السلام عليكم ورحمة الله وبركاتة
كل عام وانتم بخير والله يتقبل منا ومنكم الصيام والقيام وصالح الأعمال .. أدخل بالموضوع
أنا شاب ذابحني التردد لدرجه الهلوسه وهذا الي حاصل معي عن جد وبدون مبالغه لدرجه أن الفكرة تجي براسي وتقعد شهر او شهرين وعقبها أمل من كثر التفكير وأنسى وعلى هالحال وبدون تطبيق..
أنا من الناس الي أحب أبدا من الصفر وما أحب الي يدخل مشروع يدخل براس مال من قرض أو اي شي فيه سله لان يمكن فيه خسارة وبعدين يتوهق بالقروض وبحقوق العالم .. على العموم
أنا كنت موظف في بنك سامبا وهو بنك ربوي بدون شك جلست عندهم سنتين وقبل شهرين وعن طريق الصدفه أكتشفت أن شغلي كله حرام بحرام وربا في ربا لان شغلي كله بالبطاقات الأئتمانيه..
جلست شهر أفكر وأفكر واأفكر وش أسوي بهالمصيبه يعني انا الحين عندي التزامات واعاون الوالد بهالدنيا يعني صعب أكون عاطل مثل باقي أخواني الي انا كبيرهم لدرجه انتشر الصلع براسي والفراغات من كثر التفكير الين قررت أقدم أستقاالتي لوجه الله وقلت الله كريم المهم .. قبل ما أستقيل بمدة شريت لي ددسن غماره جديد قلت عشان اذا استقلت أشتغل عليه ويمكن يكون فاتحه خي وبدايه لعهد جديد خالي من فلوس الحرام المهم السسياره مامشت معي الا 650 كيلو فقط وتوقف ويطلع فيها عيب مصنعي والحين هي بالورشه بالوكاله يصلحون فيها .. وبعد كل الي صار تحطمت حتى كل المشاريع والحماس الي كان براسي راح لدرجه أني أفكر أرجع للبنك وأكل حرام لين الله يفرجها ...... حبيت أفضفض فقط وأسف على الأطاله وهذي أول مشاركه لي في هالمنتدى الجميل الي اتابعه من أيام 2012

خل عندك قناعة ان تركك للبنك لله
والله يفرجها لك
وبعدين المشاريع كثيرة شوف ميولك وين وجرب ربما تضبط معك
والله يفتحها بوجهك

قاعده ربانية تحتاج الصبر والكفاح ( من ترك شيئاً لله عوضه خيراً منه ) .
الآن موسم التمور والرطب بأمكانك تبدأ البيع والشراء بالتمورب500 ريال وراح الله يفتح عليك
تشتري من الحراج جمله وتبيع بالحراج مفرق .
صدقني الكثير بالسوق مبسوطين وأغنياء من هذة التجارة البسيطه .

محدثك كنت شغال في مصرف الراجحي ومليت من قلة بركة الراتب
سنتين متحمل البنك مع العلم اني كنت ساكن واكل وراكب مجاني خالي من الديون والقروض ومع ذلك لا اجد اخر الشهر ما اطلع ملابسي من الغسال


قررررررت بعد سنتين استقيل ولله الحمد استقلت بدون اي رسم للمستقبل وجلست بالبيت سنه كاملة لا شغل ولا مشغلة
وبعدها ولله الحمد من وظيفة إلى وظيفة احسن منها حتى توظفت في قطاع حكومي وجتني الوظيفة الي كنت اتمناها ولله الحمد


نصيحة من مجرب دائما حتى لو يكن لديك اي عمل لا يذهب وقت في النوم في الصباح
لقول الرسول عليه الصلاة ((اللَّهُمَّ بَارِكْ لأُمَّتِي فِي بُكُورِهَا))

ولا تنسى ان الأرزاق توزع في الصباح

ومن يتق الله يجعل له مخرجا ويرزقه من حيث لايحتسب

إنه وعد رباني فابشر بالخير

مشكورين ككم ع الردود لاكن انا وضعي اصلا غير حنى مستاجرين بيت وعندنا سياره منتهي بالتمليك والوالد الوحيد الي ينزل له راتب تقاعد وانا كنت متوظف فقط وباقي اخواني نايمين بالبيت طبعا هم اصغر مني وانا شايل هم المستقبل كثير وما أبي أقعد بالبيت أكيد حتى لو ماحصلت وظيفه ما أبي أهلي يحسون اني استقلت عشان لا يتضايقون لاكن يمكن خيره والله ييسرها

