السلام عليكم ورحمة الله وبركاته ,,

هذا الموضوع انقل لكم فيه تجرب احد الزملاء مع المطاعم , راجياً من الله أن يطرح به البركة ويرزققني ويرزق الجميع

بداية نريد أن نضع الخطوط العريضة لإنشاء المطعم والخطوات الصحيحة راجين من الله تعالى التوفيق , كما ارجو من الجميع التفاعل خصوصاً لمن لديه سابق تجربة أو حتى معلومة صغيرة ليستفيد الجميع ....

أول نقطة , إذا كنت ممن ينوي أن يفتح مطعم ويسلمه للعماله ويمر آخر الشهر ياخذ الغلة , أرجو مغادرة الموضوع فوراً , فهذا ليس هو المكان المناسب ..

ثانياً .. إذا كنت تنتظر شي سهل وطريق مفروش بالورود , آمل منك فضلاً لا أمراً أن تقوم باللحاق بزميلك أعلاه

ثالثاً .. ندخل بالمقدمة

في كل شارع في كل مدينه تجد صفة مطاعم مالها بداية ولا نهاية , بعضها ناجح بعضها سئ , بعضها متوسط , هنا يجي السؤال الاهم , ليش هذا ناجح ؟ وهذا اقل ؟ الجواب ببساطه من يحدد نجاح المطعم هو العميل , طيب ماهي مقاييس إختيار العميل للمطعم ..؟ وماهي العوامل الي تفرق مطعم عن الآخر ؟؟ لازم اول شئ تفرد هذي العوامل على ورقه , وتمشي بتحقيق اعلى درجه ممكنه بكل عامل (على ورق) وبعد ماتنتهي , تقدر تبدأ العمل الحقيقي , وبعد ما اكتب لك العوامل , راح اقولك نقطه هااااااامه جداً ...


1- الهوية .
2- الطعم .
3- الجودة .
4- النظافة .
5- السعر .
6- السرعة .
7- الخدمات.
8- الشريحة المستهدفه.
9- الصنف .
10- الموقع
11- الادارة
12- التسويق والاعلان



هذي هي اهم عوامل يقدمها أي مطعم بدون ترتيب , وتقدر تقيم أي مطعم قائم حالياً بناءً على النقاط اعلاه , الملاحظة ايش ؟
هي استحالة تقديم درجة عالية في كل النقاط هذي !! مثلاً .. لنفرض أن صنف المطعم شاورما .. من المستحيل تقدم جودة اعلى من منافسينك بأفضل أنواع الدجاج , وتقدم سعر أقل منهم !! بالتالي صار فيه تعارض في العوامل !!

إيش الحل ؟
الحل ببساطة كالتالي , أول خطوة تقوم بها , هي تحديد أهم عامل (الشريحة المستهدفة) , أنت لمين راح تبيع ؟ وما مدى إهتمام هذي الشريحة بالعوامل أعلاه !! مثلاً .. مطاعم تستهدف العوايل , تهتم بالنظافة و الجودة أكثر من الشباب , الشباب يهمهم الطعم والسعر , العماله يهمهم السعر اكثر من اي شئ آخر ...الخ


من هذا المنطلق , لازم تكون دراستك دقيقة جداً , ولما تنتهي من دراستك , تسوي نفس الدراسة على منافسينك بنفس الصنف والنشاط والشريحه المستهدفه , إذا كانوا افضل منك , الأفضل تتوقف ...



الآن بعد ماحددنا العوامل , خلينا نبدأ بخطوات فعلية للتوضيح :

مثلاً إخترت شريحة الشباب , تبدأ أول شئ بأهم عاملين للشباب , السعر و الطعم , هذولي لازم تاخذ فيهم 10 من 10 قبل أن تبدأ بأي شئ ... كيف يتم ذلك ؟

قبل أن تبدأ بأي حركه فعليه , لازم تعرف طعم الشئ الي راح تبيعه قبل أن تبدأ , هذي اهم نقطة !! لازم يكون طعمك ممتااااااااز جداً , وتخلي الزبون يرجعلك , إذا كنت ماراح تعرف الطعم الا بعد ماتفتح ابواب المطعم فأنت تضع نفسك فعلياً شختك بختك ياتصيب ياتخيب

وهذي بعض الحلول ..

