السلام عليكم و رحمة الله و بركاته

أخواني أنا قررت أترك الخدمة العسكرية و الحمد لله على كل حال

أعمل بحرس الحدود و ( خدمتي 3 سنوات و 8 شهور )
و رتبتي الحالية ( جندي اول )
بفضل الله سبحانه منذ صدور قرار تعييني إلى لحظة كتابتي للموضوع
لم يسجل عليّ غياب أو مجالس عسكرية و قد يستغرب البعض حين أقول
لم أتجازا ولا مرة وحدة بحياتي و لا حتى ساعتين ! كنت منضبط بشكل
لا يعقل ههههههه
شطحت بعيد مررررره عن أستفساري
أنا أرغب بالفصل و أنهاء خدمتي و إخلاء طرفي
و الله حتى لو في حقوق مثلا أستحقها ما أبيها أبي بسسسس
أفصل بأسرع وقت و لا أبي العسكرية أبدا أبدا أبي أخلص
و حتى المهنه يبدلونها لو يحطونها عفريت أو جني و الله أبي أخلص

بالله عليكم ساعدوني و دلوني لا يجي واحد و يقول غب 7 أيام
أنا ابي اخلص اموري بسرعه بالله عطوني الحلول

و الله يوفقكم جميعا لما يحب و يرضى

اخوي مافي فصل نظامي الا بشرط خدمة اربع سنين وفوق
ثم ترى الغياب هو اسرع وسيلة للفصل ؟
وانصحك بالتريث وان تبقى بعملك .. وليت تقول لنا الاسباب الي
تبي تفصل عشانها

لازم تكمل 4 سنوات

هل انت محصل وظيفه اخرى مثل شركه

ولا مللت وبتفصل

فكر قبل لاتتخذ اي قرار

اخوي

معقوله تفصل من الحرس الحدود

ش الي غيرك


لا تستعجل لا تستعجل لا تستعجل

حاول تشوفلك ناس تتفاهم معاهم


الفصل وانا اخوك ب الطريقه مو زينه

يعني أقل من أربع سنوات ما فيه فصل نظامي
طيب أخاف اغيب و ما يدوني بعدين اخلاء طرف
او بيأخروني و يمرمطوني .

بنسبة للاسباب كثيرة و منها /
بعضهم يهينك
و كمان تراه جهد و ارهاق
و ما فيه تقدير
و اهلي بعيدين عني و النقل حلم ابليس بالجنة
و اسباب شخصية .
و مستقبل الفرد ضياع من راتب تقاعدي و حقوق

بعدين انا فكرت قلت هذا الوقت اللي اقضيه
بالعمل يوصل بشهور و الغربة
و الجهد الجبار و التعب و السهر
لوووو استثمره بشيء ثاني كان انتجت

و صدقوني ماني محصل وظيفة ثانيه
و تعليمي ثانوي ... اساسا حتى ابوي
تقاعده قرب و راح نتورط بالبيت لو فصلت
لكن ثقتي بالله كبيره !

و ما فيه ناس تفهم المجتمع العسكري
مجتمع سيء مصالح و بعضهم متخلفين
و احقاد اساسا العسكريه هي كذا بكل مكان

و انا فكرت و فكرت بسسس بقي
لي تكه و اسسسحب عليهم

امسسس كلمة امي و فاجئتها
و ردت فعلها كانت عادية بسسس
حسيت من كلامهغ انو انت المسؤول
عن قرارك و بكيفك و تحمل نتايجه

و بسسسس

استخير ياخوك وشاور من هم أقرب منك
وحاول تدور لك دقيش في أي قطاع اخر يمكن تتحسن نفسيتك
واذا انت عزوبي تزوج وصدقني بتستقر نفسيتك أهم شيء دور لك حرمة سنعة

وبخصوص الفصل راح يتعبك بعدين راح تدهور حالتك المادية

وانصحك كمل الجامعة لو انتساب

واخيرا
فكر ثم فكر ثم فكر

ياخوك كلنا نكرف ومابعد الكرف الا راحه
نصيحة اخ امسك وظيفتك ياما فيه بنات متغربات
مو رجال وانت ماعليك ربك ييسرها خلك في وظيفتك
وادرس جامعه عن بعد ممكن تترقى والله ياخوك الحين الوظيفه الواحد يدورها
هذي راتب ثابت على الاقل ادخلك في مشروع اضمن نفسك مو كذا تفصل وصدقني هذي نصيحة اخ

حتى تلاحظ كلنا نكتب لك لاتفصل لاننا مثل اخوانك

ياخي الناس الحين تدور الوظائف وناس تدفع فلوس عشان تتوظف وانت بكل بساطه تبي تفصل نصيحة نصيحة نصيحة راح تندم اذا فصلت سؤال بكرة اذا فصلت تبي تروح وتبي بنزين سيارة وتبي مصاريف وبيجونك جماعتك كيف بتضيفهم وكيف تبي تقضي حاجتك الحين انت قدك كبير ماشاء الله يعني تجي تقول لبوك ابي فلوس ! ياخي فكر فيها فكر فالمستقبل وفي علمك دام انك خدمت لا تفكر في يوم من الايام انك عاد تدخل اي قطاع عسكري نصيحة لا تتسرع في قرارك
ومثل ماقالوا الاخوان دورلك دقيش لاقرب منطقة لاهلك وبتحصل واااجد انت اذا خلصت استلامك رح لادارة حرس الحدود ودور بين الافراد اللي يبي يناقلك بس نصيحة الفصل شلها من راسك والله في غيرك مليون يتمنون الوظيفة باغلاء الثمن فكر زين قبل تتسرع في قرارك واتمنى اني ماطولت عليك

الله يعيينك اخوي انا زيك لي بس 10 اشهر في الحرس وابي افصل بس انتظر حتى لو شركة العسكريه ذل واهانه هذي عسكريه مافيها نظام ولا تأخذ حقك
وفيها ذل ومزاجيه تقهر الرجال الله يوفقنا اخوي ونشوف احسن منها

ياخوي هذا قرار بالاخير انت تتأخذه وتتحمل مسؤوليتة .


وطالما تبي شورتنا الأخوة الأفاضل ماقصروا بنصائحهم .

احنا في زمن وأنا أخوك صعب فيه متاعب خصوصا من جهة الوظائف

ناس تتمنى بس وتدفع الغالي والرخيص عشان الوظيفة .

فكر وانا أخوك في المستقبل زواج مصاريف شخصية .

حتى الآن وهذا واقع اذا تبي تتزوج يسألونك عن وظيفتك .

الامر يرجع لك

راجع نفسك واحسبها من جميع الجهات .

والله يوفقنا وياك لما يحبه ويرضاه .