السلام عليكم ورحمة الله وبركاته وكل عام وأنتم بخير وأشكر إدارة حلول البطاله على سرعة التجاوب بتفعيل الحساب وحرصهم على الصالح والمفيد لأبناء هذا الوطن الغالي ..

اخواني واخواتي الكرام مااطيل عليكم بالكلام فخير الكلام ماقل ودل ،،

املك مبلغ 100 الف ريال سعودي وسأقسمها الى قسمين ( 50 الف ، 50 الف ) وأريد ان أنفع وبنفس الوقت استنفع ولذلك سأكتب رقمي ومن يملك او تملك فكرة مشروع رابحه ومستعد يقدم ضماناته على نجاح فكرته يتواصل معاي على الواتس فقط لعدم الاحراج وعند التأكد من جدية هذا الشخص او الفتاة يبشر بالخير والدعم المادي وراح اشتغل معه بالنسبه ويفضل ان تكون المشاريع بمدينة الرياض لأَنِّي من سكانها والله من وراء القصد ،،


رقم جوال الواتساب : 0505364030

اخوكم ؛ ابو فهد

ياليتك بجدة
وفقك الله

مافهمت تبي تكون شريك معاه ولا تبي يكون قرض. .

حياك الله يا ابو فهد والله يبارك لك في حلالك ويتضاعف حتى يوصل ملايين
صدقني ما أشكك فيك ولا في نيتك الطيبة جزاك الله خير لأنك إنسان بتفيد وتستفيد
لكن أنا حريص على اخواني وأحب لهم ما أحب لنفسي فأوجه هذا الكلام كأني أكلم اخوي :

لا أحد يتحمس .. الرجل يعرض إنه يكون شريكك في مشروعك بمبلغ 50 ألف ريال
يعني مو قرض بل شراكة .. وكلنا نعرف إن 50 ألف ما تمشي لك مشروع حتى لو مغسلة ملابس
يعني إذا إذا إذا لقيت مشروع بأقل من كذا فهذا يعني إن الجهد مضاعف ومعروف في هذي الشراكة
إن الجهد عليك ورأس المال عليه اللي هو 50 ألف .. يعني بصراحة في هذي الصفقة أنت خسران يا صاحبي
وانا عندي قناعة ودائما ارددها مهما كانت فكرتك او مشروعك لا تشارك لا تشارك لا تشارك في هذا المستوى
لأنك بكرة بتطلع قيمة رأس ماله اللي دفعه وبتكون من بعدها متحسف ومقهور إنك ربطت نفسك بأمر سهل
قسم بالله شي يقهر 50 ألف تقدر تدبرها في سنة ونصف بالكثير اذا شديت حيلك ليش تربط نفسك بالتزامات
انت في غنى عنها لمجرد إنك في وقت عصيب تفتقر لرأس المال وجاءك شخص تقاعد عن عمله وعنده خير
فيربطك معه تشتغل عشان خاطر رأس ماله .. خليك حر نفسك دائما وابدا .. الشراكات اللي عليها الكلام
بالمبالغ الكبيرة وتجيب حقها يعني لما من عندك 200 ألف وهو 200 ألف هذي أسميها شراكة رابحة 100%
أما 50 ألف من عنده المال وعليك الباقي من إلى .. هذا غبنة قسم بالله مو الحين بعديييين وبتعرفون قصدي

لأن راس المال قليل وقليل جدا لو كان محل فأنت عندك عامل واحد وانتظر لما يجيك وانت دافع الإيجار
6 شهور على الفاضي .. الجهد عليك بيكون مضاعف كل ما نقص رأس المال .. فإذا أنت قدها وقدوود
اجمع رأس المال القليل بنفسك حتى يكون تعبك على نفسك ...

أما والله إذا صاحب الموضوع بيغير كلامه ويقول خلاص أدعمكم ب 120 ألى 150 ألف للمشروع الواحد
فهذي تستحق المشاركة .. لأن المردود سيكون مجزي لكل الشركاء .. والجهد قليل ..

