تقدِّم الدنيا لنا درس ٍ جديد ابـ كل يوم
والناس تسْلم من غثا الدنيا بحفظ دروسها

وعلى حَسَب حفظ المواجيب وتَعَاليم السلوم
نعرف مقاسات البشر بالمرجله ونـقوسها

صيت الرجال الوافيّه بأفعالها وإلاّ الرخوم
ينبيك عنها : قل نفعتها وشين نفوسها

تطرد ورى الدنيا وتكشخ بالمواتر والهدوم
مثل ( الحريم ) أغلب دراهمها على ملبوسها

والإمَّعه والشايب الكذّاب وضعيف العزوم
ناس ٍ مع العالم بلا هيبه تدربي رُوسها

والبخل خلاّنه بهايم !! لا تسام ولا تسوم
لا شفتها ترْفع يدَك حمْدُ وشكر وتْبوسها

على الصحن ، هم أول الجلاّس وآخر من يقوم
يعيّفــك حلو الاكل والشرب .. طُول جلوسها

ماهيب لللازم سَنَد ولا ذُخُر عند اللزوم
تموت ما سرّك مهايطها وكُثْر فلوسها

وسوالف الخبلان رَفْعة ضغط وصْداع وهموم
فلاوة ٍ تخطف علوم العرب وتحوسها

واجب عليك إليا حكت ؛ عن جُمْلة احكاها تشُوم
الهند ما يرأس حكومتها سوى هِنْدوسها

وربع المصالح والمجامل خوة ٍ ما هيب دوم
اقولها والتجربه قطع وريدي موسها

وقت الرخا مثل الصقور اللي على المرقب تحوم
فيّ ٍ يذّري ساقك الرمضا وحر ّ شموسها

وإليا احتمت صكّات بقعا وامست علومك علوم
اتلوّي اخششها وتجحد خوّتك وتْدوسها

من عقب ما انت الطيّبُ وقَدْرك معزّز ومْحشوم
تصير أردى ما خلق ربي ودم ضروسها

أبعد عن الأشكال ذي .. بُعْد الثرى عن النجوم
وش حاجتك في قرب ردْيان العرب ونجوسها

ماهوب عيبٍ إليا اعزموك تْقول : "يالربع معزوم"
العيب لارحت لعزايمها وجيت اعُرُوسها

وخلّك فطين اتعلّمك دنْياك درس بكل يوم
والرجل يسْلم من غثا الدنيا بحفظ دروسها

قصيده فى قمة الروعه

طرحت فأبدعت

دمت ودام عطائك

صح لسآنك

مكتفي خيبه
جمميل جدا
صح الله لسان شاعرها
وتسلم يدين ناقلها

لاعدمناك