السلام عليكم ورحمة الله وبركاته
ماعليش رفعت موضوع يمكن قديم بس حسيت موضوعه مهم وقلت لازم ـافيد البنات فيه
خصوصا اني كنت بيوم من الايام ادور من يوجهني ويعطيني معلومات عن الإعادة والتقديم
أولاً طريقة التقديم
بالنسبه لي نزل إعلان في موقع الجامعة يخص كليتي وقدمت اونلاين واستدعوني للمقابلة وهذي غالباً هي الطريقة المعتمدة في كل الجامعات .
لكن بإمكانك تقدمين يدوي لسكرتيرة القسم اللي حابة تتوظفين فيه أو تتواصلين مع عميد الكلية بقسم الرجال-بالجامعات الناشئة غالباًـ
ثانياً متى قدمت ومتى تعينت !
هذي نكته
آنا سويت المقابلة وكنت حديثة تخرج في شعبان 1434 - استدعوني لإكمال اجرائات التعيين في شعبان 1435 وباشرت بعد 7 شهور في ربيع الاول 1436
يعني طولوا بالكم في الاجرائات قدمي وسوي اللي عليك ولا تربطين نفسك بهالوظيفة اذا حصلك تدرسي ماستر او تقدمين على وظائف ثانيه وتاخذي خبرة .
ثالثاً شروط التعيين
الجامعات موحده شروطها تقريباً اهم شي المعدل جيدجداً والعمر اقل من 30 وآن لايكون المتقدم موظفاً حكومياً في جهه آخرى
طبعاً انصحكم ترفقون مع شهاداتكم وخبراتكم درجة اختبار الانجليزي ايلتس او توفل ودرجة قدرات جامعيين ممكن يستخدموها بالمفاضلة ..
واذا تقدرون ترفقون قبول من جامعة خارجية بنفس القسم اللي بتقدمون عليه بتكون نقطة قوية لصالحكم خصوصاً ان المنافسة بتكون شديدة .
رابعاً العيوب والمميزات
الحمدلله الذي بنعمته تتم الصالحات
المميزات وظيفة مريحة ومرموقة ومكان مميز للتطوير العلمي وصقل الشخصية
العيوب نسبية من جامعة للأخرى لكنها بسيطة ويمكن تجاوزها
خامساً الواسطات ..
سمعت فيها كثير وعانيت منها في جامعات أخرى وبالعلن !!
لكن لو الوظيفة رزقك ومن نصيبك محد بيقدر ياخذه ولو اجتمعوا ضدك
وبالنسبة للقسم اللي انا فيه مافي احد توظف بالواسطة الحمدلله كله بمجهودهم وبشهادتهم
ساذساً الشروط في العقد فقط (( الابتعاث الخارجي )) وهذا شرط اساسي
سابعاً مهمات المعيدة
طبعاً حطي في بالك ان تعاملك بيكون مع بنات جامعيات قريبات من عمرك وهالشيء اسهل بكثير من المدارس
نصاب المعيدة يختلف من جامعة للثانية لكن يعتبر قليل بيكون تركيزك على جزء معين وسهل تبدعين فيه وتتقنينه
بالاضافة لعملك بالتدريس بيكون فيه عضوية للجان داخل الجامعة مثلاً لجنة النشاط / الاختبارات/ توصيف المقررات/النشاط الطلابي/ البحث العلمي ....... ،يختلف مسمياتها من جامعه للأخرى وفيها بيكون الشغل إداري بحت .
ختاماً الله يوفق الجميع انصحكم بتوسيع خياراتكم بالنسبة للجامعات تعمدوا تقدمون عالجامعات الناشئة فيها فرص القبول أكبر
لاتحصرون أنفسكم بقسم معين! قدموا على جميع الأقسام الممكنه .
وشكراً
05-05-2015, 07:16 PM
العرض المتطور
