السلام عليكم و رحمة الله و بركاته
اخواني الجامعيين
بعد تخرجي من جامعة القصيم قبل عامين و بعد معاناه مع العطاله
اكتشفت موضوع خطير يغفل عنه الكثير الكثير الكثير من الخريجين بحسن ظن منهم
كما وقع معي و علمت ان هذه المشكه كانت سبب رئيسي في عدم توظف الكثير
من الجامعيين السعوديين في الوظائف الحكوميه
يا اخوان هل تتخيلون ان تخصصي ادارة أعمال ( مسار الاداره ) و تخصصات كثيره في
مختلف الجامعات السعوديه غير معترف بها لدى وزارة الخدمه المدنيه
و انك لو تقدمت لأي وظيفه حكوميه ستقوم وزارة الخدمه المدنيه برفض اسمك لأن التخصص
مجهول بالنسبه لهم
سأحاول الاختصار و ترتيب الموضوع و الفكره لكم قدر الإمكان
اولا ً
وزارة الخدمه المدنيه قامت بتصنيف جميع الوظائف الحكوميه و المسميات الوظيفيه و المراتب
حسب التخصصات و المسارات الجامعيه حيث قامت بوضع كل وظيفه و وضع المؤهلات المناسبه
لشغل هذه الوظيفه و اذا توافقت مؤهلات المرشح و (( اسم التخصص )) مع الموجود في التصنيف
يتم تعيينه و اذا لم تتوافق يتم استبعاده و هذا ما حدث معي
ثانيا ً
قامت ايضا ً وزارة الخدمه المدنيه بوضع تصنيف للتخصصات الجامعيه و المسارات الفرعيه
او بمعنى آخر ( للتخصصات الدقيقه )
و جميع من لا يتوفر تخصصه العام في هذا التصنيف فلن يتوظف حكوميا ً ابدا ً
و الذي يتوفر تخصصه العام و لم يكن تخصصه الدقيق موجود في التصنيف فإنه لن يتوظف
في وظائف تطلب التخصصات الدقيقه
يعني ( يتوظف بالوظائف اللي تطلب تخصصه العام بشكل كامل )
وهذه الوظائف قليله جدا ً
طيب
بقول لكم وش اللي صار معي باختصار قدر الامكان والله بتنصدمون
انا من يوم تخرجت من جامعة القصيم كنت اقدم على مسابقات وظائف حكوميه
و اوصل اخر مرحله و لكن اذا جا الترشيح النهائي ما اترشح
و استمر الحال سنه و نص لين جا مسابقة وزارة العدل و تقدمت و وصلت الترشيح النهائي
و ما ترشحت و ما حطوني حتى بالاحتياط
استغربت من الموضوع و رحت لوزارة العدل و سالت عن السبب قالو لي انت مرشح اصلا
و غيرك مرشحين كثير بس لما ارسلنا ملفاتكم لوزارة الخدمه المدنيه عشان التعيين
رفضت ملفاتكم بسبب ان (((( مسميات تخصصاتكم غير موجوده في تصنيف الوظيفه و المؤهلات ))))
و فعلا ً لقيت ناس كثير من جامعة الملك فيصل و جامعة الملك عبدالعزيز
و الطايف و جامعات كثيره مرفوضين لنفس السبب و المصيبه فيه واحد
من جامعة الملك فيصل تخصصه الدقيق يختلف عن الموجود بالتصنيف بكلمه وحده
وكان تخصصه مساح و شي زي كذا و مع ذلك رفضوه
طبعا ً انا مثلكم ما فهمت وش يقصد
رحت لقسم التصنيف في وزارة الخدمه المدنيه و قابلت مدير التصنيف
و قلت له ان تخصص ادارة اعمال مسار الاداره نفس تخصص ادارة اعمال مسار ادارة اعمال
اللي بجامعة الملك سعود من كل النواحي
و قال يا اخ محمد
حنا وضعنا التخصصات العامه و الدقيقه اللي كل الجامعات تسير عليها بنفس الاسم
لكن بعض الجامعات السعوديه تغير في مسميات التخصصات سواء مسميات التخصصات
العامه او مسميات التخصصات الدقيقه و (( ما تخاطبنا و لا تبلغنا نضيف المسمى بالتصنيف ))
و فعلا لما دخلت موقع وزارة الخدمه المدنيه و دليل التصنيف
حطيت بالتصنيف بكالريوس و التخصص العام : ادارة أعمال و طلع لي تخصصات دقيقه
من ضمنها ادارة اعمال و ادارة تسويق و ادارة دوليه و و و و لكن ( مسار الاداره ) اللي هو تخصصي
ما كان موجود
انقهرت و قلت له طيب خوياي فعلا ً اغلبهم ما توظف حكومي لكن فيه بعضهم توظف
كيف يتوظفون هذولا و حنا لا ؟؟؟
قال هذولا تقدمو على وظايف تطلب تخصص ادارة اعمال العام مو الدقيق و ما يهم التخصص الدقيق
لذلك يتم ترشيحهم حسب تخصصاتهم العامه
و هالوظايف قليله اغلبها بالتعليم
طبعا هالكلام كان قبل 8 شهور تقريبا
عموما انا عن نفسي
حليت المشكله
و رحت لجامعة القصيم و اخذت منهم خطاب لوزارة الخدمه و طلبت اضافة
تخصص ادارة أعمال مسار الاداره في التصنيف و اضافوه بعد اسبوع
و رجعت لوزارة العدل و طلبت منهم يرجعون يحطونا بالاحتياط و الحمد لله دخلونا بالاحتياط
و توظف شباب كثير
حتى اغلب خوياي اللي متخرجين زمان و بعدي جتني اخبار انهم توظفو اغلبهم
و فرحت و كتمت هالكلام لاني احتسبت الاجر لله
الشاهد بالموضوع
قبل احل المشكله كانت الوظائف المتاحه لي بالمفاضله حقت وزارة الخدمه اول ما تخرجت
ما تتعدا 20 وظيفه
و بعدها صار يطلع لي بالمفاضلات 400 و 300 وظيفه اقدر اقدم عليها
ختاما ً المطلوب من جميع الجامعيين التالي
اولا ً الدخول لموقع وزارة الخدمه المدنيه ثم لدليل التصنيف كما في الصوره
ثانيا ً
الدخول لدليل تصنيف المؤهلات
ثالثا ً
البحث عن تخصصك حسب المؤهل و ثم التخصص العام ثم التخصص الدقيق
اذا ما حصلت تخصصك على طول تروح لوزارة الخدمه المدنيه
قسم التصنيف و تتاكد هل تخصصك موجود او لا و ايش المشكله
و تخلي جامعتك او كليتك تخاطب الوزاره تضيف التخصص
صدقوني كثييييييييييييييييييير جدا عاطلين عن العمل بسبب هالموضوع البسيط
و اتمنى من اخواني اللي تخصصهم زي تخصصي يدعوني لي بالتوفيق و الاجر عند رب العالمين
و تكفون انشرو هالموضوع قد ما تقدرون و الله الجميع ما يدري عن هالشي
و يمكن يضيع مستقبله بسبب هالشي
اتمنى ادارة المنتدى تعمم هالموضوع على جميع الاعضاء بأي طريقه لانها مشكله خطيره
بسبب تهاون بعض الجامعات في اضافة التخصصات و حفط حقوق الطلاب و الخريجين
استودعكم الله
اخوكم محمد غنام الشمري
03-03-2015, 07:47 AM
العرض العادي
