السلام عليكم ورحمة الله وبركاته

ي اخوان انا في حيره من امري وابيكم تشورون عليه

انا معي شهادة دبلوم تمريض دراسة سنتين ونصف

ولي اليوم ثﻻث سنوات عاطل والعطاله شينه

وقدمت على الحرس الوطني والحمد لله سلمت ملفي

عطوني رتبة عريف تخصص الطبابه

كتيبة مكافحة الشغب 93 في الطائف

في لواء عمر بن الخطاب رضي الله عنه

وعندي زيادة 25% وحالياً منتظر الدوره

المهم كل ما دخلت موضوع او سئلت شخص

يقول لي ابعد عن العسكرية شينه ووجع رأس

والبعض يمدح ويقول تخصصك مريح وراتب عالي

ويعطونك سكن و تامين طبي ودوام عيادات او مستشفى

واﻻن محتار اكمل معهم وادخل الدوره او انتظر تعيبن وزارة الصحه

ف رجاءً اخواني الجميع يفيدني باللي يعرفه وانصحوني

وشكراً لكم جميعاً والله يقدم الخير لي وللجميع ويسهل اﻻمور...

مثل ما قلت يا اخوي العطاله شينه وهذا انت تميت ثلاث سنين عاطل
والعمر مره وحده وعمر الانسان يمشي ومو منتظرك لين تتوظف
وكل ما زاد العمر قلّت فرص التوظيف
استخر ، واللي يقول العسكريه مب زينه قل له وضفني وتعال قل هالكلام
الناس مكبرين الموضوع والعسكريه صعبه وتعب وإلخ.. وبعض التخصصات فيها والله انها أطلق من المدني راتب وراحه وتعيين وكل شيء
الشعب كله داخل عسكريه وعايشين حياتهم ، ولانه مو بكيفهم ما راحو مدنيين وعلى قوله المثل "تجري الرياح بما لا تشتهي السُفن"
ومن رايي هالفرصه لا تضيعها ، توكل على الله اذا انت مرتاح نفسياً
وفقك الله ويّسر امرك

صراحه العسكريه رواتبها للصحيين صارت زينه عريف صحي راتبه 14 الف بالمدنيه تعيين بمكان بعيد يحطونك ويمكن بهجره وتاخذ 8 الاف اكيد 14 الف افضل انت مداوم مداوم بالنهايه سواء مدني او عسكري العمل تعرف كلن يزبط اموره مع اخوياه بالعمل وتزين اموره باذن ربي ... ادخل عسكريه صدقني الراتب الزين يخليك تتحملها بسهوله وبعد كم سنه باذن الله عادي تقدر تقدم مدني اذا تبي عندي اكثر من صديق عسكري صحي والله انه مرتاح ومروق باله ولا يفكر بالمدنيه خير شر

وعسى ربي يووفقك

استخير ياصاحبي في الأمور كلها

والله يكتب الخير للجميع

هذا انت قلتها العطاله شينها

العمر يمشي وكل ماتقدمت بالعمر قلت الوظائف

توكل على الله ولا يهمك كلام الناس اكثر اللي يتكلم عن العسكريه

ماجربهها يعطيك كلام من راسه

الله يوفقكك

استخر وتوكل على الله

رواتب العسكريين الصحيين جداً ممتازة

وإذا انت من اهل الطائف وتعيينك بالطائف افضل من ممتازة

وعلى فكرة جاري العمل على انشاء مدينة طبية للحرس الوطني بالطائف

يارجال روح وتوكل على الله غيرك مالقاها وماتدري بكرة وش يصير يمكن تنزل قرارات تغير رواتب العسكرية
وخللك شخص إيجابي وهدا المطلوب بالعسكرية

رواح تسمع كلام من العسكر المنفسين وش تبي بالعسكرية
قولهم على شحم

الي نصحك او قالك متعبه ماعنده خبره في الحياه
نصيحتي لا تاخذ نصيحتك من قليل الخبره او من اي شخص
ولا تفكر ان الوظائف المدنيه مفروشه بالورد بالعكس فيها ظلم ومحسوبيه اضعاف العسكريه
على الاقل العسكريه كل الروس سواسيه
توكل على الله واستلم وظيفتك

الله يسعدكم جميعاً ردودكم تشرح الخاطر

ان شاءالله بستمر معهم والله يوفق الجميع

رواتبهم صراحة تغري هههههههههههههههههه

على كﻻم رائد يقول لي راتبك بيكون حول 14 الف

الله يسهل اﻻمور وتجي الدوره على خير

انت قلتها العطاله شينه وهذا رزقك وجاك
والله لو تجيك وظيفه وزير الناس راح تتكلم
انت ماعليك ادخل دامها جتك وبالتوفيق