السلام عليكم
يا شباب ابي استشيركم في شغلة مهمةجداً
منطلقاً من قوله صلى الله عليه وسلم(ما خاب من استشار)
انا حاصل على بكالوريوس حاسب الي
وحاليا موظف اداري في احداى الشركات بمسمى مبرمج حاسب وراتبي حدود 9 الآف واعتبرها مؤقتة لحد ما تجيني وظيفة ادارية من وزارة الخدمة المدنية

وجاني قبول مبدئي في وزارة الدفاع
مع العلم اني ما لي اي رغبة في العسكرية
وصراحة اجهل مميزات العسكرية ولا ادري ايش يتميز الضباط عن الافراد لان اللي اعرفهم كلهم افراد في العسكرية مافيه ولا ضابط وكلهم يقولون لي خليك بعيد عن العسكرية
انا ابي استشير اللي لهم معرفة بمميزات الضباط وخصوصاً اللي يعرف مميزات خريجي الحاسب
- الرواتب
- القطاعات التي يتم التوجيه لها
- العيوب
- هل الوظيفة بعد الدورة إدارية أو ميدانية

يعلم الله إني ما طلبت مشورتكم الا من حيرة في أمري
الحمدلله صليت استخارة واستشرت الوالدين وقالوا لي بكيفك هذا مستقبلك واختار اللي تبي

(انا عارف ان البعض بيقول احمد ربك جتك وظيفة احسن من غيرك ما حصل شي ... الحمدلله هذا من فضل ربي ثم من اجتهاد الشخص)

واسأل الله أن يرزق كل واحد بالوظيفة اللي يتمناها

الله يوفقك يارب اتشرف بالرد عليك لله يرزقك ما تتمناه والله ضابط هيبه ولها قيمه بالعمل والمجتمع كونك ضابط فهي كلمه الكل يتمناها

طبعا العسكريه بدايتها مثل الدوره يبي لها رجل يصبر خصوصا 45 يوم الاولى لانها تدريب مكثف لكن ما عمري قابلت احد فصل منها الصدق

ثاني شي بعد الدورات كامله انت تدخل اصلا ترمين براتب حول 5 الاف نص راتب الضابط يصرف لك مع تامين سكن وراتب شهري واعاشه وخدمات صحيه الين تتخرج بعد الدوره اللي هي فرد اساس 3 او 4 شهور الباقي عاد دراسه زي الكليه تاخذ حصص

الين تتخرج راتب الضابط اقل شي من 12 الى 14 حسب التخصص والبدلات اللي تصرف لك اثناء العمل لان كل تخصص لها بدلات خاصه فيه

ملازم اول زينه لاني سمعت ترقيات الضابط سريعه وماشيه يمديك باذن الله تكمل ماجستير ودكتوراه بالعلوم العسكريه اعرف كذا ضابط كمل وصار اللحين دكتور ضابط وبعضهم ياخذ دورات اركان بعد رتبه رائد ياخذونها


يعني انا اشوف ضابط وراتب حكومي زينه ياربي لك الحمد لله تقدر تاخذ قرض ولك مميزات كثيره

تخصصك حاسب اكيد تعيينك بيكون حول التخصص ذا نهايه الدوره يعلمونك وين التوجيه

العيوب كل مكان في عيبه هذا شي اكيد بس بالعمل الانسان يقدر يكون علاقات طيبه مع زملاءه واهم شي بالعمل الاحترام للنظام والزملاء

الضابط معناها قائد ضروري يكون ذكي وفهيم ومطبق للنظام والاوامر


ويجي ان شاء الله من يفيدك اكثرر

الله يوفقك باللي فية راح لك وخير

ياتي من يفيدك

اكيد وزارة الدفاع افضل لك من ناحية مادية .

ولكن الخدمة المدنية جدارة تاخذ المرتبة السابعة + 25% بدل حاسب

الوظيفة الحكومية اكثر راحة وتقدر تشتغل قريب اهلك ولكن اقل كراتب بكثير من راتب ضابط بوزارة الدفاع .

العسكرية طيبة ولكن خذ في بالك انك ممكن تتعين في اي مكان ف السعودية اذا عندك قابلية انك تتعين في اي مكان فأتجه للعسكرية .

ومثل ماقال احد الاخوان , العسكرية في البداية تحتاج صبر وتحمل . وبما انك جامعي ف راح تمارس تخصصك وماراح يكون لك

اي علاقة بالميدان .

ضابط في وزارة الدفاع وظيفة حكومية ولها مميزات
أفضل من عمل الشركات المتعبه

روح وزارة الدفاع وانت مغمض عينك بتوفيق لك

لو كانت الكليه الامنيه صح اقولك تفرق لاكن وزاره الدفاع !!
وزاره الدفاع دوره 9 شهور بعدها تتعين باي قطاع بالقوات رواتبهم قليله ماعندهم بدلات ماتتجاوز 9 الالف اول تعيين
الخدمه المدنيه راتبهم 7000 وبدل حاسب 25٪
يعني راتب الخدمه والدفاع قريبه من بعض
وانت عليك تختار الحريه ولا التقيد والتامر عليك

اذا لك نيه اخوك بالعكسرية انصحك تقدم على الكليه الامنية وتتخرج ضابط افضل لك من الدفاع


وبالنسبة للضباط ترى هيبه ويكفي انك تستلم افضل راتب