معك بكالوريوس ؟ او دبلوم بأي تخصص ... ؟

قهوة · #1 (**permalink**) 10-10-2008, 07:02 AM

أمس اتصل اخوي علي وقال ابحثي بالنت نريد مدرس للعيال رياضيات بأي سعر .

بحثت في مدرس كوم ، واتصلت على الجوالات كلها مقفلة . فكرت شوي ..
تذكرت ان المكتبات والبقالات عندها ملصقات بالهبل عليها ارقام مدرسين ومدرسات ..

طبعا اخوي كان مشترط سعودي - حرصا على اخلاق عياله - ابن الوطن دايمن اضمن من غيره !! لكن مالقيت ..
المهم

طلعت وجمعت لي كم رقم .. واول واحد رد علي كان أردني الجنسية .. مباشرة اتفقنا معه وجاء يطلع على وضع العيال وينسق الجدول معهم ( هذا الكلام امس الخميس ) يعني قبل تبدأ الدراسة .. وعطى العيال يومين في الأسبوع : الأحد والثلاثاء بعد العصر مباشرة .
قلت لأخوي : قول له نبي الوقت مفتوح - يعني من العصر الى المغرب . اعتذر وقال كلام من ذهب ودي تتأملون فيه بتركيز رجاء :

قال :

أنا نسقت الجدول علشان يضبط مع باقي طلبتي .. كيف ؟
قال أنا مسوي اعلان لطلاب رابع وسادس فقط . طلاب رابع يوم الأحد والثلاثاء بعد العصر مباشرة .
وطلاب سادس يوم السبت والاثنين بعد العصر مباشرة . وكل يوم ساعتين فقط . أراجع لهم الدروس كلها حقت الأسبوع ، وأحل معهم كل التمارين .

كيف يجمعهم ؟

حاط غرفة وحدة في البيت . ويجلسهم على الأرض بشكل صفوف ، ويشرح على سبورة قديمة لها عنده عشر سنوات حسب كلامه .. يمكن شاريها من المكتية بعشرين ريال !

الزبدة ...

كم طالب عنده برابع ، وكم طالب عنده بسادس ؟؟ وكم ياخذ على كل طالب ؟؟

عنده في رابع 15 طالب .
عنده في سادس 20 طالب .
كل طالب ياخذ منه 1500 ريال صافي مصفى .

كم يطلع بالشهر الواحد ؟

20 + 15 = 35

35 × 1500 = 52.500

أكرر .. شهريا 52.500

صدقوني أقسم بالله إني أعدت الحساب أكثر من مرة ؛ لأتأكد من الرقم ! أحسبني غلطانة !!!

هذا كله وبدون رأس مال !! وبدون أي تجهيزات !! حتى البنزين مايصرف !!

لا ويقول لأخوي .. ليسا ابغى اوصل طلاب رابع للــعشرين مثل سادس !!!

طبعا بداية حسيت انه يبالغ او يمدح نفسه !!

عندها تذكرت فلسطينة عجوز تقسم بالله انها كانت تربح شهريا من الدروس
الخصوصية 60 الف . وكنت اظنها كذابة ومبالغة وتسوي دعاية لنفسها !!

بعد كل هذا سألت نفسي : وين أبنائنا ؟ وين بناتنا ؟

جالسين في كل مكان ونصايح ونعول : بطالة بطالة بطالة ! والفرصة بين ايدينا !!

خاصة مدرسيْ الانجليزي - والرياضيات الكيمياء والفيزياء !!!

وينكم من جد ؟؟؟

ms.tmimi · #2 (**permalink**) 10-10-2008, 07:07 AM

والله ماقصص جنحان بناتنا وعيالنا الا ان الاهل يبون واحد اجنبي يدرس عيالهم

خوذوها مني الغالبيه يبون اجنبي على قولتهم اقوى من السعوديين

وكلنا خابرين المبالغ الخياليه اللي ياخذونها فوق ال50 الف وياسلام طاقين لهم هناك عمارات مهوب بيوت وبس

بس وين الاهل اللي يبون سعودي او سعوديه طبعا بستثناء اخوك ياقهوه اللي عنده عنصر وطنيه ؟؟؟؟

من اللي يؤيد هالنظريه؟؟

قهوة · #3 (**permalink**) 10-10-2008, 07:14 AM

الجدير سيثبت نفسه صدقيني اختي الغالية .
واغلب العوائل المحترمة تفضل ابن الوطن على الاجنبي الذي تختلف عاداته وتقاليده عنا في كل شيء .
اذا اثبتي جدارتك ورضيتي في البداية بربح بسيط سترين كيف انهم يترجونك ويتركون الغريب .
مشكلتنا نتشرط ولا نرضى بالقليل ، ولا نبي نروح بيوت الناس ولا نبي الناس يجون بيوتنا ووووو .. كيف بنترزق الله اجل ؟؟

شكرا اختي ع المرور . والله يوفقني انا وياك وجميع المسلمين .