1- إذا كنت راح تقدم مثلاً البرجر أو الكباب لازم تطبخه بنفسك بالبيت بمواد مشابهه تماماً .. أو تبحث عن مطعم من معارفك يتيح لك التجربه في فتره صباحيه مثلاً .. ولا مانع انك تشتري آلة مطعم مستعمله وتجرب عليها.. مع البحث عن زبون يشتريها بعد ماتجربها لو مانجحت التجربه ..

2- البحث عن معلمين في الخارج بمطاعم خارج المملكة , واستقدامه بشرط ان يضبط لك نفس مايضبطه في بلده .. مع ملاحظة الموااااااااااد المستخدمة (اهم نقطة اللحم يختلف من مكان لآخر !! )

3- أخذ عقد شراكة .. مثلاً تروح لمطعم ناجح بمدينه , وتقوله راح افتح لك فرع بإسمي بمدينتي , ابي منك المواد وتدريب العماله مقابل نسبه مثلاً او مبلغ مقطوع نهاية كل سنه ..او اي شرط يتفق عليه ..


إذا ما ضمنت الطعم قبل تفتح .. انصحك فعلياً تبحث عن مشروع آخر ..



بعد تحديد الطعم بشكل دقيق جداً , تحسب التكاليف وتحدد السعر الدقيق جداً للوجبة , مع الاخذ بالاعتبار هامش للمواد الهالكة .. بعدين تحدد ربحك .. وهنا مربط الفرس ..


تحديد الربح :
المطاعم الشعبيه غالباً الاسعار ثابته وواضحه للجميع , خلاف ذلك يختلف , مثلاً مطاعم العائلات , لأنه مايقدر يخدم الا الزبائن الموجودين على الطاولات في الغالب , يأخذ هامش ربح عالي مقابل الديكورات الفخمه , ومقابل الخدمه العالية , ولأنه لا يستطيع أن يخدم الا عدد محدود في نفس الوقت ..

لكن مطاعم الشباب , في الغالب الربح تأخذ 50% من سعر البيع , مثلاً ساندوتش كباب يكلفك 5 ريالات شامل كل الاحتمالات , تضيف عليها 5 ريالات أخرى ليكون الاجمالي 10 ريالات ..


الان , اجي مرة ثانية واقارن مع المنافسين , هل هذا هو سعر السوق ؟ إذا كنت اعلى فهل الفارق يستحق الجودة والطعم الي اقدمهم أو لا ؟ إذا كان لا بكل شفافية مع نفسك , توقف وابحث عن منتج آخر ..



الان نفترض أننا وصلنا للمنتج النهائي , وكان عندنا منتج ممتاز , وسعر معقول ومرضي للشريحه المستهدفه , اقدر اقولك الان انت حطيت لنفسك اساس صلب تتكئ عليه وتبدأ بالخطوات الورقية ... الي هي الهوية ..


الهوية : قبل تبدأ المطعم , لازم تبحث عن مصمم جيد , في الانترنت , او شركة متخصصة , تسويلك الهوية , تصمم شعار المطعم , لبس العمالة , الديكور الداخلي , الاكياس , التغليفات , الستيكرات .

تروح للمقاول والمطابع المتخصصة , تشوف تسعير كل منهم عشان ينفذ لك هذي الاعمال , تجمع التسعيرات , وتختار الموقع المناسب وتشوف الاجار كم ,تسأل مكاتب الاستقدام عن تكاليف رواتب العمالة واستقدامهم ..الخ, تروح لمحلات تجهيز المطاعم وتسألهم عن اسعار الالات وخلافه , وتكتب كل ماسبق على ورقه

الآن عندك التالي لرأس المال :
1- تكلفة الاوراق الحكومية
2- تكلفة الهوية من تصاميم وخلافه
3- تكلفة المقاول المنفذ والمطابع
4- تكاليف التأشيرات واوراق الاستقدام .
5-تكاليف آلات المطعم

هذي تسمى رأي مال المطعم , تدفع مرة واحدة , وراح نرجع لها , وخلينا نقول قيمتها 48,000 ريال فرضاً

المصاريف الشهرية :
1- اجار المطعم
2- اجار السكن
3- الرواتب الشهريه
4- فواتير الكهرباء

هذي تسمى مصاريف شهرية , وميزتها ثابته تقريباً , وخلينا نقول 5,000 ريال فرضاً ..


