السلام عليكم ورحمة الله

اتمنى ان تكونو في افضل الاحوال اولااً حاب اعرف عن نفسي بما أن هاذي اول مشاركة لي في ها المنتدى الجميل
اخوكم جمال من المنطقة الجنوبية من مملكتنا الحبيبة وطالب طب في السنة الثانية .

الهمتني بعض المواضيع في المنتدى واخترت مشروعي ترفيهي وخلاصتة تأجير الدراجات الهوائية في كورنيش وممشى مدينتي طبعا لتوضح الفكرة الكورنيش الي بيكون العمل فيه هوه عبارة عن حديقة كبييرة تطل حوافها على البحر وعلى الحديقة اقبال كبيير خاصة في الويك اند ولعطل الرسمية وقررت تكون مزانية المشروع 15 الف على قد المتوفر لي من مكافئات الجامعه الأن

ثانيا قررت ان ابدا بعدد 10 دراجات هوائية عالية الجودة ومع البحث طلع متوسط سعر هذي الدراجات 1250 SR 1250*10=12500 وسعر الساعة بعد ما احترت فيها افترضت بتكون 40 SR وبالنظر للمكان راح احقق ان شاء الله 400 ريال يوميا اي 12الف في الشهر ويعتبر 80 % من قيمة راس المال تم استعادته من اول شهر وهذا شيء جميل .

طبعا هذا كل شيء توصلت له بعد الدراسة واحلل كل شخص اراد ان يستفيد من ا كتبت او يستنسخ الفكرة كيفما شاء بشرط أن يتذكرني بدعوة اذا فتح الله علية

العقبات الي تواجهني ....!

اولا كوني طالب طب وفي السنوات التأسيسية صعب التوفيق بين العمل الخاص الي ذكرتة والدراسة بالذات انني خططت ان اتفرغ لراس العمل لتوفير اجر العامل ولعدم وجود عامل اقدر اوثق فيه وهاذييمنن العوائق الي بحاول التعداها ان شاء الله .

العقبة الثانية كالعادة جهلنا بدوامة التراخيص ولاني حاب اكون نضامي فلا ضرر ولا ضرار وفي هاذا اجانب اتمنى منكم المساعدة والمشورة فيه وكما ذكرت انا مجرد طالب جامعي فما ادري اذا ينفع اعمل نظاميا او لا .

ثالثا واقول هاذي العقبة بكل صراحة وكلي خجل من اني اقولها اني اشعر ببعض الخجل من فكرة اني بكون واقف على رأس عملي بالذات انه عمل الخاص الأول لي واقدر لكم مساعدتكم لي ايظا في هاذا الجانب بتجابكم ونصائحكم وااكد اني ما اشوف الشغل عيب فلا حد ينطلي بخصوص هاذي النقطة

اخيرا اشكر كل شخص قرا لين وصل لهاذا السطر باقي يكمل الجميل بتعليق ونصيحة منه وباب الانتقاد البناء مفتوح بل ومطلوب ولا ليش حاط موضوع هااااه

اخوكم جماال ....
طبيب تاجر....

ماعندي شي لك غير اني قريت اخر سطر ودعيت لك

واما من ناحية الحياء شي طبيعي جدا وانا قد مرت علي بس افضل شي انه في البدايه يكون معك واحد يكون خبره او على الاقل جرئ عشان يساعدك كلها مساله يوم او يومين وتصير بطل مافيه قدك

الله يوفقك

اولاً اسأل الله انو يوفقك ويباركلك في رزقك 🙏🏻🙏🏻
ثانياً فكرتك رائعة جداً وبالعكس خليك واثق وماعليك من احد ولاتعتبرها عقبه ابداً شد الهمة وخل عزيمتك قوية 💪🏻💪🏻

الله يسهل لك
هذه مو عقبات ابد
اول شي فضي نفسك وروح للبلدية واشرح للموظف فكرتك بوضوح واختصار واستفسر هل يمكن البدء بهذا المشروع؟
وايش يلزم؟ وايش الاشتراطات
اذا كلها قادر عليها ومسموح لك انتقل للخطوة الثانية
لاتفكر بخطوات متقدمة الا بعد ماتتأكد من الخطوة الاولى وهكذا مثلا اذا اساسا الترخيص غير متوفر وممنوع كيف تفكر بالعامل ووقت العمل الخ
خلك خطوة خطوة

