب نفسك باستمرار على كده حتى لو بينك وبين نفسك وافتكروا القاعده اللى بتقول ان الطريق لاتقان الشىء التدريب عليه


4.التركيز على الاسترخاء: وده طبعا احسن بكتير ما تركز على قلقك وده هيساعدك على ازاله التوتر وده عن طريق انك تعمل تمرين الاسترخاء قبل العرض


5.الاتصال البصرى: النقطه دى بقى مهمه جداااا انك توصل لكل واحد قدامك واكنك بتبصله لوحده وكاناك بتشرحله لوحده وده هيساعد على اهتمام اللى قدامك باللى بتقوله والانصات الجيد منهم وبالتالى المساعده على زياده استرخائك وبالتالى نجاح عرضك باذن الله
هنتكلم عن التخطيط للعرض

والتخطيط للعرض ده بقى له جوانب متعدده ازاى يعنى؟

اقولكم بس الاول فيه نقطه مهمه لازم نتكلم عنها بسرعه كده

وهى المظهر والملابس يعنى ضرورى اوى ان اللبس اللى هتلبسه سكون بسيط ومتناغم مع بعضه مش مثلا زى ما فيه ناس بتعمل اى حاجه بتعجبها من لبسها بتلبسها على بعضها وبتكون مش متناسقه فالنتيجه ان الناس هتسيب عرضك وتهتم باللى الحاجات الغريبه اللى انت لابسها
وفى نفس الوقت متلبسش حاجه تكون مبهره جدااااا فالناس برضه تنشغل بيها البساطه ثم البساطه ثم البساطه

ندخل بقى فى المهم

تخطيط العرض

وضع خطه للعرض هيميزه وهيخليه يتم بكفاءه

وبيتم عن طريق خطوات اول حاجه تحديد الهدف من العرض

وعرض الشىء عاده بيكون له هدفين هل هو للابلاغ ام للاقناع؟

طب وياترى فيه فرق بينهم اصلا ؟

طبعــــــــــــــــــــــا اكيد اقولكم ايه هو

الاقناع: انك تقول للحضور عن التغيرات المطلوبه
الابلاغ: تتضمن بوجوب اتخاذ اجراء ما حول مشكله او مهمه

طيب حددنا خلاص نوع العرض بتاعنا نيجى بقى للنقطه اللى بعدها
وهى تحليل الجمهور

وذلك عن طريق القيم : كل جمهور وله قيم معينه ومفاهيم معينه تختلف من مجموعه لاخرى

طيب وبعد ما حللنا الجمهور فيه بقى شويه نقط ياري تمشى عليها
1. اعرض افكارك الفرعيه علشان تدعم بيها افكارك الاساسيه
2.عرض المزايا لزياده اقناع الجمهور بالعرض
3.تصميم نشرات التوزيع ودى هتحط فيها المعلومات الكافيه لمسانده عرضك ويتم توزيعها قبل او بعد العرض
4.جمله عرض الافكار الرئيسيه يعنى جمع افكار العرض فى الاول واتكلم عنهم بسرعه وبعدين امسك نقطه نقطه اتكلم فيها
5.اعداد المقدمه والنقطه دى فى غايه الاهميه بجد والمقدمه لازم تشمل عنصرين رئيسين اولهم عرض المعلومات ثانيهم جذب الانتباه

اولاعرض الموضوع وخلفيته وعناصره الرئيسيه
ثانيا جذب الانتباه وده عن طريق مثلا
انك تروى قصص قصيره تربطها بالموضوع او فكاهه مرتبطه بالموضوع ولكن احذر التعصب لشىء او السخريه

وطرح الاسئله وهناك طريقتين هنا: الاولى طرح الاسئله الحره
او طرح السؤال مع طلب رفع اليد لضمان عدم حدوث بلبله

6. اعداد الخاتمه وفيها عرض ومراجعه شامله لما تم عرضه وعلشان العرض يكون ناجح لازم الخاتمه تكون قويه

