السلام عليكم ورحمة الله وبركاته ..

من غير مقدمات اغلب الناس اذا تخرج من الثانوي او من الجامعه يعجز يحصل وظيفه بسرعه والسبب ليس بقلة الوظائف ولكن بسبب ضعف الاداء في البحث ..

انا راح اتكلم من واقع تجربتي وتجربه زملاء لي بعد التخرج والحصول على وظيفه وحاب اني اشارككم لعل وعسى افيدكم فيها .

راح الخصها لكم في خطوات ..

- تجهيز السيرة الذاتيه باللغتين العربيه والانجليزية وحبذا تكون مرتبه في ملفين منفصليين .
- البحث في مجالك قبل كل شي وقبل البحث العشوائي .. مثال لو تخصصك هندسه .. ماتروح ترسل السيره عشوائياً لاي شركه !! ولكن تبدا تسوي لك ملف في الاكسل وتكتب فيه الشركات المتخصصه بمجالك .. مثلاً الهندسه الكهربائيه راح تخصص الشركات الي مجالها في الكهرباء وتحط الشركات الحكوميه من ضمنها مثل شركة الكهرباء وووالخ

مثال ثاني لو تخصصك محاسبه ، راح تمسك الشركات المحاسبيه اول وتكتب اساميها ومواقعهم ومن ثم الشركات الاخرى

- عند التقديم تحاول تبحث في الشواغر ان وجدت .. اذا لم توجد شواغر في الموقع الالكتروني حقهم تروح تبحث عن ايميل ال HR او شؤون الموظفيين وتكتب لهم ايميل محترم خالي من الاخطاء وترفق السيره الذاتيه فيه ..

- يجب ان تنتبه ان ايميلك لازم يكون ايميل رسمي ومايكون شي عشوائي مثلا king11 ولا غيرها من الاسماء ذي .. يعني يكون ايميلك باسمك Ahmed.khaled@.....

- حاول انك تتصل على شؤون الموظفين صباحاً عالشركات وتعرف بنفسك وتسآل هل فيه شواغر او لا .. وياليت يخزنوا ايميلك والسيره الذاتيه في حال توفر شي يبلغونك .. اطلب منهم ..

- حاول انك تطور في السيره الذاتيه وتغيرها من فتره لفتره وتستشير الناس الخبره فيها ..

- طور نفسك في الانجليزي لو ساعه كل يوم تذاكر حتى لو فيه اختبارات تقدر تعدي ، ولا تستنى الوحي ينزل عليك عشان تتعلم ..

- طور مهاراتك في برامج الاوفيس وخاصه الوورد والاكسل لانها مهمه ..

- اذا فيه امكانيه سجل في مواقع التوظيف وحط بياناتك صحيحه وشيك عليها يومياً ..



هذه النصايح اشوفها مهمه وتسهل الحصول عالوظيفه والله يوفقكم يارب