طيب واذا جاء الشتاء ؟ وش بيصير ؟
أبدا عندي لكم فكرة جهنمية . والله لو إني ولد لاسويها من بكرا ..

وشي الفكرة ؟؟

الفكرة طالت أعماركم هي كالتالي :

تعرفون سيارات الآيس كريم المتنقلة ؟ أكيد تعرفونها
طيب . في الشتاء تقل إنتاجيتها لدرجة إن بعض أصحابها يركنونها على جنب ( هذا ما قرأته في إحدى الصحف ) ! طيب بما إنه بيركنها على جنب . ليش ما تستأجرها أنت ؟
إيه أنت أخوي العاطل !
استأجر السيارة ، وتعال أعلمك وش تسوي فيها ..

.

في الشتاء يقل الطلب على الآيس كريم ومنتجاته . وأنت استأجرت السيارة بمبلغ بسيط . اذن ماعليك سوى استئجار عامل يجيد صنع ( القهوة بانواعها - والمشروبات الساخنة من ضمنها الشاي ) وكل اللي تحتاجه : عامل جيد ونشيط وسريع وضابط شغله + أكواب ورق بالجملة ماتكلفك شي + مكونات القهوة من نسكافيه وحليب وغيره . فقط .

طيب ؟؟
وش بعد ؟؟

أبدا ..

تعرف الناس وين يتجمعون بالشتاء ؟؟
أكيد تعرف لأنك شاب وأعلم مني . ! إذن شد حيك وتوكل على الله . مجموعة بسياراتهم الجديدة يسنترون في ( الثمامة ) . ومجموعة يسنترون في ( تنهات ) ومجموعة يدورون في ( بران الرياض ) الواسعة

اشترط لنجاح العمل النظافة ، يعني لما تستأجر السيارة نظفها تماما ، وياليت تغير من شكلها من برا ، يعني تحط ملصقات كوفي وقهوة وغيره ، وتبين انها سيارة مشروبات ساخنة وليست سيارة آيس كريم .

وعلى فكرة أنت ترى اللي بتسوق في السيارة - وانت اللي بتستلم الحساب من الزباين . وإن ماطلعت في اليوم الأول إيجار السيارة وعليه كم مية ، تراني ما أجيب العلم

دعواتكم ..