السلام عليكم ورحمة الله وبركاته
دائما اسمع ان نجاح المشروع بالتميز فية موب تكرارة..
ودائما في بالي هالفكرة لكن ماتنفع لي بما اني امراه\ان شاء الله تنفع الشباب
كثير من المحلات سواء السوبر ماركت او المصيدليات او المغاسل او بعض المطاعم او محل الاثاث او المكتبات ....الخ ماعندها خاصية توصيل طلبات ..وانا اشوفها مهمة في ظل انشغال رب الاسرة او بعضهم ماعندهم من يلبي طلباتهم.
الفكرة شرطها توفر السيارة والجوال وشراء بعذ الاغراض البسيطة جدا جدا ماتكلف 200 ريال
الكثير من العوائل كثير من الاوقات تحتاج اشياء لكن مافية من يوفرها لهم..بسبب عدم وجود الزوج بسبب شغلة او نسيو ماشرو هالغرض او فجاءة احتاجوه نقص بالبيت او الزوج مالة خلق يطلع ....الخ
اللي عنده سيارة وفاضي طول الوقت ينفع له هالمشروع ..يكتب رقمة ويوزعه على انه يوصل اي غرض تبغونه..وياحبذ يبتدي من الاماكن القريبة او انه يمسك له حي ويوزع رقمة عليهم.. طبعا يحتاج الى براد كبييير مشان المفرزنات والاشياء البارده ( براد اللي الاغلبية ياخذونه للبحر او الكشتات ويحطون فية المشروبات او اللحوم) اكبر حجم تشترية ويكون بالسيارة ومعة قالب ثلج..ومذكرة وقلم او حتى لو تسجل بالجوال ..رقم الزبون والطلب ورقم البيت ومتى يبغون هالغرض يكون جاهز اقصى حد متى. مشان لو صار طلبين او ثلاثة بنفس الوقت تقدر ترتب امورك وتودي هالغرض قبل الثاني لانه مستعجل .مشان ماتتاخر ويستغنون عنك .
وانتهينا
عندني قروبات يشتكون ان تنقصهم حاجات او ودهم يروحون المكتبة يشترون لاطفالهم كراريس او المعلمة طلبت شي فجاءة او الحرمة ما امداها تطبخ بسبب الشغل فتحتاج احد يجيب من المطعم او البوفية وخصوصا اذا كان مافية توصيل.. او ولدها مرض وحتاجت شي من الصيدلة ..او ماعندها وقت للكوي والغسيل وتبغى احد ياخذ الملابس للمغسلة ويرجعهم..ااو اسطوانه الغاز فضت فجاءة ...او احتاجت من السوبر ماركت هالغرض...الخ
اذكر قديما..رجل كان يجي للبيت اسبوعيا في يدة حقيبة وفيها ذهب..وكانت الوالدة تشتري منه وتوصية ان المرة الجاية جب معك هذا وهذا ..وبرضو كان بائع الزوالي والمفروشات يجي للاحياء ينادي..فالفكرة تشبة هذي لكن بدل ماتنادي عندك الجوال وممكن يدقون عليك ويكلمونك اي وقت .
يعني خدماتك في كل شي..والاعلان مايكون توصيل..لان بيفكرون توصيل مدارس او جامعات او او او او ...يكون معروف انه لكل شي .
ما ادري اذا الفكرة جديده او قديمة لكن حابتها لان فيها حركة طول الوقت ..وما اقدر انفذها ..مدام عندك سيارة وانت جالس جالس بالبيت ..ليش ماتنفذها.
اتمنى تفيد احد

فكره حلوة ويبي لها النشاط والحركه
فيها خير
وودي اسويها بس مفحالي اسوق ههههخ
الله يعطيك العافيه

فكرة جميله وماشيه الان مع الناس
اعرف واحد مقيم اعطاني دخل خيالي صراحه حسب الحبيب ابتاع كلو توصيل وطلبات
وعنده سياره جديده اخذها مني بقصد 5000 الاف شهرى ويعطيني افضل شخص ويقول لك نص ولى نص
وسدد خلال سنه واشهر
جدا جدا ناجح
والله يوفق الجميع

موفقين يارب

فيه كثير شغالين بتوصيل الطلبات بعضهم اتخذها دوام مسائي جزئي وبعضهم في وقت الفراغ.
و بعضهم افراد وبعضهم فتحوا مؤسسة
اذكر فيه مؤسسة كانوا يستقبلون طلبات التوصيل بنفس اليوم خلال ساعتين يجيبون طلبك, بعد فترة قصيرة من الزحمة وكثرة الطلب صار لازم تحجز قبل بيوم
بس المهم الصبر ثم الصبر للي بيشتغل بهذه الشغلة, ويحدد عمولة ثابته للتوصيل او حسب المشوار والمسافة

مشروع حلو و ماشي تمام ..

يا كثر ما ندور للي يوصلون

-

حلوة هالشغلة
اشتغلت فيها قبل 6 شهور
راس مالها شخص فاضي + سيارة
الطريقة ببساطه
تفتح حساب في انستقرام تسمية مثلا
مندوب طلبات جدة
تكتب تعرفين عنكك في البايو انك توصل مطاعم هدايا من الصيدلية من جرير من اي مكان
مثلا الرسوم 35 ثابته
كلمة بعض المعارف نشروا عن حسابي في حساباتهم ببلاش
و صرت اصور الطلبات و انزلها في هاشتاقات جدة و توصيل طلبات
و خلال اليوم الثاني جاني اول طلب
و خلال اسبوع و على بداية الاجازة اصحى من النوم الظهر القى شخصين او 3 مكلميني على الواتس
اتفق معاهم و البعض اعتذر منه اذا مايمديني
و ف الليل بعد 11 لابد يجيك وحدة تطلب اكل من مطعم
يعني في المتوسط في اليوم 4 طلبيات
و في فترة من كثر الضغط طلبات توصيل الهدايا كنت ااجلها بعدها ب يومين
و تركت حساب الانستقرام و اهملته بعد شهرين
و مع ذلك الزبائن الى الان كل يومين يجيني احد يبي توصيل
و الاغلب يطلب منك مرة و يرجع يطلب منك مرة ثانية
يعني خلاص يصير زبونك و يتعامل معاك
و اتفقت مع تاجرتين اوصل لهم طلباتهم

يعني لو الشخص يبدأ هالشي ب يضمن مصروف جيبه و ينعنش شوي

جميل

فكره حلووه
منجد احيانا نحتاج اشياء ناقصه ومانحصل من يجيبها لوقتها
مشرروع ناجح بس يبغاله صبرر وتحمل