مصاريف المواد (اهم بند في المشروع):
1- الخبز
2- اللحم
3- الدجاج
4- مناديل
5-اكياس كاتشب
6- ورق تغليف
7- الخ

هذي المصاريف كلها تم تحميلها على الوجبه , لما جيت حسبت قيمة ساندوتش الكباب بـ5 ريال , انت حسبت الخبز .3 هللة و الدجاج 3 ريال , المايونيز نص ريال , ورق اللف 10 هللات ...الخ حتى صار المجموع كامل مع الكيس الخارجي في يد الزبون 5 ريالات , وانت هنا تحسب أسوء الاحتمالات , ربما كيس واحد يكفي خمس زبائن لكن حسابك يجب ان يكون شامل لكل الاحتمالات , لا تنسى فيه اكياس راح ترمى ولا تستخدم مثلاً !!

ميزة هذي المصاريف كل مازادت ماتصير عندك مشكله , لأن الزبون راح يدفعها , لأنها محمله على الوجبه النهائية .



الآن تجي لآخر مرحلة من الدراسة ,,

قلنا سابقاً ان ساندوتش الكباب يدخل 5 ريالات كربح

وقلنا ان عندنا مصاريف شهرية 5000 ريال

هذا بالنسبة للمصروف الشهري , بالنسبة لإستعادة رأس المال , يجب إستعادته قبل مرور سنتين
وهو في حالتنا 48,000 , نقسم المبلغ الخاص بالسنتين على 24 شهر يكون 2,000 ريال

يعني عندنا مبلغ 7,000 ريال شهري لازم نحققها من صافي ربح الساندوتش ..
ولأن الساندوتش الواحد يحقق ربح 5 ريالات , هذا يعني لازم نبيع بالشهر 1,400 ساندوتش كباب

مما يعني 46.66 ساندوتش يومياً , حتى نصل لنقطه التعادل , وما يتجاوز ذلك هو ربح , أما اقل فنحن نتكلم عن الخسارة ..

بالامكان الاستعانه بعامل مساعد , إستئجار شخص ليجلس امام مطعم كباب ناجح , وآخر فاشل , وآخر متوسط , ومعرفة العدد التقريبي , أو سؤال المحاسب مباشرة , أو أي طريقة أخرى لمعرفة العدد التقريبي لمعرفة إمكانية العدد ..




وهكذا تكون الدراسة مكتملة ..

بعد الإفتتاح يجب توفر نظام محاسبي دقيق , ومحاسب خارجي ,
المحاسب الخارجي يتولى الاحتسابات الشهرية والربع سنوية , والسنوية , ومعرفة النتائج لكل عملية , والرواتب والغيابات والاجازات .... الخ

اما الداخلي فيتم التعامل معه وفق الموردين , الاتصال معهم بشكل مباشر , واخيراً نظام ادارة المطعم وهو اهم جزء , يجب ان يحتوي على المخزون , فنظام المخزون يتم بالطريقة التالية ..

يتم اولاً إدخال اي عملية شراء مهما كانت عبر النظام , مهما كانت , سواء علب المشروبات الغازية , ورق لف الساندوتشات , الاكياس , الخبز , اللحم , وكل شئ ...

الفائدة الاولى : عند اي عملية بيع يتم خصمها بشكل آلي من المخزون , فتستطيع ان تعرف متى سوف ينتهي المنتج الفلاني ؟

الفائدة الثانية والاهم : تستطيع مراقبة العمالة , مثلاً , عندما يقوم ببيع ساندوتش كباب, فإن المخزون يقوم بخصم عدد واحد من الخبز واكياس اللف 100 غرام لحم وكيس كاتشب صغير وكيس خارجي واحد !! بالتالي , تستطيع طباعه تقرير اسبوعي لتقارن الارقام هل هو مشابه للعدد الفعلي من البيع الفعلي للساندوتشات ؟ ام ان المخزون اقل وان هنالك بيع بدون فواتير ؟؟


آمل أن يكون الجميع إستفاد والله من وراء القصد
هذا الموضوع انقل لكم فيه تجرب احد الزملاء مع المطاعم , راجياً من الله أن يطرح به البركة ويرزققني ويرزق الجميع