حبيت اشاركم وافضفض معاكم من واقع خبرتي في الشركات وش الي ممكن يحصل عليه اي شخص طموحه عالي.

تجربتي بدأت فعليا عند ما وجدت نفسي مظطر اشتغل في اي شغله بعد ما خسرنا لبزنس الي كنت اشتغل فيه انا وابوي وكله مقدر ومكتوب من عند ربي.. وقبلها سبقتها مرحله صعبه والملف الاخضر خير شاهد.... ومن ديرة لديرة في ربوع وطني من شرقها لغربها ومن شمالها لجنوبها (( وهو صحيح... لو تكد كد الوحوش غير رزقك ماتحوش))... بس ان الاكيد اصبح السعودي في حكم الامر الواقع مابين المقيمين الي صارو معازبينا... واصحاب المنافع الي اخر همه ديرته والا يلتفت لحد غير كرشته....

بديت اول عمل كبير بائعين بعد بحث استمر لمدة سنة تقريب(( خلالها ماخليت باب والاجدار الا وقدمت عليه لكن اقدار)).... المهم بعد مقابلات وطلعه ونزلة وجب وهات... قالو مقبول.. وبديت معاهم العمل.. المدير فلبيني (( ويا حليله من تولوه المقيمين)).. ومدير الفرع اردني... المهم وقتها كنت ابله وغشيم وعلى حسن النية... وكلام التخدير العاطفي الي ما يجيب اخر المشوار بريال صامولي مثل (( احنا نحب السعوديين... احنا هدفنا انك تكون مكاننا.. احنا واحنا ..الخ)).. بس الاكيد انا اشوف ومقتنع ان ربي مايضيع عمل احد.. وعلى مبدئي ابتديت بسم الله عملي.. بكل نشاط واخلاص.. قبل دوامي احضر.. واحيان اخر واحد ينتهي من عملة... بديت شعلة نار... مالتفت للصعوبات.. لكن في ناس يصعب عليها تشووفك مجتهد..(( ولك يا زلمة.. شو.. ابو سعود مفكر حالو سوبرمان)).. لكن الي يهونها في الخاطر... اقول في نفسي ياولد.. هونها وتهون... وماعليك من الخبلان... مع النشاط والمبيعات الي وصلت لاكثر من 300000 الف ريال خلال شهرين... هنا بدأت المضايقات تزيد... خصوصا ان مبيعاتي كلها تلفون وانترنت.. واحيانا اذا بدأت ام الحوايم تدور على روس مدرائي... يتوقع انه بيعقد الموضوع لو نزلت من المكتب الي هو مبيعات على التلفون والنت... الى ارض المعرض... بس بالعكس كنت اي شي اتوكل على الله واسوية.. ماتفرق معاي... وهذا الي زعل الجماعه اكثر... سويت مبيعات حلوة.. وناس تتسوق سعوديين ومن اهل الخليج... ومايبغون الا سعودي اذا شافونا في المعرض..... من هنا بدأت دراما بابا الحارة.. واخواننا بني عربي.. تبداء هنا المضايقات من قبيبل(( ابو سعود شو مفكر حالو)).. استمريت حوالي الستة شهور بس.. من بدأت الخصميات الغير مبرره في الراتب... بدأء تحليق الراتب بدون سبب...المدير المقيم.. يحولك على المقيم الثاني.. تروح للمقيم الرابع.. توصل للفلبيني ... فجأه تحس انك ضعت في دوامة... او كأنك طريد الدهر... ما تقدر تاخذ حقك... اخيرا استقالة... وطلعت اشووف رزقي في مكان ثاني...
هذا الكلام في نهاية 2011 تقريبا......


خلال الفترة والي اسمية الفصل الثاني.... الملف الاخضر فر كل الديار السعودية مجددا... ويقدر الله سبحانه بأقدارة وصارت لي اصابة في الركبة... كسر مع تمزق في الاربطه.. ولازم تأهيل وعلاج طبيعي لمدة تسعة اشهر على الاقل..الحمد لله وكل شي من الله خير... وقتها تضيق الارض واللي فيها علي... يجيك القريب اللي يودك ظاهريا.. ويتمنى يشوفك في المكان اللي يشومك او المكان اللي يضحك منه الشامت عجب... يسألون كيف الاحول وين تشتغل.. والرد الحمد لله ... الله مفرجها وابشركم الامور تمام واجازه الحين وزي كذا.... المهم من دعاء الله ما يخيب... على السرير ايامها مقدر اتحرك الا بيت ... مستشفى.... والنت عندي... ارسلت اكثر من 1000 ايميل لشركات كثيره.. والردود يا إما الكترونية .. او مافية رد... وعلى ذا الحال.... وادعي الله في الفرج والتيسير...


