✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺

ويلاه يا بعض الرجاجيل ويلاه
راحت وعَـقب النار دايم رمادي

هذي عطايا اللي كثيره عطاياه
من يوم درو السيل شق البلادي

ما كل من عدا عن السيل عداه
ولا كل من صوّب على الصيد صادي

واللي رمى كلمه على غير معناه
مثل الطلق من بعد ضغط الزنادي

بعض البشر لا قال كلمه سمعناه
وبعض البشر ما نسمعه لو ينادي

وبعض البشر لو غاب لحظه فقدناه
وبعض البشر لو غابت سنين عادي

وبعض البشر لا راح عنّا لحقناه
لو بيننا وبينه ثمانين وادي

وبعض البشر لو ما قعدت انت واياه
ان قلت : وينك ؟ قال : بين الايادي

وبعض البشر في ساعة الفود نلقاه
وبعض البشر لا فادنا ولا استفادي

وبعض البشر مركى هل الطيب مركاه
وبعض البشر مركاه بين النوادي

وبعض البشر مسوي بربعه سواه
مثل سوايا اهل النجف بالرمادي

وبعض البشر دايم على الخير مسعاه
وبعض البشر مسعاده خبص العبادي

وبعض البشر ما يندرى وين ممشاه
مثل الفحل لا صار وقت الهدادي

وبعض البشر واللـــه لو يسرح بشاه
الا يغدي ولا يندرى وين غادي

وبعض البشر لو مات عايش بذكراه
وبعض البشر ذكراه وقت الحدادي

وبعض البشر عقب العزا بيوم ننساه
وبعض البشر نلبس عليه السوادي

وبعض البشر ما تنطق العيبه اشفاه
وبعض البشر العيب امر اعتيادي

وبعض البشر نص الدلو صعب يملاه
وبعض البشر محيط هندي و هادي

وبعض البشر ما يغيّر الوقت مبداه
وبعض البشر مـ يعرف معنى المبادي

وبعض البشر بين الحضر والبدو تاه
لا اهل الحضر عرفوه ولا اهل البوادي

وبعض البشر ما تدل وجهه من قفاه
ولا يلبس الا ثوب لونه رمادي

مذراه في وجهك واذا اقفيت مذراه
يضحكلك وكُرهه على الوجه بادي

وبعض البشر في سوق الاجواد تلقاه
ما يسوى قرش ونص حسب اعتقادي

وبعض البشر والله ووالله ووالله
لو ينشرى بمليون تشريه عادي

هذي هي افعال الزمان وسواياه
الدوني دوني والريادي ريادي

الكفو يلقى له خوي كفو يكفاه
والا الردي يزبن على كل حادي

المرجله والطيب والدين والجاه
جناد للي ما لقى له جنادي

✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺✺

ما كل من عدا عن السيل عداه
ولا كل من صوّب على الصيد صادي

واللي رمى كلمه على غير معناه
مثل الطلق من بعد ضغط الزنادي

الله الله
انشهد ،، صح الله بوحك ومنطوقك
وتسلم اياديك ع النقل الجميل

قصيده جميله بمعانيها

بانتظار جديدك ي راقي
احتراني لك…

عذرا ، تعديل الخطأ في البيت :

وبعض البشر دايم على الخير مسعاه
وبعض البشر مسعاه خبص العبادي