والله شوفي ياختي بالنسبة للي اليوم مو كل الاشخاص حضروا, كثير ما حضروا اليوم, وغير عن اللي اساسا جاي ولا سوى كويس بالمقابلة اليوم, يعني اتوقع اذا فيه احد انقبل معي اليوم ما يجون ولا اثنين, حتى انا ما اتوقع اني منهم, انتي سوي اللي عليك اختي ووكلي الله والله يوفقك, وهذي نصايح مني لكل شخص يبي يسوي المقابلة ان شاء الله الاسبوع الجاي:
اولا: بالنسبة للسؤال الاول تكلم لي عن نفسك: هنا طبعا مو طالبين سرد حياتك كلها, لا قولوا المنجزات حقتكم, يعني الخبرات بشكل مختصر, اي اعمال تطوعية سابقة, شهاداتك كاملة واسم التخصص, واي معلومة تشوف انها تدعم موقفك, بس لا تسرد اي شي ثاني ماله علاقة او تتكلم عن تفاصيل شاطحة.
ثانيا: السؤال الثاني راح يكون تكلم لي عن البرنامج وايش تعرف عنه: انا هنا خبصت صراحة شوي لأني تكلمت عن الهئية وهو عدل لي وقالي لا اقصد البرنامج, طبعا هنا اقروا عن البرنامج حاولوا تكتبون ملخص تحفظونه وتقدرون بعد تبحثون عن برامج ممثاله بدول ثانية او تجارب سوتها دول ثانية, وتقدرون تتكلمون عن المهمات المناطة بالبرنامج هذا ومهامه واهدافه واسم المنظمة اللي بتشغله والكلام هذا كله موجود بالملخص اللي هم راسلينه.
ثالثا: السؤال الثالث عن ليش اخترت البرنامج: هنا طبعا تقدرون تتكلمون عن اهتمامكم بالعمل التطوعي وانها مهمة انسانية سمية وايش راح تضيف لك ولحياتك, وبرضوا تقدر تتكلم عن الحروب والمشاكل اللي حوالينا وودك تكون طرف بالحل هنا بالتدخل فيها بطريقة انسانية, يعني اي شي بتعبيرك الخاص, اهم شي يكون الجواب مبين انك فاهم وقاري بالضبط وشو البرنامج عنه اساسا.
رابعا: السؤال الرابع عبارة عن اعمالك التطوعية: اذا عندك خبرة تقدر تقولها اذا ماعندك ممكن تتكلم عن خططك في ايش ودك تسوي بعد البرنامج هذا او خلاله وايش راح تستفيد منه عشان تطبقه في حياتك بعدين, وطبعا تقدر تحط عذر ليش انت ماسويت اول, هل لأن مافيه لجان حكومية تدعم الشي هذا او لغيابها عن المجتمع ومن الكلام هذا, بس طبعا لا تدافع كثير لأنها راح تضرك ووممكن يقولك ليش ما بادرت طيب؟ وهنا تتحجر, فا حاول توجر ولا تطول بالجواب.
خامسا: هذا سؤال راح يكون يا عن اللستة حقت التعريفات, او سؤال عن شي جا بباله ويبي يسألك اياه او سؤال عن تخصصك وايش راح يفيدهم فيه, طبعا هنا دورك عاد بالتحضير.
سادسا: سؤال شاطح جاني انا قالي مين تشجع وقلت الهلال وقلبوها طقطقة علي
وصار ضحك وسعة صدر.
المهم اللجنة النفسية هنا زي ما قلت فوق اسئلتهم راح تكون هل انت عصبي؟ هل فيك خفقان؟ هل تؤمن بالحاسة السادسة؟ هل تبكي بدون سبب؟ هل تسمع اصوات ناس او تشوف شي الاخرين ما يشوفونه؟ طبعا للعلم هذي ما اضمن لكم وش يسألونكم عنه لأن تقريبا كل اللي قبلي سألوهم شي غير, ولاحظت انهم يسألون على مظهر الشخص, انا اليوم رايح هناك ومقفله اخلاقي بسبب التأخير واللطعة وباين اني داخل وانا مالي خلق فا عشان كذا سألوني مرتين هل انت عصبي
.. وبالنسبة للوصف ان شاء الله بنزله لكم قريب بس بتأكد من اسهل طريق عشان ما احد يضيع ويدعي علي.
ولكل اللي دعوا لي اقولهم آمين ولكم اضعاف مضعافة يارب العالمين.
23-10-2015, 03:35 AM
العرض العادي