المهم وانا اقلب في الانترنت.... لقيت منتدى اسمة حلول البطالة... قلت ياولد نجرب ويمكن الله يفرجها (( مع العلم وقتها... كبدي طقت من شي اسمه مواقع توظيف عربية... اغلبها يا ناس تعلن عشان سعوده.. او عروض خنفشارية من طقة رواتب مغريه...))... المهم لقيت اعلان توظيف لرقوق غاز... اخذت الايميل.. راسلتهم.. قالو العمر مايسمح.. رديت على اللي ارسل الايميل بكلمتين:
يا رجل.؟

المهم الظهر جاني اتصال وكان يوم اربعاء.. قالو السبت مقابلة... حمدت الله وقلت ياكريم من فضلك... شاورت ابوي قال ابشر.. هذي السياره والسواق والله يسمح دروبك ويوفقك... وقتها رمضان... مشيت على السحور... ووصلت الشرقية الصباح.. وعلى الموعد.. سجلت وصول ثاني شخص في المقابلة...

بدأت المقابلات الساعه عشره... الاول قبلي ما طول... قصرها من اولها وباين عليه متضايق حتى من ثوبة..
دخلت على اللجنه.. لقيت اربعه قدامي.... الشرطي السيئ والشرطي الجيد.. واثنين جمهور... اربعتهم سعوديين
من القطيف ومن الاحساء وواحد من اهل الحوطه الظاهر...

بد شد وجذب وخذ وهات وسؤال استفزاز وسؤال ترفيع... واختبار لغه وكتابه... اختصرو الموضوع بكم كلمه, قالو ترى الشغل تعب وارهاق وشاق..(( المشكلة توني منزل العكاز مع السواق... واتخطى على رجولي وكني ادعس على جمر.. وباقي قدامي علاج طبيعي وتأهيل تسعة شهور)) الاكيد... رديت عليهم الرد الحاسم... اذا فيها امان وظيفي وترقيات ومافيه ظلم... لو تحطوني في النار اشتغل... ولا عندي اي مشكله.. بس الاهم لا تهضمون حقي... قالو توكل على الله وانت مقبول.. اسبوع وتجينا... طلعت من عندهم وصليت شكر لله.. ورجعت لاهلي واخر شي همني اني معاق جزئيا بسبب العملية .. واحتياج التأهيل والعلاج الطبيعي مدة تسعة شهور ثانية... لكن توكلت على الله الحي القيوم وطلبت منه العون... وبديت معاهم

