المكتوب مبين من عنوانة
انا ادرس فتح مكتبة طالب
تتوقعوا مربحة وخاصة اني باخذ قرض
المشاريع تحتاج مجازفة وليس التردد
سواء قرض او اغيره
عطوني رأيئكم حولها وكيف وضع المكتبات

اي مدينه يا غالي

الرياض اخوي

جميل و خاصه لو اضفت لها فكرة التوصيل للمنازل

بالتوفيق ي رب

انا اشتغلت فيها جدا ممتازه وخصوصا بدايه الترم الاول وبدايه الترم الثاني ووقت الاختبارات بالذات يكثر طلبات التصوير للملازم للجامعات والثانويه وطلبات من معلمين ومعلمات لنماذج الاسلئه وطباعتها المكتبه قسمين قسم بيع كتب ودفاتر واقلام وغيرها من مستلزمات للطلاب والطالبات وقسم طباعه وتصوير وتغليف وبحوثات ومطويات وملازم للجامعات والثانويه انصحك تجيب عامل عربي يكون بقسم التصوير والطباعه عشان يعرف يتفاهم وينسق طلبات الملازم والبحوثات وطلبات المعلمين ويكون متخصص بالكمبيوتر او معاه شهاده حاسب والافضل لو معاه خبره لان ماكينات الطباعه تحتاج متخصص يهتم بالماكينات ويعرف الانظمه عليها لان بعضهم يطبع من الكمبيوتر الى ماكينات الطابعه الكبيره وبعده الوان وتحويل من اي فور الى ثري فور وغيرها بالذات قسم الطباعه والماكينات انصحك يكون متخصص ومعاه خبره للتعامل معها عشان نا يخربها او يعبث فيها وانصحك تشوف فني تتعامل معاه للمحل يعرف يسوي الماكينات الكبيره اذا تعطلت وانت بحاجه لها تخلي رقمه معك او مع العمال بالمحل وباقي الاشياء سهله باذن الله تجيب بضاعه بالجمله من جده وانت تبيعها بالمفرد وانا اقول لك بالذات قسم الطباعه لا تخليهم يخسرونك الورق كل شي خله محسوب عليهم عشان ياخذون حذرهم وتصير تكسب ورق
لان الورق وانا اقصد ورق الطابعات ومكينات التصوير مهم جدا جدا والمهم بالمكتبه الموقع يكون داخل حي لو وسط زحمه يكون ممتاز
وخل قسم بعد لطلبات التوظيف وحافز وتقديمات ابشر واي طلبات ثانيه تخص الحاسب راح تفيدك ماديا حتى لو سعرها قليل

اشتغل وطور المحل وتوكل على الله مشروع اشوفه ناجح وانا اشتغلت فيه وشفته بعيني قطاع ناجح والله يزرقك

هل عادي اجمع بين الاثنين بيع كتب ومستلزمات مع تصوير وطباعة الخ او البلدية عندها شروط

.. هي بالاصل مكتبه تجيك معها خدمه تصوير للطلاب كل المكاتب كذا قسم بيع وشراء دفاتر واقلام وقسم تصوير وطبااعه

2 كم تتوقع المبلغ حتى اعبي المكتبة بالاحتياجات من مستلزمات وادوات كمبيوتر

ما راح يقل عن خمسين الف كل محل له تكاليف خاصه به .. حسب البضاعه وسعرها ونوعيتها وانا اعرفهم ياخذون من جده بسعر تقريبا 80 الف او 50 الف بالجمله ويبيعون مفرد بالمحل .. هذا شغلهم قبل تبدا الدراسه .. الاجهزه هنا لها سعر لحال بعضها نوعيه
وحسب استهلاك الحبر وطريقه صيانتها الاسعار متفاوته من 3 الى 30 الف تقريبا بعض ماكينات التصوير صغيره ومتوسطه وكبيره
وانصحك خذ لو وحده كبيره تكون كامله سكنر وطباعه وتطبع اي فور وثري فور وتكون فيها الخدمات كامله مثل تطبع من الكمبيوتر العادي وبعده الون .. وهنا حسب العامل اذا له خبره راح يعرف يتعامل معها .. والمهم تمر المكتبات بنفسك وتسأل العمال بنفسك عن فني متخصص اذا تتصل يجي يزبطها باحتمال ينقص حبر او اي شي واطلب من العمال يتعلمون طريقه تعبيه الحبر وطريقه صيانتها اذا يعرفون لها اذكر كان عندنا مصري تخصصه حاسب الي اذا خربت او صار فيها هو يزبطها بدون نتصل على فني .. لان وقت الاختبارات بيكون في ضغط وطلبات كثيره على التصوير هنا خذ احتياطاتك لو يصير بماكينات التصوير عطال على طول الفني يكون جاهز يسويها لك ... لا تستعجل مر السوق وشوف الاسعار بنفسك وحاول تستشير العامل اللي راح تجيبه ويكون متخصص بالحاسب الالي او تكون له خبره عمل بالمكتبات ... عشان تستفيد منه وانا اقول لك لا تستعجل بشراء الاجهزه الين تستفر عنها من نفس عمال المكتبات وخدمات الطالب للتصوير ... ولا خاب من استشار لا تدفع ريال بدون تستشير وتكون عندك معلومات كافيه ..
والات التصوير تلقاها عند الجريسي و الهوشان اذا متواجده بمنطقتك مرهم والعبيكان اظن ومكتبه جرير بعد ..
وصح اشتر مستلزمات للترم الاول بس اذا مشت كل البضاعه تقدر تجيب بضاعه للترم الثاني من ارباح الترم الاول عشان ما تخسر المبلغ كامل .. نظام المكتبات ترم وتروم كل ترم له مكسب واحتياج لحاله وطبعا الترم الثاني قليل من يشتري شنط وبعض المستلزمات اللي ياخذونها الترم الاول تكون كافيه لهم باستثناء الدفاتر والاقلام سوقها ماشي الترم كامل ...