مهارات العرض والتقديم presentation skills
هنتكلم النهارده عن وسائل الايضاح وهى مهمه جدا لنجاح العرض ليه اقولكم لانها
1.بيعتمد عليها درجه جذب انتباه الجمهور
2.تتدعم شرحك الشفهى للموضوع
3.تيسير تخيل العناصر التى يصعب تصورها

طيب فى نقطه مهمه اوى لازم نراعيها واحنا بنجهز الداتا بتاعتنا وهى البساطه والاختصار فيها ازاى يعنى؟
يعنى منزودش البريذنتيشن بتاعنا بكم من المعلومات اللى ملوش لازمه وده هياثر بالسلب طبعا لانه هيخلى الجمهور اللى قدامك هيحس بالملل والتشتت وفيه ناس هتضيع منك فى النص

طيب دول عشر ارشادات علشان نعمل وسائل ايضاح فعاله:

1. استخدام اقل قدر ممكن من وسائل الايضاح وياريت لو لكل وسيله دقيقتين على الاكثر

2.شرح فكره رئيسيه واحده لكل وسيله مساعده علشان نمنع تشتت الجمهور وفيه بعض النقط بتكون سهله مش محتاجه شرح فملوش لازمه نخوض فيها كتير

3.استخدام وسائل الايضاح المصوره كالرسوم البيانيه والصور وغيره وبالذات الرسوم البيانيه بتتيح عرض اكبر كم من المعلومات

4.استخدام الالوان بحرص فى البور بوينت ونبعد عن الالوان الصاخبه فى الخلفيه والكلام والنقطه دى مهمه
يعنى مثلا اللون الازرق بيعطى وقار اكثر من الاصفر
الوردى والرمادى بيدل على الهدوء
الاحمر والبرتقالى بيعطى نوع من الدفء
لذا وجب اختيار الالوان وان تكون متماشيه مع الخلفيه واجعل الوان مخالفه للنقاط الرئيسيه والاكثر اهميه

وانا قبل كده كنت قريت ان افضل حاجه ان يكون خلفيه بيضاء وعليها الكتابه بالازرق بس درجه معينه منه او العكس وده بيكون افضل للعين

5.يجب مراعاه الحجم (حجم الكلام الصور غيره) بحيث ان رؤيته تكون سهله للكل ولاخر واحد فى الغرفه

فى نقطه مهمه اوى لازم كمان نراعيها وهى طبيعه الفضول الموجوده فى النفس البشريه يعنى متعرضش الداتا بتاعتك مره واحده خحلى نوع من التشويق فيها ده هيساعد ان الناس تكون متفاعله معاك اكتر

كمان فى نقطه كنا قلنها قبل كده وهى نشرات التوزيع قلنا نوزعها قبل او بعد العرض مشاثناءه لان الناس كلها تركيزها هيروح للحاجه اللى بتتوزع دى مش ليك

كمان خلى بالك اثناء الشرح اقفل البور بوينت علشان الناس تركز معاك واثناء شرحك لو ماسك مثلا حاجه زى الليزر بتشير بيها خليها للرسومات والاشكال مش كل حاجه علشان رعشه اليد متظهرش

.
.
.
.
.
.
.
نيجى بقى لنقطه لاحظت انها مشكله البعض وهى قله التدريب
والارتجال فى الحالات الطارئه

التدريب على تقديم العرض

اولا سجل ملاحظاتك الاساسيه والهامه بخط كبير وواضح على بطاقه تكون امامك ولكن تجنب انك تقراء منها للجمهور فالارتجال افضل كثيرااا

تدرب على الوقوف فى مكان العرض مسبقا (ان امكن)

قدم عرض تجريبى مع نفسك وسجله بالفيديو ثم شاهده وشاهد نقط ضعفك والاشياء التى يجب التركيز عليها

