السلام عليكم ورحمه الله
انا ربي قدر علي وتوظفت في شركه الحكير
وطبعا ما شا الله الكل صار يعرف عن فسادهم واستغلالهم للبنات
والحمدلله استقلت منها وقاعده اداوم شهر انذار وكلها كم يوم وافتك

اللي ابي اقوله انهم مستغلين جهل البنات وعدم معرفتهم بحقوقهم
ما يدربرن البنات زين عشان تطلع عليهم عجوزات > اي فاتوره ترجيع تحسب عالبنت وتنخصم من راتبها اذا ما سلمتها اخر اليوم وما تعرف هالشي الا اذا استقالت
غير كذا يخلون البنت الوحده فضلا عن انها تمسك محل لحالها براتب كاشير وهي تسوي شغل مديره المعرض والبائع والكاشيره الا انهم يمسكونها اكثر من محل لان ما فيه موظفات كفايه لقله رواتبهم
واحيانا يستغلون جهل البنات عشان يخلونهم يداومون اكثر من ساعات عملهم وبيوم اوفهم بدون مقابل ويعشمونهم بالترقيات اللي لم ولن تجيهم
لا وعشان ما يرفعون رواتبهم جابوا فلبينيات يعرضون البضاعه والهدف منهم بعد ان المحلات ما تقفل ويقولون للبنات اذا جا مكتب العمل قولو لهم انهم للنظافه لا غير عشان ما تقطعون رزقهم
والحين بادين حمله توظيف والاعلان كله كذب كاتبين علاوات وترقيات وبونص ومواصلات مجانيه ووالله ولا شي شفناه منهم
حنا نبي رواتبنا كامله بس ما نبي بونص

لا واخر شي طلع منهم بالنخيل مول حققنا اعلى مبيعات بالمملكه فسووا جوائز تقديريه لرفع المبيعات في الفتره المتبيقيه من الترقيت الشهري
اللي تجيب فاتوره قيمتها اعلى من 1000تاخذ 10 ريال واللي تجيب فاتوره اعلى من 3000 تاخذ 30 ريال
واللي تجيب المحل المثالي من الترتيب و خدمه الزبون واعلى مبيعات يعطونها بروست طبعا وجبه بروست وحده لكاشيره الصبح والمسا والعامله الفلبينيه يعني يتقاطون فيها
واللي تجيب اعلى نسبه بالمول وحنا نتكلم عن ارقام خياليه توصل لمحلات الشباب ل نص ميلون مثل زارا
و70 الف للبنات مثل مونسون ياخذ بيتزا وبعد قطيه يعني يطلع لكل وحده قطعه

لاي ذل بنوصل اكثر من كذا اذا الرواتب متوسطها 3000 بعد خصم العجوزات وكذا ونادر تلقى وحده ينزل لها بونص
والادهئ والامر لما يجي مدير المول المصري ويقول حنا متبرعين لكم بهالجوائز

انا ما اقول هالشي عشان اسيئ للشركه او اضرها انا اقول هالشي عشان ما ينظلم غيري فيها لان الشركه مستهينه جدا بالسعوديات هناك وماكله حقوقهم حتى بعد الاستقاله ما تسقط اسمهم من التأمينات بسهوله و لا تعطيهم حقوقهم كامله وتشترط على الموظفه انها توقع ورقه مخالصه وتسلمها لهم قبل لا تاخذ حقوقها عشان ما تكون قادره ترفع دعوئ ظدهم او تشتكي عليهم

انا الحمدلله جامعيه ومو محتاجه هالوظيفه بس غيري محتاجها و مطلقات و حياتهم كلها واقفه عالراتب حرام والله اللي يصير
وكل فتره مسوين حمله توظيف جديده واذا طالبنا بحقنا يقولون اللي مو عاجبه يستقيل وللاسف فيه بنات ما يقدرون يستقيلون

انا استغرب من انه اكبر مجموعه بيع تجزئه كبيره لهالدرجه وما ضا الله مبيعاتها هالشهر بس تعدت 700 مليون كيف ترضى بهالشي
وش تستفيد اذا وظفت بنات و استغلتهم وطلعوا بعد فتره من سوء المعامله
وانا اعترف ان الخطأ الاكبر من البنات وسكوتهم ورضاهم بان الشركه تستغلهم بحجه الترقيات اللي ما راح يوصلون لها

لكن ما نقول غير الله يغنينا ويغنيهم بفضله عمن سواه ولا يحوجنا لاحد

فعلا الشركه هذه غريبه انا اشتغلت عندهم بكيدزانيا وطلعت علي طول لان ووعدهم كذب في كذب شفتاتهم مره مرهقه و المكان مزحوم وعليه ضغط طوال ايام الاسبوع وما يطلعو بنات كثير المكان الواحد يادوب توقف عليه بنت ولا بنتين وما يكفي لان المفروض يكون فيه علي الاقل ثلاث بنات والناس اشتكت بحساباتهم علي الانستقرام لان فعلا المكان سار فوضوي ومافيه تنظيم
حتي مدرسة ولدي لما راحت مع الطلاب رحلة لها استأت من الفوضي الى فيها وعدم التنظيم لقلة الموظفات وكثير بنات استقالو والسبب رواتبهم السيئة عمل جدا مرهق مافي اي تنظيم او تنسيق لطلوع الموظفات موظفه وحدة تستقبل اعداد كبيرة من الاطفال لوحدها وحتي لو مسكت معاها وحده ثانية ما يكفي وبنات الكاشير يعانو من نفس مشكلتك بالضبط والله فكرت اني ارفع شكوى عليهم وكمان ما طلعت من التأمينات بالساهل
الا بعد روحه ورده بينهم وبين التأمينات

لا حول ولا قوة الا بالله
مااقول الا الله يعين كل انسانة محتاجة وظيفة بعيدا عن ذل و كيد البشر
شكرا على طرح الموضوع ,واتمنى من كل رب عمل انه يتقي الله في بنات المسلمين
بالتوفيق !

فعلا مشكلتهم معروفة اوسخ شركة لو انا مشرف بالمنتدي والله ماينزلون وظيفة باسم الحكير بمنتدي البطالة اخليهم يعلقون لافتات توظيف علي براميل البلدية اكرمكم الله

الافراد يصنعون الظالم بجهلهم
لو كل شخص ماسكت وطلع كل حقوقه وحتى الريال من عينهم
ماوصلو هذا المواصيل في استحقار الناس

كل بنت هي مساهمه في صنع هذا الطاغيه وماننسى وزارة العمل