احساس قاهر

تعبت ابحث · #1 (**permalink**) 08-10-2008, 07:54 AM

الطفوله ..

أحلى مافي هالحياه

مرحله من غير هم

كنـّا دايم نبتسم

كنـّا حتى لو بكينا ... وجارت الدنيا علينا

بعد لحظـات وثواني ...

بسمه فينا ترتســم

كنـّا نركض

خلف كوره ... ( لا لا أنا ماكنت معهم؟ )

وحدي بس بعيد عنهم ... كنت أنا أضحك عليهم ...

جالس لحالي أهذري... جالس أحسب كم( كوبري )...

صلـّحه( أحمد ) في ( ماجد ) ؟؟

والله واجد!!

وقبل ما يحل الظلام

....

للبيوت نروح نجري ... ( لا لا أنا ماكنت معهم ! )

أمشي وحدي بعيد عنهم ... أمشي وأعدد أثرهم!

وهم عني يبعدون ...

يبعدون ... يبعدون ...

إلا( ماجد )!

كان مثلي حيل ضايق ...

بس حزنـي كــان حارق

كان يسألني ببراءه : ...

ليش تعرج ؟ ... قلت مادري ! - باستياء -

ليش تبكي ؟ قلت مابكي - بكبرياء -

ضاق مني ...

ثم سألني في غباء

....

قال ( وثرايك تـثــابق )؟

وراح عنــّــي ... !!

كنت أسأل دوم نفسي ...

ليش ما أركض معاهم ؟؟

ليش دوم أمشي وراهم ؟؟

وش بلاي ؟؟ أو وش بلاهم ؟؟

ليه أنا غير الأنام ؟؟

زاحمتني الأسئله...

كل شيٍ أجهله ؟

وإن تعبت من الإجـــابه...

أحظن الحيـــره وأنام

..

مرّت سنين وكبرت ...

صار همّي اليوم أكبر

حتى دمعي صار أكثر

للأسف توي قدرت ...

أفهم إني شخص ( عاجز )!

يعني بيني وبينكم

مليون حاجـــز !!!

صدقوني ذي حقيقه ...

لا طلعت السوق ... كل ما أمشي دقيقه

القى كل شوي أبله !

يمشي ويناظر صديقه ...

ويغمز له

يقول :

ناظر...!

وش يناظر ؟؟

وتتفجّــر في خفوقي

ألف ضيقه

ووحده في وسط الزحام ....

طالعتني باهتمام ...

بنت في عمر الزهور ... أي رشاقه ... وأي أناقه ...

وأي عطـــور !!

قلت في نفسي ياهووووه

هي تناظرني بغرام ؟ أو هي نظره والسلام؟؟

بس أكيد إنها تعرفني ... شايفتني ؟

شايفتني في جريده ؟

واعجبتها لي قصيده؟

إيييييه أنا توي افتكرت

لي قصيده....

كنت ناشر معها صوره

بس صوره ... ياسلااااا م

وفاجأتني ...

لمـّا صارت لي قريبه ... كانت تـتمـتم بطيبه

****/font>يكسر الخاطــر حـــرااااام ) !!!!!

وتركت دمعه غريبه ...

وضاعت بوسط الزحــام

دمعه كانت تحكي وضعي ... زلزلتني

ارتطم قلبي بضلعي ... دمرتني

صدقوني

أصعب اللحظــات وأقسى

لاغدا الرجـّــــال يكسر ... خاطر انثى

كيف ينسى ؟؟؟

جاوبوني !

وزاد همّــي ...

يوم فكــّـرت بوظيفه ... ثم زواج

أي وظيفه ... وأي زواج ؟؟

اللــي مثـلي ...

مهما طالب ... لويلف ولو يدور

زين لو حطـــّــوه كــاتب

لا

... وعلى بنــد الأجـــــــور ....

ماهو رسمي!!

صدقوني لو تدرّج ... وصار راتبه ايتصاعد

وابتــدا وضعه يزين

ما أظنه بيتزوّج ... حتى لو بعد التقاعد

زعيم الفاشلين · #2 (**permalink**) 08-10-2008, 02:52 PM

والله امس كنت في مكتبة جرير لقيت بنت في عمر الزهور جالسة على عربية متحركة والله حزنت لأجلها

اجل لو اروح لمستشفيات او لدور الرعاية وش راح الاقي
ولكن ما املك لهم الا الدعاء
اسأل الله باسمة الاعظم الذي اذا دعي به اجاب

ان يشفي مرضانا ومرضى المسلمين
اللهم فرج هم المهمومين ونفس كرب المكروبين

اللهم عاجلا غير اجل

مشكور يا صاحب الموضوع

أم الوظائف · #3 (**permalink**) 10-10-2008, 08:17 AM

ليش ليش ليش

توني قاريه لك موضوع..

ليش هنا محبط..

بس تعرف اسلوب كتابتك مره رائع..

واذا تعرج مو مشكلة.. هذي ما اعدها اعاقة.. يكفي انك تمشي..

والحمدلله شاب طموح وعلى اولك..

ربي يكتب لك الخير..

وبإذن الله راح نشوفك مع الايام الجاية..

انسان مميز..

ونموذج يحتذى به..

بالمناسبة انا سبق تعاملت مع ذوي القدرات الخاصة.. فعلا ناس مميزين.. فيهم اصرار وتحدي.. عندهم روح طيبة..
فيهم براءة الطفولة.. قلوبهم مافيها حقد وغل.. يتميزون عن كثير من ابناء جيلهم..اتمنى لك ولكل ذوي قدرات خاصة..
النجاح والتميز..

وانضمامك لمنتدانا.. فخر وشرف لنا..وعضو مميز كسبناه..