فى نقطه مهمه لازم نخلى بالنا منها وهى ازاى انك تسيطر على العرض بتاعك
لازم انك تحتفظ بهدوء اعصابك للاخر مهما ساءت الظروف فتقديم العرض ممكن ان يمر بصعوبات علشان كده
ياريت تقعد مع نفسك وتفكر ايه اكبر مشكله ممكن تحصل وازاى اتغلب عليها


الارتجال فى الحالات الطارئه

طيب فى كل اللى قلناه قبل كده عمالين نحضر للبريذنتيشن بتاعنا ونظبطه
طب لو اتحطيت فى موقف مفاجىء واتطلب منك تعمل عرض مره واحده
يبقى لازم تمشى تبع الخطوات دى

اولا:التفكير وترتيب الافكار:رتب افكارك وعرضك حسب نقطتين
1.الماضى. الحاضر .المستقبل
2.انتاج .دعايه .تسويق

ثانيا التحدث:
1.اذكر بعض الملاحظات التمهيديه حتى تتمكن من تجميع افكارك والالمام بها
2.كون جمله عرض رئيسيه تشمل الفكره الرئيسيه لعرضك وبعدين جزائها لافكار جزئيه
3.ادخل فى لب الموضوع وتحدث عنه عن طريق التحدث عن افكارك الجزيئيه تفصيلا
4.راجع افكارك الرئيسيه على الناس مره اخرى بايجاز حتى تثبت الفكره
5.حط نهايه قويه فكما بدات قويا يجب ان تنتهى بشكل قوى

وتذكر ان نجاح عرضك متوقف على عاملين مهمين جدااا
1. المامك بعرضك جيدا وكل تفاصيله
2.اسلوب وكيفيه تقديم هذا العرض
زى ماتفقنا قبل كده ان نجاح العرض بيعتمد على عاملين اساسين جدا
وهما ادراك وامامك لموضوع العرض
اسلوب تقديم هذا العرض

طيب ندخل بقى على النقطه اللى بعد كده
وهى ارشادات عامه للتقديم


1.الوضعيه: مالها يعنى ؟ اقولك خليك واقف فى ثبات واقف فى مواجهه الجمهور وباسترخاء متشدش نفسك

2. الحركه: متقفش فى حته واحده لان انت نفسك هتزهق وتركيزك ممكن يقل وبالتالى يبقى اللى قدامك مش هيوصله المعلومه مظبوط
وكمان متفضلش رايح جاى كانك بتتمشى على الكورنيش يعنى تحرك بمقدار خطوتين او تلاته فقط وعلى فترات ليست بقصيره وليست بطويله الوسطيه من الاخر وعلى راى المثل القائل اللى يزيد عن حده يتقلب لضدده

3.الكتفين: احرص ان كتفيك يكونوا فى مواجهه الجمهور علشان تحقق مبدا الاتصال البصرى
ولو بتشرح حاجه مثلا احرص ان الزويا الا تزيد عن 45 درجه

فيه هنا ملحوظه مهمه ركزوا عليها: انك اول ما تقف على المنصه مثلا ظبط نفسك ووقفتك وما تبداش فى الكلام الا بعد ما تتاكد من حدوث الاتصال البصرى

تمام كده
ندخل فى اللى بعده

4.الايماءت : والتى تشكل دورا هام اما فى زياده تركيز واقناع الجمهور معك او تشتيته زى مثلا وضع اليدين فى الجيوب تشبيك الايادى وما الى ذلك


الاتصال البصرى

يدل الاتصال البصرى على الثقه بالنفس ويفتح مجالا واسعا للتواصل مع الناس وتكوين علاقات جيده
فعند حدوث التواصل البصرى بين مقدم العرض والجمهور يزيد ذلك من اندماجهم معك ويجعل العرض اكثر جاذبيه

والتجارب دلت على ان افضل اتصال بصرى للشخص يكون من 1_3 ثانيه ولو الجمهور قدامك كتير قسمهم على مجموعات وحاول ان كل شخص يشعر وكانك تتحدث معه مفردا