الفكر التجاري · #4 (**permalink**) 10-10-2008, 07:15 AM

ملاحظ كثرة هذة الطريقة وخاصة بالمدن الكبيرة مثل الرياض وجدة

دافنشي · #5 (**permalink**) 10-10-2008, 09:05 AM

صحيح .. المدرسين الخصوصيين يطلعوا أضعاف مدرسين المدارس ..

وبعضهم يدرس في الاثنين .. بس المبلغ اللي ذكرتيه للمنهج كامل ولا شهريا ؟؟

أظنه للمنهج كامل ..

قهوة · #6 (**permalink**) 10-10-2008, 10:22 PM

اقتباس:

المشاركة الأصلية كتبت بواسطة دافنشي

صحيح .. المدرسين الخصوصيين يطلعوا أضعاف مدرسين المدارس ..

وبعضهم يدرس في الاثنين .. بس المبلغ اللي ذكرتيه للمنهج كامل ولا شهريا ؟؟

أظنه للمنهج كامل ..

اختي انا ما تكلم من خيال ! انا اتكلم عن ولد اخوي ! 1500 (شهريا ) يعني ياخذ 52500 ((شهريا )) وليس للمنهج كامل ، والله على ما أقول شهيد .

amani · #7 (**permalink**) 10-10-2008, 09:09 AM

ماشاءالله صاروا ملووووك

هادي 2007 · #8 (**permalink**) 10-10-2008, 09:31 AM

انا اعرض خدماتي في المدينة المنورة
التخصص دراسات قرآنية
ومستعد لتدريس جميع المواد في المرحلة الابتدائية
لمن يرغب مراسلتي على الخاص

برودكت سعودي · #9 (**permalink**) 10-10-2008, 11:20 AM

فكره..
لو يوفرون هذا الخيار للمعلمين السعوديين او حتى للعاطلين بس في يكون رسمي
يعني...انا ابي اشتغل معلمه خصوصيه في مدرسه،اقدم على المدارس واشتغل اوفر تايم بدل المعلم الاصلي
صحيح كم ساعه بس الحلو ايش؟ ان الآباء بيدفعون اكثر للكم ساعه هذي بحكم انها "خصوصيه"
وانا متأكده بيكون على هذي الفكره اقبال خصوصا ان الأهل بيثقون في المدرسه وان الطفل يكون فيها اكثر من شقه في عماره مجهوله!

فيه ناس مايقدرون يستقبلون طلاب في بيوتهم ولايقدرون يطلعون لهم او حتى بيكونون اهلهم "رافضين" الفكره لانها "فشيله" او غيره من الاعذار المضحكه.

قهوة · #10 (**permalink**) 10-10-2008, 10:31 PM

اقتباس:

المشاركة الأصلية كتبت بواسطة برودكت سعودي

فكره..

لو يوفرون هذا الخيار للمعلمين السعوديين او حتى للعاطلين بس في يكون رسمي
يعني...انا ابي اشتغل معلمه خصوصيه في مدرسه،اقدم على المدارس واشتغل اوفر تايم بدل المعلم الاصلي
صحيح كم ساعه بس الحلو ايش؟ ان الآباء بيدفعون اكثر للكم ساعه هذي بحكم انها "خصوصيه"
وانا متأكده بيكون على هذي الفكره اقبال خصوصا ان الأهل بيثقون في المدرسه وان الطفل يكون فيها اكثر من شقه في عماره مجهوله!

فيه ناس مايقدرون يستقبلون طلاب في بيوتهم ولايقدرون يطلعون لهم او حتى بيكونون اهلهم "رافضين" الفكره لانها "فشيله" او غيره من الاعذار المضحكه.

عزيزتي كلامك صحيح ، بس لو انتظرنا المدارس تسوي كذا بنموت ماحصلنا على شي ، ولو تتبعنا العوائق صدقيني بنقعد متكتفين كل شي غلط وكل شيء عيب . الرزق يبي له مكدة وتعب ، والمتنبي يقول :

لولا المشقة ساد الناس كلهم ..

يعني لو التعب والكد كان الناس كلهم صاروا اغنياء وشيوخ .
انتي ابدئي بتطبيق الفكرة وبتشوفيك كيف تتوفقين وينفتح عليك باب الرزق .

الله يوفقك ويحفظك من كل شر .

معك بكالوريوس ؟ او دبلوم بأي تخصص ... ؟

قسم مشاريع وأفكار

أمس اتصل اخوي علي وقال ابحثي بالنت نريد مدرس للعيال رياضيات بأي سعر . بحثت في مدرس كوم ، واتصلت على الجوالات كلها مقفلة . فكرت شوي .. تذكرت ان...

معك بكالوريوس ؟ او دبلوم بأي تخصص ... ؟

تسجيل الدخول

معك بكالوريوس ؟ او دبلوم بأي تخصص ... ؟

قسم مشاريع وأفكار

أمس اتصل اخوي علي وقال ابحثي بالنت نريد مدرس للعيال رياضيات بأي سعر . بحثت في مدرس كوم ، واتصلت على الجوالات كلها مقفلة . فكرت شوي .. تذكرت ان...

معك بكالوريوس ؟ او دبلوم بأي تخصص ... ؟