اللي تخصصه قانون يفيدنا جزاكم الله خير

انا بتخرج قريب . الله يوفقكم بالمقبولين ودي تفيدوني عن اختبار اللغه . ناس تقول 100 سوْال وناس تقول اختبار توفل خاص بالخطوط وكل واحد يقول شي . الله يوفقك اللى يرد على ابي معلومه بسيطه بس

بسم الله

اليوم ثاني تجربة لي بعد اختبار السنة الماضية
وأشوفها أفضل الحمدلله


المكان : الرياض
مركز الملك عبدالعزيز التاريخي
قاعة الملك عبدالعزيز للمحاضرات

بداية إجراءات الدخول الساعة 8:00ص
وزعونا ثلاثة صفوف عند الاستقبال , صفين لخريجي الداخل , وصف لخريجي برا المملكة !

تبرز صورة من المؤهل موضح فيه التخصص والمعدل + أصل بطاقة الأحوال ,, + للمبتعثين خطاب المعادلة ..

راح يمر المشرف على الطلاب يتأكد , ثم تتقدم للمشرف الثاني تعطيه أصل الهوية يسجل اسمك على الحاسب , ثم تاخذ قلم رصاص من الطاولة وتدخل القاعة , العملية جرت بسهولة وسلاسة أفضل من العام ..


تدخل القاعة
يوجهك المشرف للجلوس , بحيث يكون بينك وبين زميلك كرسي فاضي,
تجيك ورقة الحضور تسجل بياناتك , اسمك كامل بالعربي ورقم الهوية والتوقيع ورقم الجوال ..

الاختبار ما راح يبدأ حتى يدخل جميع الطلاب للقاعة ويسجلون الحضور بالورقة ..

ثم تبدأ تعليمات الاختبار
لازم تطفي جوالك وتنزل جميع أغراضك على الأرض محفظة , ساعة , الأوراق اللي معك , كل شي ينزل عالأرض ! وإلا راح تستبعد من الاختبار ؟!
( على كلام المشرف ان المتقدمين كثير , وبتوجيهات من الإدارة لازم يقلصون عدد المتقدمين قد ما يقدروا , فأي خطأ راح تسويه راح يستبعدونك بدون ما يشاورونك ).


استلمنا ورقة الإجابة
نفس طريقة اخبار قياس
عبارة عن ورقة واحدة من وجهين
وجه تسجل فيه اسمك ورقم الهوية وتضلل الخانات بعلامة " - " فقط
والوجه الثاني للإجابة


^^^
هذي كانت طقوس الدخول

&
يعطونك كراسة الأسئلة
بدينا الاختبار الساعة 9:32 ص
" الاختبار مدته ساعتين ,
الأسئلة فراغات اختيار من متعدد ,
الاختبار قسمين قسم القواعد 75 سؤال,
قسم الفوكابلوري (المفردات ) 75 سؤال ,
مجموع الأسئلة 150 سؤال ,
قسم القواعد سهل إلى متوسط المستوى , قسم المفردات متوسط المستوى ( بالنسبة لي ) "
ويبقى أفضل من العام لأنهم حذفوا قسم الاستماع والقراءة x Reading & Listening x

راح يبدأ الخروج على دفعات,
في الأول كان يقول بعد ساعة ونصف من بداية الاختبار ,
بعد ما راحت ساعة وعشرين دقيقة بدأ المشرف يصرف الطلاب على دفعات,

انتهيت وكان باقي 25 دقيقة ..
بدت الدفعة الثانية بالخروج ..
" طقوس الخروج "
أول شيء لا تنسى أغراضك اللي في الأرض , خذها بس لا تفتح جوالك,
سكر كراسة الاسئلة وخلي فوقها ورقة الإجابة على الوجه اللي فيه اسمك , جهز بطاقة الأحوال وقلم الرصاص

تقوم من مكانك وتصف مع الطلاب , إذا وصلت للطاولة الأولى وقف عندها وحط قلم الرصاص وانتظر إشارة المشرف
المشرف يقول لك تقدم , تعطيه كراسة الأسئلة وورقة الإجابة وبطاقتك
يتأكد من بياناتك , ثم تطلع ...

باب الخروج غير الدخول , بعد ما تعطي أوراقك للمشرف اطلع مع الباب اللي عنده وروح يسار مع الدرج ..

وصلت الساعة 7:30 وخلصت الساعة 11:15 تقريباً , فلذلك خذ احتياطك ..
وبالتوفيق ..


# الحضور اشوفه أقل من العام اتوقع حضر 150 طالب, العام اتوقع كانوا قريب 300 طالب ..
# على كلام المشرف الاختبارات راح تكون في الرياض + الشرقية + جدة + أبها ..
# الرد راح يجي للي اجتازوا بعد 3-4 أسابيع من الاختبار ..

# افطر مضبوط وجيب معك مويه لأنك حتطول شويتين ..
# حاول تكون في المواقف 7:45 ولاتنزل من السيارة إلا 7:58 عشان ما تسيح مع الحر ..
# اذا تحتاج دورة المياه اطلع قبل بداية الاختبار بعشر دقايق أثناء التحضير ( راح ياخذ الهوية حتى ترجع ) ..

موفقين يا شباب ..

الله يجزاك خير شرح مفصل ووافي