تمام كده تمام
اخش بقى على النقطه اللى بعدها

استخدام الصوت:
فيه 3 مشاكل متعلقين بالصوت
وهى 1. الرتابه
2.التحدث بسرعه كبيره
3. مشكله طبقات الصوت

طب ايه رايكوا نتكلم عن كل نقطه تفصيليا

طيب

1. الرتابه: بتحدث الرتابه عندما يفقد الصوت نبرته الطبيعيه وده بيكون نتيجه للقلق وده بيخلى عضلات الصدر والحنجره اقل مرونه
علشان كده اهم حاجه الاسترخاء ونتخلص من القلق واعتقد اننا اتكلمنا فى النقطه دى كويس وبشكل مجمل

2.التحدث بسرعه كبيره: لاتعتبر مشكله الا اذا كان الكلام غير مفهوم وعلشان كده اصغ لنفسك وانتت تقول اخر كلمه فى كل جمله

3.مشكله طبقات الصوت: عند تقديم العرض تاكد من وصول صوتك لجميع الحاضرين وانهم يسمعونه بوضوح ولتجاوز هذه المشكله يمكن اتقانها بالممارسه والتدريب ومتهيالى احنا عرفنا اهميه التدريب قد ايه
زى مثلا حاول تتدرب فى غرفه اكبر من غرفه تقديم العرض بتعك مرتين علشان تقدر تتحكم فى طبقات ونبرات صوتك

اساليب السؤال والاجابه:

1. تشجيع الجمهور على طرح الاسئله: الاسئله هى معيار استيعاب الجمهور لعرضك طيب احسن طريقه انك ترفع يدك وتسالهم هل يوجد هناك اى سؤال ؟
طب فيه ناس هتقولى ورفعنا ايدينا ليه اقولكم:
1. دى اشاره بصريه انك هتبدء فى الاسئله وتشجعهم على طرحها
2. تحافظ على النظام فبالتالى كل واحد يرفع ايده علشان يسال

2.الاستماع للاسئله عند استماع الاسئله تجنب المشى اثناء الاستماع للسؤال او مقاطعتك للمتحدث بقولك _اعرف قصدك جيدا_ وتجنب الحركات السلبيه مثل فرقعه الاصابع او فرك اليدين او هو راسك بصوره سريعه لان كل هذا سوف يربك السائل ويهز صورتك اللى قد رسمتها خلال عرضك

3. الاجابه عن الاسئله : عند الاجابه على الاسئله حاول الاحتفظ بهدوئك التام
واستعد من قبل لاصعب الاسئله التى يمكن ان تتطرح عليك فسوف يبدو بعد ذلك كل سؤال سهلا

بالنسبه للاسئله الطويله اطلب من السائل ايضاح السؤال اكثر بصيغه مختصره وذلك لترتيب افكارك

استخدم قاعده (25%_75%) اى ان حاول الاحتفاظ بالاتصال البصرى ب 25% مع السائل و75% مع باقى الجمهور لان ذلك يساعد على التحكم بزمام الامور
لاتستخف باى سؤال يتم توجيه اليك وحاول الاجابه عنه بشىء من الايجاز ودون اسهاب ايضا

قد تكون فى بعض العروض هناك وقت للاسئله او الاسئله تتخلل العرض ايا كانت فالمتحدث هو المتحكم فى طرح الاسئله والاجابه عنها وفى نهايه الحوار قل(اسعدتنى اسئلتكم)


بكده انا ابقى خلصت الموضوع كله اتمنى ان الكل يكون استفاد واتمنى انى اكون عرفت اشرح بشكل كويس واسفه على الاخطاء الاملائيه لو كانت موجوده والارشادات اللى فوق هتياعدكم ان شاء الله ان تكوانوامتحدثين جيدين وبارعيين وتقديم اقوى العروض
واتمنى منكم طلب ان تدعو لي بالهدايه للطريق المستقيم وان ييسر الله لى امورى والدعاء لوالدى

تحياتى للجميع

تسلم على المرور

مرررررررررررررررررة شكراياقلبو وبجد افدتنا
اموووله

شكرا جزيلا