اما نقطة خجلك من العمل طبيعي لانه اول مره لك, بعد اول يومين او اول اسبوع تكون تعودت وتمكنت من الشغله ويمكن بعدها انت تجري ورا الناس تخليهم يطلبون بدل ماتوقف تنتظرهم يجونك
المهم لاتفكر فيه كعائق وتخليه يشغل تفكيرك

السلام عليكم

انتبه لدرساتك أخي الفاضل

وصدقني الطب مهنة شريفة ومن أشرف المهن

تستطيع بإذن الله عند تخرجك كطبيب العمل التطوعي وكسب رضى الله عز وجل

والطب كمدخول ممتاز جدا جداً

تستطيع فتح عيادة خاصة بك وووإلخ

مشروعك تستطيع أن تؤجله مستقبلاً ولكن لا تهمل دراستك بسبب ال15 ألف اللي تتوقع تحصلها من المشروع

الواقع غير ودراسة المشروع غير

ولو اصبحت كطبيب ممكن تطلعها من عيادتك الخاصة في يومين!!!

فكره ممتاز واعمل فقط في ايام العطل يعني خميس جمعه وسبت .
------------------------
لاتاخذ دراجات رياضية بسبب انها صعبه القياده وهي فقط للمحترفين / خذ دراجة الكل يقدر يسوقها.
كذلك دراجه للاطفال والمراهقيين .

السعر شوي مرتفع .

الله يوفقك
يعني بتستاجر مثلا فتحة جانب الكورنيش ؟
بالنسبة لك تستطيه فتح سجل تجاري والعمل بدون مشاكل
لكن مثل ما قال احد الاخوة اخاف تلهيك وتشغلك عن هدفك الاساسي
الدراسة يبغى لها تفرغ تام في الوقت وايضا تفرغ من التفكير والتشتت في متابعة المشروع والقلق عليه ومشاكل البلدية ومشاكل الزبائن


الله يوفقك
لا اعلم ما ذا اقول

موضوع بيشغلك عن دراستك،،،،،
خلي 15 بحسابك وأجل موضوع شوي
أو ابدا المشروع بسيكل واحد وبعد ماينجح جيب 2 وهاكذا
ادري معك المبلغ كامل بس حلات أي مشروع تبدأ بشي بسيط
،،،، وحتى لوجبت عامل موضوع بيشغلك
العامل ماراح يكون أحرص منك من ناحية صيانة سياكل والخ
انت مبدئياً ابدا ب 1
وأسأل عن ترخيص
الله يوفقك يارب

أولاً بما انك طالب ومنشغل بالدراسة , نصيحة لك حاول توفر التراخيص والمكان المناسب أولاً! بالنسبة للعماله مو لازم تثق فيه! هل تتوقع ماكدونالدز على عدد فروعه في العالم التي يديرها أفراد او الشركة بنفسها تثق في موظفينها ؟! على سبيل المثال شركة ماك في امريكا كاتبه عند الكاشير اذا لم تحصل على فاتورة فوجبتك مجانية! طبعاً الزبون صار يراقب الموظف وينتظر الفاتورة في حالة نسيان الموظف تكون الوجبه مجانية , فهمت؟ يعني تخلي الزبون هو اللي يراقب موظفك!

يعني ممكن تطبع لافته كبيره عند المحل, "في حالة عدم إستلام فاتورة من العامل, فالنزهة مجانية لك بالدراجة الهوائية" .. وفي نفس الوقت اذا تم جمع 5 فواتير , فالفاتورة السادسة تكون تذكرة مجانية للحصول على دراجة بدون دفع أي مبلغ! طبعاً هنا الزباين بتهتم اكثر بالفواتير اكثر من العامل! والعامل هنا راح يواجه ضغط من الزباين عشان الفواتير! يعني سالفة العامل يقول خذ السيكل وحساب بعدين او فاتورة بعدين ما راح يقدر! لان الزبون راح يقول خلاص باخذها بلاش ما عطيتني فاتورة! او بيقول عطني فاتورة عشان اكمل ر صيدي من خمس فواتير !! كلها افكار ويمكن تحسينها بس يبي لها جلسة تفكير وعصف ذهني! حاولت اكتب لك بعض الافكار اللي ممكن تبني عليها اشياء كثيره!

تقدر تدير عمل بإحترافية إدارية عاليه وانت على مقعد الدراسة بس خطط كل شئ قبل البدء!

بالتوفيق