أما اذا استمر على نفس الطريقة فلا أنصح بمشاركته .. إلا إذا كانت الشراكة لمدة محددة سنة ونصف مثلا !!
أما غير كذا فلا وألف لا .. لا أنصح بذلك ... ليش الموضوع غير مجدي انا اقولك :

100 ألف يقسمها على مشروعين كل مشروع 50 ألف .. بالقليل بياخذ شهريا من كل مشروع 3 إلى 4 آلاف
كذا نقول 8 آلاف شهريا له .. كذا يرد راس ماله في سنة واحدة .. ومن بعدها اكرف جزاك الله خير عندنا اتفاق
وعقود ..

على قولة الأمريكان ( Woebs ! ) وبترجمة حرفية ( ويحك ! )




موفقين لكل خير

^^^^

تعجبني الناس اللي تفصفص وتحلل من واقع خبرة وتجارب

الف شكر لك اخي قصة نجاح ،، ولا انسى اخي صاحب الموضوع الله يجزاه خير .

وعندي استفسار بسيط اخي قصة نجاح ،، انت اخذتها من منظور نجاح المشروع

طيب في حاله خسارته فاعتقد ان الخساره الكبرى تقع على صاحب المال .. هل تتفق معي ؟

أيوة بس الرجال ماراح يودع حلاله على كل من هب ودب .

هو يبي أشخاص عندها ضمانات لنجاح المشروع ... يعني ضامن حقه .

عموما بالتوفيق للطرفين إذا كان عن تراضي بينهم .



حبيت أشكر أخوي قصة نجاح على كمية المعلومات اللي أفادنا فيها
فعلا في حاجات البني آدم مايخذها بالحسبان .

ولا خير في كاتم علم

انت يا قصة نجاح صادق بس لما يكون عندي مثلا مشروع حاليا او بمعنى اصح فرصه ماتنتظر سنه ونص لين اجمع ليه ماغتنمها واخذ نصها احسن من اخليها ولا اخذ شيء منها

وفي خلال السنه ونص الي تبيني اجمع فيها راح اجمع واخذ عليها مكسبي النص بالنص واجمعه وابداء بمشروع صح يعود علي بالربح + ربح النص بالنص ثابت

الله يعطيكم العافية كلامكم يبرد على القلب ... توقعت بلاقي هجوم كالعادة
لكن انبسطت لما شفت فعلا ناس نبهتها على أشياء ما انتبهت لها ...
الله يعطيكم العافية

وانا ماني ذاك الإنسان صاحب الخبرات والتجارب



بالعكس مثلكم انسان متهجول هنا وهناك لكن حبيت افيدكم باللي أعرف له
أخذتها بالمنطق واللي انصح نفسي فيه نصحتكم فيه لأن فعلا قهر تربط نفسك
بعقود وضمانات عشان 50 ألف لمشروعك الخاص

واللي يغبن إنها شراكة مستمرة
إما إذا كانت الشراكة محددة سنة أو سنة ونصف ثم يكون المشروع لك هذا أمر إيجابي

اقتباس:

المشاركة الأصلية كتبت بواسطة عاطل وحالتي حاله وعندي استفسار بسيط اخي قصة نجاح ،، انت اخذتها من منظور نجاح المشروع طيب في حاله خسارته فاعتقد ان الخساره الكبرى تقع على صاحب المال .. هل تتفق معي ؟

اتفق معك في حال اشترط صاحب المال على نفسه هذا الشرط ( إنه يتحمل الخسارة لوحده )
لكن الغالب والمعقول إنك تتقاسم معه الخسارة أو بنسبة أقل منه لأن في النهاية ماله وهو حر فيه وخايف عليه
وبغض النظر عن نجاح المشروع من فشله .. والله اللي ما تفرق معه إنه يشارك واحد ب 50 ألف ويردها له
على مدى سنة كاملة ثم يستمر بإعطائة نصف الأرباح دائما لمجرد إنه شاركه ب 50 ألف ( اللي هي رأس المال )
فما أعتقد هذا الشخص بتفرق معه إنه يتحمل نصف الخسارة .. لأنه مع احترامي ( ما يفكر )
وانا بغيت اتورط قبل كذا بشراكة عرض إنه يدفع كامل التكاليف 100 ألف لكن الحمد لله إنه حصلت لي ظروف
واعتذرت قبل توقيع الأوراق ... الحمد لله دائما وابدا ..