3 هل الاجهزة المتوسطة تكفي او لازم كبيرة لاني اعرف اجهزة جيدة قيمتها 2500 وبعضها قيمتها 1200
او لازم تصوير ضخم جدا

خذ كبيره وحده عشان تتحمل الشغل والضغط وقت الاختبارات وخذ وحده وسط لا تاخذ صغير .. لان انصحك اشتري كمبيوتر مكتبي كامل .. ومعه طابعه لحال عشان العامل يسوي اسئله للمعلمين والمعلمات وبحوثات للمدارس واذا كان يعرف لها طريقه تطبع من الكمبيور الى ماكينه التصوير مباشره .. خذ حسب امكانياتك الماديه واللي تقدر عليه وتشوفه مناسب خذه لكن مثل ما نصحتك اسال عمال المكتبات عن الماكينات وراح يقول لك هو خذ الماكينه الفلانيه حسب خبرتهم بيقول لك .. الافضل

4 الموقع تفضله اين بالذات شارع عام او داخل حارة زحمة او لازم بجانب مدرسة ودوائر حكومية

المكتبات افضل مكان لها اشوفه بشارع تجاري يكون داخل الحي اغلب الاحياء فيها شارع تجاري ويكون مزدحم مطاعم واسواقو وغيره وتكون المكتبات متواجده عندهم اذكر احنا بشارع تجاري وفي اكثر من مكتبه ومع هذا عندنا زحمه من العصر بالذات الى الساعه 1 بالليل خصوصا وقت بدايه الترم الاول والثاني .. المهم مكان قريب احياء ومدارس بنات واولاد عشان المعلمين والمعلمات ينزلون عندك ملخصات للطلاب وانت تبيعها لهم ... مدرس واحد يكفي يجيب لك كل المدرسين عندك وهنا شغل العلاقات العامه لمعلمين ومعلمات تستفيد منهم ملخصات تاخذها منهم وتبيعها للطلاب والطالبات عندك .. اصبر وراح تصير لك شهره باذن ربي ..


5 كم تكلفة المشروع ؟ انا اشوف الايجار فتحتين تصل الى 80 الف بالاحياء الوسط والجيده واما البضاعة لن تتجاوز 40 الف مع فيز العمال والرسوم الحكومية والديكور والرفوف والاجهزة
نقول مثلا اقصى حد 150 الف وربما اقل بكثير

صدقت تقريبا راح يكلفك حول المبلغ تقريبا بشكل كامل .. وانا انصحك جيب العمال وخلهم يجهزون المحل ويشتغلون فيه ويرتبونه عشان يعرفون الاسعار وتعرف بعدين تسوين جرد للمحل وتعرف كم دخل ريال وكم نقص جيب العمال وخلهم معك يشتغلون ويجهزون المحل لان هذا بعد الله سبحانه مصدر دخل لك ولهم وهم العمال دايم فيهم حرص يكسبون رزقهم .. جيب عامل هندي للمحل

اما التصوير والطابعه افضل شي مصري يكون معاه حاسب وله خبره او عربي لا تجيب اجنبي لقسم الحاسب انصحك خله عربي المهم عشان يعرف طلبات المخلصات والملازم والنماذج للاسئله وغيرها .. اثنين للمحل كبدايه يكفونك
.. وحط كاميرات مراقبه للمحل هذي نصيحه خاصه لك عشان تراقب العمال وتراقب الزبائن وخصوصا حراميه الاقلام ههههه ..