السلام عليكم وورحمة الله وبركاته

أحبتي الكرام

عندي مبلغ 25 الف ريال ومدري وش اسوي فيه ..

هل ممكن أستثمره . أفيددوني بارك الله فيكم ..

من وجهة نظري لا تستعجل عليها و زود فوقها

وفقك الله و رزقك من حيث لا تحتسب

جزاك الله خير اخوي .. والله يرزقك من اسع فضله

وعليكم السلام ورحمة الله وبركاته
والله وانا اخوك الوقت الحين وقت شتاء ، اذا معك موتر حوض ، اشتر لك ماطور هواء ، وخلك عند هاللي يطعسون
وكل سياره بتجي تنفخ الكفر ب 10 ريال ، قيمة الماطور تقريبا 3500 الف واشتر لك معيار وثلاث ليات منفاخ هوا
مشروع جدا رهيب وغير مكلف
تحياتي لك

طقطق بالغنم اذا عندك خبره بالغنم اشتر جمله وبيع مفرق

يااخي الكريم
المشروع اذا وفقك الله فيه لو راس ماله 2000 ريال
اعرف وحده كلفها مشروعها اقل من 500 ريال
اخذت الشغلة تسلية والحين ماشاء الله رصيدها قرابة المليون
سبحان الله ماكان هدفها الربح السريع هدفها تسلي نفسها وتضيع وقتها بما ينفعها بس وربحت من وراه خير
مشروعها عباره عن بطاطس مقلي تروح للحدايق الي فيها ناس وتبدا تشتغل يومياً تحضر للحديقة ماتتغيب يوم واحد
دائماً الي مايهمهم الربح السريع هم الي يربحون
والطماعين الي نيتهم من اول يوم بيدخل عليهم من مشروعهم 10 الاف حليفهم الفشل
ونصيحة اهم شي لنجاح المشروع بعد تقوى الله ورضا الوالدين والاخلاص باللعمل هو حسن ادارة المشروع
اذا اسئت الادارة فشل المشروع
حكمة : تقوى الله وحب العمل تحصل على سمعة طيبة وزبائن دائمين
وبالتوفيق والله يوفقك بمشروع مربح

اقرأ هالكتاب وبيفيدك :

http://www.almsaodi.com/AnyoneCanDoIt-Arabic.pdf

**

واشتغل في شيء انت تحبه عشان تبدع فيه ولا تبدأ بكل فلوسك ولا بتخسرها لأن هذا طبع التجارة
+ ابدأ بمبلغ 1000 ريال فقط لتجربة المنتج اللي تبي تشتغل عليه او تبيعه كتجربة لقبول الناس له من عدمه
اذا له قبول تبدأ تجيب بضاعة بشكل اكبر وتبيعها بربح ..

ودايم شف الاشياء اللي الناس تبيها وما تلقاها .. انت هنا تجيبها وتوفرها لهم بمبلغ مناسب ومربح لك
او تشوف فكره موجودة ولكن تطورها انت .. مثل البليلة مثلا ً الموجودة بالثمامة على الدينات وغير صحية
انت تقدر تطور هالفكرة وتبيع بليلة بنظام "كوب الذرة" في الاسواق مثلا ً وتبيعها بـ 6 ريال بدل 3 ريال وكيس البليلة بالكثير تلاقيه بـ 15 ريال .. + تسوي لك من المنجرة كشك بنفسك تصميم كشك كوب الذرة " وتسمية كوب البليلة .. وتحط لك الكشك في السوق بإيجار رمزي منهم وتجيب عامل يبيع فيه او تبيع فيه انت .. وتقوله مثلا تدخل لي في اليوم 200 ريال واذا نجح المشروع وشفت انه مربح لك تفتح كشك ثاني وثالث ورابع في الاسواق وعليك بعدها الجرد على عمالك وتاخذ منهم المدخول اليومي او الاسبوعي ..

واذا تبي تحسب صح :
تحسب قيمة الايجار شهريا
تحسب قيمة الرواتب شهريا
تحسب قيمة التكلفة التشغيلية اللي هي "البلية مثلا والشطة وغيرها" شهريا ً .
بعدها تجمعها كلها وتقسمها على 30 يوم = يطلع لك الناتج اليومي للتكلفة .
يعني لو قلنا :
رواتب 1000 ريال للعامل شهري
الايجار 1000 شهري
التكلفة التشغيلية 1000 شهري
= 3000 شهريا ً ÷ 30 = 100 ريال
وعشان تربح من المشروع لازم تزيد عن الـ 100 ريال 50 الى 100 ريال يعني يكون مدخولك اليومي من 150 الى 200 ريال وتكون ربحان من هالمشروع ..
وهكذا مع اي فكرة تبي تسويها لازم تسوي لها دراسة جدوى ماليه ومتى راح تسترد راس مالك منها وتربح منها ..

واهم شيء اذا تبي الربح والرزق يجيك : التوكل على الله عز وجل + بر الأم وطلب دعواتها والتصدق عنها اذا هي متوفيه وبتشوف اثرها على تجارتك .. + القراءة القراءة القراءة في التجارة والادارة .. لرفع الوعي + النزول للميدان
ولا تصير مثل اللي واقف قدام البحر ويقول : ودي اسبح ! .. انزل للبحر واسبح .. السباحة ما تجي الا لما تدخل للبحر .. وكذلك التجارة ما ينفع تقول ابي اصير تاجر وانت جالس .. انزل للسوق وبتتعلم التجارة والسباحة فيها ..