السلام عليكم ورحمة الله وبركاته

اﻹسبوع الماضي كنت رايحة مجمع اللؤلؤة بالدمام وبعد آذان المغرب دخلنا المصلى ﻹداء الصلاة وبعد ماخلصنا صلاة كملنا تسوق في المجمع وبعدها فتحت الشنطة ومالقيت المحفظة .. واستغربت كيف انسرقت وهي كانت بيدي ووقت الصلاة كانت جنبي .. والمحفظة كان بداخلها 500 ريال وبطاقتي الضمان الجديدة وبطاقة اختي مع الارقام السرية الجديدة .. انا نسيت ان الارقام السرية موجودة بعد مااستلمناهم حطيتهم في المحفظة ونسيت أمرهم .. واختي كانت طالبة اني اسحب لها فلوس منها وظلت بطاقتها عندي .. المهم رجعت المصلى وسألنا العاملة الموجودة هناك قالت مالقت شئ .. ورجعنا المحلات اللي دخلناهم في المجمع ولا لقينا شئ .. وعلى طول اخوي كلم بنك الراجحي ووقفوا البطاقات .. لكن بعد مرور 24 ساعة دخلت موقع الضمان اتأكد من الرصيد .. وكان في رصيد كل واحدة فينا عشرة اﻵف ريال قيمة المقطوعة اللي نزلت لنا الشهر الماضي ..... وتم سحب 5000 من رصيدي و 5000 من رصيد اختي بنفس الوقت اللي سرقوا فيها المحفظة وقبل مايتم توقيف البطاقات ... وأخوي بلغ البنك وقالوا له راح يراجعوا كاميرات الصرافات ويردوا عليه بعد يومين بس للان لم يتم الرد .... فقط اخبرتكم من أجل أن تحذروا خصوصا الحريم داخل مصلى المجمعات والاسواق .. كثرت السرقات بطرق احترافية من قبل السارقين .. مانقول غير الله يهديهم ويصلحهم .. والحمدلله على كل حال ..

الله يعينك استودعي الله فلوسكم وادعي الله ترجع لكم

والارقام السريه تنحفظ بالجوال مثلا

وخلي فلوسك بالصراف اللي تحتاجيه اسحبي ع قد حاجتك

الله يعينكم ويردلكم فلوسكم وحسبي الله على الخونه اكالين الحرام .

الله يعوضكم خير ياغالية

ي قلبي انتم غلطو لازم اتبلغين الشرطه وهم يطلبون الكامره والمعلومات من البنك وصدقيني ان شاءالله يجيبولك حقك

انا لله وإنا إليه راجعون السرقة مصيبة بحد ذاتها
ولكن من المفترض عالطول يشوفوا الكاميرات بعد مابلغتوهم مو يومين يخلوكم تنتظروا
أنا دائما بابتي ينصحني يقولي لا تأخذي كل بطائقك الخاصة معاكي في المحفظة من صرافات وبطاقة الأحوال تبع وتبع عيالي اخذ صور ولكن أنا أحيان اأخذهم وأحيانا لا
وحتى الأرقام السرية للمباشر للافراد والأهلي اون لاين وجدارة وووووالخ كله حافظته في الجوال
ولكن شكلي خلاص اعمل بنصيحة باباتي اكتب في مذكرة خارجية وأخلي في البيت لان مرتين جوالي ينسرق لاحول ولاقوة الابالله
صراحة اللي يسرقوا مانقول الا الله يهديهم
وان شاءالله يشوفوا الحرامي ويأخذوا الفلوس منه ولكن اتصلي عليهم او خلي اخوكي يروح البنك لاتنتظروا يومين لاينسوا السالفة لابد لها من المتابعة وصحيح ليش ماتقول للشرطة عشان يضغطوا على البنك ويشوفوا صورة الحرامي عشان يتم القبض عليه

وطمنينا يانبراس اذا رجعلكم المبلغ من هذا الشخص اللي مانقول الا الله يهديه أو يهديها

مفروض بلغتو أمن المجمع بعدها شرطه والبنك
لأن مجمعات أغلبها فيها كاميرات اكيد اللي سرقتها طلعت متوتره
اواللي سحبت لفلوس يشوفون سياره اللي اركبتها موضوع سهل ينكشف بس تابعوه
والحمدلله ع سلامتك انتي وختك

ماتت ضماير الناس ، يخرب بيتك صرافات ناس ضعوف تاخذ منها فلوس !
الله لا يوفقه لا بدنيا ولا آخره

شئ طيب اذا تم التصوير من قبل الصرافه وان شاء الله مايكونوا ملثمين
تذكرت قصه لأحد الاقرباء اخذ قرض من بنك التسليف 30000 ريال المهم معاه ونيت اخذ ركاب 3 بشرتهم سوداء اخذوالمحفظه من جيبه وبالطبع الرقم السري على البطاقه سحبوا 5000 ريال واشتروا كاميرات تلفزيونيه من احدى المحلات بالبطاقه واشياء اخرى المهم كل الرصيد راح جابو صاحب المحل والبنك احضر الصوروكانو ملثمين في النهايه تعرف عليهم من الصور الموجوده بالشرطه وصلت معاملتهم للمحكمه واقسموا بالله انهم لم يقوموا بهذا الفعل وبناء عليه تم اخلاء سبيلهم مع انه متأكد انه هم من قاموا بسرقته ولازال يدفع اقساط بنك التسليف
والله هو المنتقم الجبار

حسبنا الله ونعم آلوكيل ..
كيف يسحبون من بطاقات آلضمآن آلآجتمآعي ..!
مآفكرو آنهآ فلوس نآس محتآجه ؟
وكيف يآكلون مآل حرآم ؟
لآحول ولآقوة آلآ بآلله .. ربي آلمنتقم آلجبآر ..
يآليت آنكم تبلغون آلشرطه ليتم آستخرآج آشرطة آلكآميرآت جميعآ ..
وآلله يردهآ لك يآرب