خاطرة ابكتني

ذبول الورد · #1 (**permalink**) 08-09-2008, 11:13 AM

الطفوله ..

أحلى مافي هالحياه
مرحله من غير هم
كنّا دايم نبتسم
كنّا حتى لو بكينا ... وجارت الدنيا علينا
بعد لحظات وثواني ...
بسمه فينا ترتسم

كنّا نركض
خلف كوره ... ( لا لا أنا ماكنت معهم؟ )
وحدي بس بعيد عنهم ... كنت أنا أضحك عليهم ...
جالس لحالي أهذري... جالس أحسب كم( كوبري )...
صلّحه( أحمد ) في ( ماجد ) ؟؟
والله واجد!!
وقبل ما يحل الظلام ...
للبيوت نروح نجري ... ( لا لا أنا ماكنت معهم ! )
أمشي وحدي بعيد عنهم ... أمشي وأعدد أثرهم!
وهم عني يبعدون ...
يبعدون ... يبعدون ...
إلا( ماجد )!
كان مثلي حيل ضايق ...
بس حزني كان حارق
كان يسألني ببراءه : ...
ليش تعرج ؟ ... قلت مادري ! - باستياء -
ليش تبكي ؟ قلت مابكي - بكبرياء -
ضاق مني ...
ثم سألني في غباء ...
قال ( وثرايك تثابق )؟
وراح عنّي ... !!

كنت أسأل دوم نفسي ...
ليش ما أركض معاهم ؟؟
ليش دوم أمشي وراهم ؟؟
وش
بلاي ؟؟ أو وش بلاهم ؟؟
ليه أنا غير الأنام ؟؟
زاحمتني الأسئله...
كل شيٍ أجهله ؟
وإن تعبت من الإجابه...
أحضن الحيره وأنام .

مرّت سنين وكبرت ...
صار همّي اليوم أكبر
حتى دمعي صار أكثر
للأسف توي قدرت ...
أفهم إني شخص ( عاجز )!
يعني بيني وبينكم
مليون حاجز !!!
صدقوني ذي حقيقه ...
لا طلعت السوق ... كل ما أمشي دقيقه
القى كل شوي أبله !
يمشي ويناظر صديقه ...
ويغمز له
يقول : ناظر...!
وش يناظر ؟؟
وتتفجّر في خفوقي
ألف ضيقه
ووحده في وسط الزحام ....
طالعتني باهتمام ...
بنت في عمر الزهور ... أي رشاقه ... وأي أناقه ...
وأي عطور !!
قلت في نفسي ياهووووه

هي تناظرني بغرام ؟ أو هي نظره والسلام
؟
بس أكيد إنها تعرفني ... شايفتني ؟
شايفتني في جريده ؟
واعجبتها لي قصيده ؟
إيييييه أنا توي افتكرت
...
لي قصيده ...
كنت ناشر معها صوره
بس صوره ... ياسلااااا م
وفاجأتني ...
لمّا صارت لي قريبه ... كانت تتمتم بطيبه
{يكسر الخاطر حرااااام ) !!!!!
وتركت دمعه غريبه ...
وضاعت بوسط الزحام
دمعه كانت تحكي وضعي ... زلزلتني
ارتطم قلبي بضلعي ... دمرتني
صدقوني ...
أصعب اللحظات وأقسى
لاغدا الرجّال يكسر ... خاطر انثى
كيف ينسى ؟؟؟
جاوبوني !

وزاد همّي ...
يوم فكّرت بوظيفه ... ثم زواج
أي وظيفه ... وأي زواج ؟؟
اللي مثلي ...
مهما طالب ... لويلف ولو يدور
زين لو حطّوه كاتب
لا
... وعلى بند الأجور ....
ماهو رسمي !!!
صدقوني لو تدرّج ... وصار راتبه ايتصاعد
وابتدا وضعه يزين
ما أظنه بيتزوّج ... حتى لو بعد التقاعد
>>!
>>وفي النهايه ...
يابلدنا... مهما كانت( تسميتنا )
عاجزين ...( معوّقين )
لك عهدنا... وذا قسمنا:
>>
أقسم بالله العظيم ... منزل الذكر
الحكيم
أن أصونك يابلادي ... من شرور العابثين
من مطامع كل حاسد ... من نوايا كل فاسد
وإني لك حصنٍ حصين
إنتي ناديني وشوفي ... لا نويتي بالجهاد
والله أقهر لك ظروفي ... دامك إنتي لي بلاد
وباسم كل العاجزين ...
دام فينا أصبع

يطول الزناد
لا يهمّك يابلادي

...
وازهليها

منقوووووووووووووووووول

ساهيةالبال · #2 (**permalink**) 08-09-2008, 03:42 PM

تسلم الأياااااااااادي

ع النقلهـ الرائعهـ

alyassry · #3 (**permalink**) 08-09-2008, 05:38 PM

من جد ابداع الخاطره وربي يسعد اللي نقلهااااااااااااااا

ذبول الورد · #4 (**permalink**) 09-09-2008, 05:24 AM

الله يسلم يدك ويسعدك معاي ياكريم مشكوره على المرور

saeed saad · #5 (**permalink**) 09-09-2008, 05:52 AM

وربي ذووووووووووووووووووووق
تسلم يمينك على النقل يالغالي

طالب رضا الله · #6 (**permalink**) 09-09-2008, 06:02 AM

تسلم يا ذبول الورد .. خاطره رائعه وفعلا محزنه ..
لم اكد استطيع ان اكتم العبره ..

فعلا خاطره رااااااااااائعه

وشفى الله كل مريض .. وانشالله ربي ييسر لذوي الاحتياجات الخاصه وظايف الكل يحلم فيها
,,تقبلو مروري,,

دمتم بود,,

ذبول الورد · #7 (**permalink**) 09-09-2008, 07:00 AM

الله يسعدكم جميعآ على المرور بس انا أختكم في الله وليس اخوكم

لولو وذهب والماس · #8 (**permalink**) 11-09-2008, 10:56 AM

قصيده جدا مؤثره وانا اقراها خنقتني العبره وحمدت ربي على النعم الكثيره الي اعطاني اياها
((الحمدالله يارب على كل نعمة رزقتني اياها)) بس لو كاتب الخاطره تأمل فيه نفسه قليلا لوجد ان الله جعله اعرج ولم يجعله مشلول عن الحركه او مختل عقليا اسال الله له الثبات ولجميع العاجزين وان يقويهم بالايمان