أنا توظفت ولله الحمد قبل 3 سنوات
ما عرفت القطاع الي تعينت فيه والمدرسة إلا قبل الدوام بيوم
اليوم الخميس الساعة 11 في الليل جتني رسالة التوجيه
دخلت النت طبعت الورقة والدوام السبت (أيام زمان)
يعني ماعندي فرصة إلا يوم الجمعة عشان أجهز وضعي
بس الحمد لله كان القطاع يبعد عني 100 كيلو
لكن نصيحتي لكم لازم تعرف مكان المدرسة من بدري
مهو أول دوام لك تدور على المدرسة
تجي الساعة 8 ما تلقى أحد بالمدرسة يوقعلك على خطاب التوجيه
لأنهم في الاسبوع الأول يوقعون بدفتر الدوام ويمشون
وخطاب التوجيه لازم من أول يوم توقعه من المدير وترجعه لإدارة التعليم يحطونه بملفك
لأنك ما تعتبر موظف رسمياً إلا من أول يوم باشرت فيه في المدرسة.
وأول ماتوصل للمدرسة وقع بدفتر الدوام لا تنتظر أحد يقولك وقع
لا تصيرون مثلي وصلت للمدرسة أول واحد وجلست أطالع بالرايح والجاي
والمدرسين والمدير يوقعون ولا أحد سألني أنت مين
وش تبي؟!
يمكن يحسبوني ولي أمر طالب ؟!
بعدين المدير حط خط باللون الأحمر تحت الأسماء يعني خلاص انتهى وقت التوقيع
واخوكم جالس على الكرسي لا وقع ولا شي
بعد ما عطيت المدير ورقة التوجيه قالي ليش ما وقعت؟!
قلت مادريت.. قال وقع .. ووقعت تحت الخط الأحمر
أخذت ورقة التوجيه وبعد نهاية الدوام وديتها لإدارة التعليم.
الي يبي ينشدني عن أي شي في التعليم والمدارس لا يرده شي
وأهلاً بكم في عالم التدريس.
05-08-2015, 02:47 PM
العرض العادي
