السلام عليكم ورحمة الله وبركاته

اخواني الكرام سلام الله عليكم كلن باسمه الحمد لله علي كل شي واهم شي اني جربت بتجارة والله ماكتبها لي واقول ان شاء الله خيرة والحمد لله علي كل حال

المشروع انا صاحب الفكرة والمنفذ للمشروع ودخل معي ٣ شركاء براس مال ١٢٥ الف وزدناها حوالي ١٠٠ بعد سنتين تقربيبا ٦٠٠ الف المشروع هو صاله رياضية بمدينه حايل تحتوي علي ثلاث لعبات اثقال وتمارين رياضية وجودو طبعا علي حسب نظام رعاية الشباب وهذي شروطهم حتي تفتح مساج وحمام مغربي وبخار وساونا سويناها كلها وكلفنا المبني المستاجر ١٢٠الف بالسنه وكانت مساحته كبيرة وعلي شارع حيوي ولكن المشكله كلها من رعاية الشباب حسبي الله ونعم الوكيل عقدونا بالاجراءات الله لايوفق من اخرنا
تصدقون بالله العظيم جلست الرخصه سنه ونص عشان تخلص كله مماطله من رعاية الشباب الله لايجزاهم خير وخلص الرخصة بشهر ٣ السنه هذي وثلاث شهور عشان تجي موافقه العمال بعد مطالبات ولكن يافرحه ماتمت اخذنا التاشيرات طبعا التاشيرات من رعايه الشباب موجهه الي مكتب العمل اعطونا ١٢ عامل ٥ فني مساج و٢ مدربين تمارين رياضيه و٢ مدربين حديد و٢ عمال نظافه ولكن المشكلة الكبيره التي واجهناها هي التأييد الاكتروني يرسل من رعاية الشباب الي مكتب العمل وعند طلب العمال من موقع الوزارة ترجع طلباتنا مرفوضه لعدم وجود تاييد اكتروني من رعاية الشباب وراجعنا مكتب رعاية الشباب ويقولون انهم مرسلين التاييد ولا عندنا لكم شي وصارت مشكلتنا العماله للان معاملتنا واقفه واقف الرزق عنهم انشاء الله

حالينا لنا سنتين لا اشتغل المحل ولا نقدر نكمل كل الي معانا حطيناه بالمحل والايجار باقي له كم يوم ويحل علينا ٦٠ الف والله يعين

المهم المحل للايجار او للبيع الي له خاطر يجيب عمالة ويشتغل كل شي بالمحل جاهز حتي المناديل موجوده

انا لله وانا الية راجعون ولا حول ولاقوه الا بالله العلي العظيم

الرخص وماادراك ماالرخص
الموظفين بالدوائر الحكومية يتأففون من المراجعين والمعاملات
وكل موظف يقول عند الثاني وكل قسم وادارة يقولون عند القسم والادارة الثانية وكل وزارة تقول عند الوزارة الثانية والمواطن يضيع
لو كل واحد منهم استشعر فقط ان كل يوم تقعد فيه المعاملة عنده فيه انسان يخسر بهذه الاثناء
كل يوم تقعد فيه المعاملة عنده يعني ان الخسارة مستمرة لصاحبها بسببه
يمكن يتغير الوضع الا ان كان الموظف لايخاف الله
كثير مشاريع قفلت من بدايتها بسبب اجراءات التراخيص الطويلة والاجراءات الرسمية , تجيها السنة الجديدة وهي مالحقت تشتغل وتحقق دخل

حاول تاخذ خطاب او برنت من رعاية الشباب وتوديه لمكتب العمل
او تشوف لك معقب اذا كان ينفع يخلصها لكم
واخيرا انتم 3 شباب ماشاء الله شركاء ماتقدرون تشغلون النادي؟
ليش تضطرون للعمالة
ولااطلبوا سعوديين دوام مسائي يجونكم كثير منها يتمرنون ومنها يشتغلون
فكر بحل خارج الصندوق مو تعتمد ياعمالة يايقفل المشروع
الان انشر اعلان بالواتساب وتويتر والسنابتشات وعلق اعلان على المقر نفسه وتوكل على الله وشوف كيف ربك ييسرها
ممكن ماتلقى كل احتياجك من التخصصات بس مشي الوضع مو لازم يشتغل كل النادي بالكامل بس احسن من انه يوقف بالكامل