بديت بعمل اسبوعين .. واسبوع اوف.... والمشوار الي اقطعه كل فترة عمل 1800 كيلو صاد راد...
المتاعب مع الاشخاص المؤذين من اول يوم... لكن نترك صغار الامور... وناخذ اكبرها
لهنا امورنا تمام....مع بعض صغار الامور الي ما التفت لها في موقع العمل مع العلم كل واغلب الناس الي تشتغل هناك سعوديين بس قراوى ويعتبرون الي برى قريتهم جاي من بنقلاديش..... لقيت فيه ناس اجواد وحبيبين... وفيه ناس ما تصلي على طرف ثيابهم... شديت حيلي وكرفت كرف الويل الثلاثة شهور الاولى وبجد وجدارة.. حصلت على الترقية الي وعدت بها الشركة وقت المقابله (( وقت المقابلة... قبلوني بشرط.. اشتغل عامل لمدة ثلاثة شهور في اتعس موقع للشركة وبعدها اذا التقييم اوكي... ترقية لوظيفة ثانية))... والحمد لله بفضل الله ثم بالمجهود الي قدمته ترقيت لان محد قدر ينكر الشغل والجهد الي بذلته.... بعدها بديت مشواري وبدت المضايقات تزيد... كل ماتبذل جهد اكثر.. كل ماتزيد مضايقات القراوى... خصوص ان فيه فارق ديني (( مع تجنبي الشديد عن الخوض في اي نقاش ديني )) الا ان بعضهم يبلاك بنفسه... وانا بس اعطي الاشكل... وان حاول احد يزودها... قدام الجميع اقوله ياحبيبي اللي يحاسب الله لا انت ولا انا الي يحاسب... العاقلين منهم يجون يعتذرون... وبالعكس فيهم ناس قمة في الاخلاق ومعرفتهم مكسب....
المهم كل ما تقدمت خطوه والمجهود الي ابذله بشراسه... لان فيه ناس حاولت تدور الزلة.. وللأسف ماحصل.. وهذا بفضل الله... مع استمراري وتقدمي الوظيفي.. زادت المضايقات.. حتى الاتش ار.. يحلفون بالله صمدا عمدا.. انه ما يمشي لي اي موضوع عندهم... المشكلة مهيب هنا.. لما بداء هضم الحقوق المشروعه للموظف... وصرت أنا مهضوم الحقوق.. وصلت لمرحلة الاهانه.. والخصومات الي مالها مبرر... وهنا وقفت وقفه مافيها دبلوماسية او حياديه.. الاهانه مرفوضه وايضا اقتطاع الحقوق وهضمها مرفوض.. حاولت اقدم شكواي لهرم الشركة.. بس الحبيب اخر همه انه يلتفت لشكوى موظف صغير.. احالني لمديري نفسه القروي... الي بس يعتبر ان العالم والكرة الارضيه قريته بس.. اما موظفين مثلي مجرد كانئنات حية قادمة من كوكب اخر غير الكرة الارضيه... قدمت استقاله شرحت فيها الاسباب.. وابدا.. مجرد جت الاستقاله وقعت بدون الالتفات للأسباب الوارده فيها... اخذت صورة بتوقيع المدير.. وعلى مكتب العمل...الي كنت اظنه مكتب عمل على اسمه... وينصف الناس ويعطي الحق طلابه... لكن للأسف... مرت الليالي والايام.. والشهور والسنين... ومنذ 3سنين وكاتب هذي الاسطر من جلسة في جلسة لين مليت وحلفت ماعاد اشتكي احد... وحاليا ابحث عن العمل في كوكب اخر... او بروح ارمم بيت جدي الطين واشوف لي كم ناقة واطلب الله..

حبيت اشارككم قصتي
وشكرا....
صعب المراس 28/11/2015

اتمني توضح سير الجلسات وان شاء الله نعين ونعاون وماذا تطلب أنت وربي يسهل لك مكتب العمل احفظ النظام والعب وكذا تربح إما ما هو واقعي لا ينفع معهم حتى لو على الخاص .

صليب المراس غلطان يا اخوي

تركت عملك عشان هملق واكلوا حقوقك
المفروض ما استقلت كان جلست تطالب بها وانت على راس العمل
حتى تنصف وان لم تنصف . يأمن شكواك عليهم مستقبلا في حال اكلوا عليك حقا
واتوقع راتبك كان جيد جدا بما انه عمل أسبوعين و اوف أسبوع
الان لا حق ولا راتب
وما عند الله خير
قد تكون خيرة لك
بس بسئلك ممن عانيت اكثر بصراحه من المقيم ولا ابن البلد ؟

الله يعينك ويسهّل أمورك يارب العالمين .. ويرزقك من حيث لاتحتسب

نصيحتي لك إبدأ بمشروعك الخاص لو ببداية بسيطه وإن شاءالله مثلك وشرواك من المكافحين لو كان تعبهم لهم ولقيت راحتك بعملك وحفظ

لراحة بالك وحقوقك راح تبدع وبيكون الخير لك ولمن تعول وهذا بحد ذاته دافع قوي .. البلد فيها خير كثير وهذا سبب مزاحمة الكل لأبناء

البلد على هذا الخير .. ولو بغيت أي مساعدة أنا حاظر لك بأي وقت . وسؤال الأخ اللي قبلي أعجبني

ممن عانيت أكثر بصراحة من المقيم وإلآ من إبن البلد ؟

هذا حال أغلب الشركات الأجانب يعاملون السعودي على إنه أجنبي أو بالأصح إنه غني وعنده ملايين بس جاي يحسدهم عالعمل

وبالنسبة للرقوق أنا عملت فيها ما أستحملت المضايقات من الشباب اللي هناك وطلعت من أول شهر ، عملها متعب جداً والرؤساء

الأمريكان ما يعرفون شي إسمه رحمة وزيادة على ذلك كل الشباب اللي معك من نفس القرية ونفس المذهب ويشوفون أي واحد مو منهم

عدو مبين لازم ينحشونه بأي طريقة

__________________
كن بلسماً إن صار دهرك أرقما ....... وحلاوة إن صار غيرك علقما

الله يوفقك
سردك للقصص جميل