اقتباس:

المشاركة الأصلية كتبت بواسطة حامل دبلوم أيوة بس الرجال ماراح يودع حلاله على كل من هب ودب . هو يبي أشخاص عندها ضمانات لنجاح المشروع ... يعني ضامن حقه . عموما بالتوفيق للطرفين إذا كان عن تراضي بينهم .

مين الشخص اللي عنده ضمانات لنجاح مشروعه وما يقدر يجمع رأس مال 50 ألف للمشروع !!
إذا جاك واحد من هذي النوعية يا صاحب الموضوع فهو كذاب ... ومتأكد إن جاتك رسائل كثيرة
وفيهم الطيب والنصاب فأنت اهتم في تمحيص النصابين وأنا بأهتم في توعية الطيبين ...

اقتباس:

المشاركة الأصلية كتبت بواسطة وين درب التجارة انت يا قصة نجاح صادق بس لما يكون عندي مثلا مشروع حاليا او بمعنى اصح فرصه ماتنتظر سنه ونص لين اجمع ليه ماغتنمها واخذ نصها احسن من اخليها ولا اخذ شيء منها وفي خلال السنه ونص الي تبيني اجمع فيها راح اجمع واخذ عليها مكسبي النص بالنص واجمعه وابداء بمشروع صح يعود علي بالربح + ربح النص بالنص ثابت

ما فيه حاجة اسمها فرصة ما تنتظر سنة ونصف
كذا أنت مشروعك موسمي وكذا ماراح يدعمك صاحب الموضوع هو يبغى شي مستمر بالأرباح
أما اذا تقصد فرصة يعني محل أو موقع صيده للإيجار فتوكل على الله اذا الموضوع عاجبك ومخطط زين
مثل ما تقول الله يوفقك ..

بس خذها معلومة .. أغلب أصحاب الإيجارات ياخذ منك مقدم 3 أو 6 شهور للمحل
+ الديكور والأثاث وأغراض المحل + التقديم على تأشيرة عامل + انتظار العامل بعد ما توظف سعودي
وتصرف عليه رواتب حتى يصير نطاقك يصير أخضر ثم تستقدم العامل ..إلخ هنا اتوقع إن ال 50 ألف خلصت
وصرت تدفع من جيبك .. ما أبغى أتكلم عن الباقي .. اللي أبغى أوصله فترة ال 6 شهور هذي لو إنك كديت
على السيارة يوميا بتطلع 250 الى 300 ريال بتجيب ال 50 ألف في 6 شهور وانت تضحك ..

هذا اللي أبغى أوصله .. راس المال غير مجدي اطلاقا إنك تتعنى فيه بشراكة مستمررة


والله يا إخوان إني ما أشكك في صاحب الموضوع هو إنسان طيب ويبي يفيد ويستفيد
يبغالكم شي طيب وانا ابغى لكم الأطيب ... اشتغل على مشروعك بنفسك مادام مشروعك ما يكلف 50 ألف
لأن واضح مشاريع برأس مال مثل كذا إنها بسيطة وتعتمد بنسبة كبيرة على الجهد الذاتي وإدارة المشروع يوميا
يعني أقصد أعمال حرة بضاعة خضار وفواكه إلكترونيات تجارة في النت حكومة إلكترونية بوفيه صغيرة تسويق
مواهب تصوير أعراس وغيرها من المشاريع التي تعتمد على الجهد الذاتي والإدارة اليومية ...

والله من وراء القصد ...