لاتتردد ابد
ابحث عن مشروع مناسب لكم وتوكل على الله وابداء فيه
عندك مشروع التمور والخضرة والفقاسات هذي ماتحتاج الى راس مال كبير
لنفرض مشروع الفقاسات لو بديت فيه ولما يكون على ارض الواقع
ومقر المشروع مجاني تبني غرفه مخصصة لمشروع والغرفة ماتكلف كثير
طبعاً االمكان يكون قريب من الاستراحات ليش قريب لان الناس الي في الاستراحات راح تعرض عليهم خدماتك
بعد مايكون عندك لنفرض دجاج وبيض طبيعي تعمل اوراق فيها اعلانات لكم ورقم التواصل وتوزعها على اصحاب الاستراحات
وهم راح يطلبون منك واذا اطلبوا يمار انت وواحد من اخوانك تذبحون الدجاج وتعدونه لهم جاهز حتى تتميزون في خدمتكم وبعدين تتوسع وتضع قسم زغاليل الحمام ومن شخص لشخص ليما تشتهر وتجيك الارباح الكبيرة وتاخذ رخصة وتفتح شركة لدواجن وتتوسع اكثر وتضع لحم اغنام تباع في السوق ويصير لك فروع في السعوديه
ابحث بالنت عن مشروع الفقسات وزغاليل الحمام المشروع مناسب الحين وخاصة في الحرمناسب لتفقيس البيض بدون ماتشتري الآت تفقيس البيض
وبالتوفيق الله يرزقك حسن التوكل عليه حتى ماتعاني من التردد مرة ثانية واكثر من الاستغفار

من ترك لله شيا عوضه الله خيرا منه

والله ياخوي وضعك زين وشين في نفس الوقت

أول شي أذكرك "من ترك شيئا لله عوضه الله خيرا منه"

ثانياً .. الشي السيء هو انك بدون وظيفة .. أما الشي الزين هو أن عندك دافع علشان تشتغل وتفكر بمشروع يمكن يعوضك عن الوظيفة عشر أضعاف

أنا موظف ومعتمد على الراتب وحتى لو فكرت في مشروع اسحب عليه لأني معتمد على الراتب وهذا هو الشي السيء في الوظيفة


بالنسبة لك فيه أفكار ومشاريع كثيرة تحتاج تشغل مخك فيها

تقدر تعتمد على المشاريع اللي ما فيها راس مال مثل شغل الوسيط .. تدخل بمهاراتك بس في التواصل وتمشي مع العالم
ما أقصد العقار والسيارات بس .. فيه أمور كثيرة تقدر تدخل بدون راس مال بس انت شوف وش المهارات اللي عندك


عندي سؤالين أخيرة ..
1- في أي مدينة؟
2- كم معك مبلغ تقدر تسوي فيه مشروع؟ أو ما عندك أي مبلغ؟

أنا بالرياض عندي ددسن جديد غماره ومعي بالبنك يمكن 6500 واخر الشهرر بيجيني الحقوق يمكن تكون 10 الاف .. فكرة أبيع الددسن بيجيب تقريبا 4500 وأفتح فيها محل خضار بس اخاف أخسر وأكون خسرت السيارة وبيني وبينكم أنا يوم أتخرت قبل ما أستقيل ترددت كثير بس بعد الأستقاله أرتاح للدوام بس أقول بنفسي النفس تشتهي الحرام اكيد ب في الأيام الاخيره كرهت الدوام والي فيه بشكل مو طبيعي حتى إني سالت شيخ من دار الافتاء وقالي شغلك كله حرام بحرام لاكن اقعد فيه عبر فيه لين تحصل شي واطلع لاكن أنا عقب كلامه جتني ضيقه من الدوام كرهت الدوام والي فيه طابت نفسي يعني ف قلت بنفسي دام اني كرهته يمكن أنه خيره ويمكن هذا من الأستخاره ف قمت واستقلت عشان أني كرهت الدوام وبنفس الوقت فلوس حرام . .. ونا من يومها اصلا بالي مشغول مدري شسوي الله يعين بس