السلام عليكم ورحمة الله
وكل عام والجميع بالف الخير
وعساكم من عواده

بدخل ف الموضوع دايركت الكثير منا يتردد لمن يقدم على شي ويكون خايف بالذات التجارة او بمعنى اصح الامور اللي تحتاج راس مال وقابله للخسارة او الربح في البداية وهذا الشي بتوفيق الله سبحانه اخوكم شاب ابلغ من العمر 28 لسه ماتزوجت وللاسف السنين اللي مضت ماستفدت منها في شي يفيدني ويكون لي دخل ثاني غير الوظيفه ولكن الحمد لله على كل بعض الاحين اطرح لكم مواضيع هنا ع انه في مشروع وكذا وبعدها انكسل لاسباب ياخوف ياتردد ياعدم اقتناع والخ ولكن هذي المرة بديت افكر في مستقبلي بجدية وبمعنى اوضح في مستقبل اسرتي في المستقبل اذا الله عطانا وعطاكم العمر طول الايام الماضية كل مااطلع في السيارة افكر كثير مع نفسي ليش مااشتغل واغامر حتى لو سخرت ومن هذا القبيل وبصراحة وللاسف انا فيني تردد عجيب وحرص بس بعض الاحيان هالحرص على غير سنع انا باذن الله وهالمرة جازم وبقوة ماعد فيها كلام بفتح مطعم اندونيسي وحصلت لي عمال في اندونيسيا ممتازين جدا وحريفين وحصلت ايضا عامل يمني ممتاز جدا واعرفه زين كمحاسب ومشرف ع العمال والمحلات بحاو استاجر فتحتين ان حصلت السعر مناسب حتى يكون في مجال يصير المطعم عوايل وافراد وان ماحصل بخليه في البداية افراد فقط وبحاول اخلي شخص ممتخصص يجيب الطلبات لاصحاب السيارات من برا لاكن اكثرنا مايبي ينزل من السيارة يعلم الله اني صامل ومتحمس والشي اللي خلاني ارتاح اكثر ان العمال حصلتهم وراح اطلع بنفسي اختارهم من اندونسياوبحاول اختار وجبات غير موجود في المكان اللي انا فيه بالنسبة للديكور بتعب فيه وبسوي شي محترم طالما انا خسران ع الاقل اخسر في شي يستاهل انا ببدا باذن الله في التأشيرات من الاسبع القادم بس عندي مجموعة استفسارات وابي تفيدوني لاهنتم

1- لايوجد عندي سجل تجاري ولاعامل باسمي واحتاج ع الاقل الى 5 تاشيرات من اندونيسيا.

2- العامل اليماني المحاسب عشان انقل كفالته علي لازم ادفع 8000 هل ادفعها انا او هو يدفعها

3- هل تنصحوني افتح عوايل بالبداية بس راح تحتاج مني مبلغ زيادة لاني بستاجر فتحتين او اخليها افراد فقط مبدئيا حتى اتوسع

4- تنصحوني بالتوصيل بالسيارة يعني اذا الطلب من 50 وفوق توصيل مجانا

5- عقد ايجار المحلات هل استاجره لمدة خمس سنوات مثلا والا اخليه سنوي يتجدد كل سنه

6- المحاسب او الكاشير كم يستاهل راتب والعمال ايضا

باذن الله اكتب الموضوع الجاي مع صور المحل شجعوني

ما شاء الله .. هذا الموضوع اللي يفتح النفس ..

طبعاً عندنا بالسعودية شعبها مستهلك ..
يعني أي مشروع قابل للنجاح بإذن الله إذا اكتملت أركانه:

1 موقع
2 ديكور
3 منتج
4 إدارة

إنت حضرتك أنجزت مرحلتين مهمة بل الأهم ..
باقي المنتج من ناحية السعر والجودة
وباقي إدارتك للعمل من حيث الهوية وطريقة العرض والتقديم
وإدارة العمال بمتابعة حركة المبيعات ..

لمن تبدا بالتنفيذ راح ينفتح لك الخير وتخطر على بالك أفكار عملية
تساعدك على المعرفة والتطوير ونتيجتها إن شاء الله إفتتاح فروع ..

خل يكون لك راتب محدد من الدخل ..
وتدوّر الفلوس في التطوير والتوسع .. بكذا تصير تاجر ..

وأطيب التمنيات لك بالنجاح في مجال البزنز ..

الله يسعدك
موضوع التاشيرات اصعب مما تتصور
انا عندي مطاعم
ماانصحك بالاندونيسي ولا العوايل
ولو حاب افيدك اكثر كلمني خاص

امممممممممممممم
والله اني متعاطف معاك الى اخر نقطه واتمنى فعلا لك النجاااااااااااح

لكن مشروعك اذا ماعندك فيه خبره سابقه ماانصحك فيه
ومشروعك كبير وجبار وراس ماله عالي خاصه اليكورات والايجار فلو حصل لاسمح الله خساره طريق الرجعه صعب
واكبر عائق هو الفيز

ماكان ودي اخليك تتردد بس ادرس الموضوع اكثر

مشروع المطاعم مربح
واهم شي النظافة + الاسعار +الشغل المميز
واجل فكرة قسم العوائل الين يوقف المشروع
واستخر وادرس المشروع زين وتوكل على الله
بالتوفيق

العفو ..

للمعلومية: كنت بأنبهك لموضوع الفيز ..
لكن توقعت أغلب الردرد راح تكون عن الفيز ..

الفيز فيها بعض التعقيد لأنها مرتبطة بمساحة المطعم والسعودة ..
حتى تحد الدولة من ظاهرة بيع الفيز ..

وإنت ما شاء الله عليك اللهم لا حسد شخص متردد ..

صعوبة إجراءات + تردد
هذه هي الخلطة السرية لعدم عمل أي مشروع ..

إنت حضرتك وضحت هذا بكلامك عن نفسك أولاً ثم عن رغبتك ثم عن المشروع ..

كل اللي تحتاجه دفعة بسيطة تحركك من مكانك الحالي ..

وهذا ما عملته أنا .. وخليني أجيبها لك بطريقة ثانية:

نفذ ثم اعترض ..

بالتوفيق ..