اي مشروع ايا كان نشاطه اذا يعتمد على العمالة لازم يحط صاحبة نسبة فشل كبيرة له
لان الانظمة والقرارات الان ناحية الاستقدام صارت صعبه , لذلك حاولوا توظفون سعوديين ولاتعتمدون على الاستقدام
والله يوفق الجميع

لاحول ولا قوة الا بالله
وش ذا التعقيد
و يقولون نبغى شباب الوطن يشتغلون

بس اعجبتني سالفة المناديل هههه بالتوفيق اخوي

وانت على طول تستسلم
دبر عمال من اي مكان فيه شركات تدعمك بالعمالة اذا تبغى نظامي حتى يجون عمالك
او جب من الشارع البلد فوضة في فوضة
بس وقف على شغلك

واذا جاء مراقبة طلع لهم الاوراق وانك في طور استخراج الرخص ومن شهر الى شهر حتى تنتهي
كذا الناس تشتغل
اجل بعد ال 600 الف اسلمه اجنبي يلعب فيه او ابيعه بربع تكلفته ؟
اصبر اخي الموضوع يحتاج صبر وجلادة
لا تستسلم وخش في عيون رعاية الشباب اجلس عندهم في الدوام من يوم يفتوحون الى قرب العصر قل انا خسران في مشروعي ومديون لناس
واستقعد لهم حط الموضوع براسك واصمل لابوهم لابو من جمعهم
اعتبرها حياة او موت لا تفرط في ريال خسرته علشان الانظمة التي تخدم الاجنبي

عسى الله يعوضكم خير
للاسف حايل ديرة حسد هذي حقيقة
يبغى الواحد يترزق الله غربلوبه
التجار الكبار ماشية امورهم ومسهل لهم كل شي
حسبي الله عليهم
انا من رايي تعرض الصاله على التجار الكبار يستاجرونها منك
تعلق لوحه على واجهة المبنى مكتوب فيها الصاله للايجار او للبيع
ولاحول ولاقوة الا بالله
او انك تغير نشاط المشروع اذا امكن وهذا صعب اكيد

لا حول ولا قوة الا بالله

انا اشوف انك تقعد على راسهم يوميا من الجهتين + تروح ترفع قضية عليهم في ديوان المظالم ما يصير تروح فلوسك كذا بلوشي

الله يكون في عونكم ويسهل أموركم

والشباب ما قصروا بالردود والأخ المردف عطاك الزبدة، وسو شكوى على الموظفين المسؤولين عن التأييد الإلكتروني، وخذ منهم خطاب يفيد إنجاز الـتاييد إذا قالوا سويناه، الزمهم بشيء يثبت ووصله لمكتب العمل ووثق رد مكتب العمل والله حرام يروح تعبكم على الفاضي ولا تسكتون على حقكم أبدا

ابشرلك بحل يبرد الكبد،


سجل مقطع فديو لك بأسمك ورقم جوالك، يحتوي ملخص معاناتك ودعمه بالأسماء والتواريخ والأرقام وتحرى الدقة والمصداقية ووجهه للمقام السامي "الملك، ولي عهده، وولي ولي العهد كلهم جميعآ" وانشر المقطع في قروبات الواتس اب،

وعط االموضوع شهر، والله يرعاية الشباب لتنقلب راس على عقب، خل ابو فهد يرثع فيهم زين

ولاتنساني من دعاك

يا خسارة حايل تحتاج مثل هالمشاريع البيروقراطية تقتل حماس المواطن انه يفتح مشروع
الله يوفقك اخوي ويعوضك خير