السلام عليكم ..

مو عارفه كيف أبدا كلامي بس بختصر الموضوع وأتمنى تساعدوني وما ادري اذا مكان الموضوع عدل او مكانه بقسم ثاني (اذا مكانه خطا اعتذر ) ..

اشتغلت بمؤسسة أزياء (محل بالسوق)بشهر 6 هجري وكانت وظيفتي بائعه
حصل لي تحرش من موظف بنفس المحل وقدمت استقاله
وكلموني اصرو علي ارجع وقبلت ارجع بشرط يغيرون مكاني عن الي كنت فيه
ورجعوني ورجعت لان وقتها كنت منفصلة عن زوجي وبرقبتي 3اولاد ومحتاجه الوظيفه

المهم رجعت وكل شي تمام والأمور ماشيه صاحب الحلال شاف مني جهد بالشغل
وإني اشتغل تمام واعرف بالكمبيوتر حيييل لان كان يجي عندنا المحل وأساعده بإدخال الفواتير اليدوية للنظام وبعدين صار يفتح حسابه لي وأدخلهم وبعدين سوى لي حساب خاص فيني (كل موظفه عندها حساب خاص فيها ) وصرت ادخل جميع الفواتير بالنظام القديمة الي قبل أتوظف والجديدة وقت طباعتها تكون باسمي مالكم بالطويل شافني متمكنه وسريعه بالكتابة قالي بخليج مسؤولة عن النظام وتدربين البنات عليه وبزيد راتبج وافقت مع ان الشغله حييييل متعبه وفيها جهد للعين بس قبلت ومشيت معاه بالفرع الرئيسي ودخلت فواتيره ومن الرئيسي وداني محل ثاني وقالي راح تكوني مديره فيه ومسؤوله عن البنات ومسؤوله عن النظام ومسؤوله عن الصندوق المالي كل هذا براتب 3000﷼ 😕
استلمت كل ششششي بالمحل كل شي انا اسجله من سندات قبض وفواتير سوا انا انهيتها او الموظفات او الموظف اليمني كلها انا أسجلها
برمضان كنت بالفرع الي حطوني فيه مديره ادخل الفواتير وتعطل الجهاز وجى صاحب الحلال يشوف الخلل (ملاحظه هذا صاحب الحلال لما كنت بالفرع الرئيسي كان قممممه بالاحترام ومايرفع عينه فينا وإذا كلمنا كلمه ورد غطاها ) جى وضبط الجهاز بعدها وانا اشتغل يجي يمسك يدي ويسوي حركات هزئته وحلفت وهددته اني بشتكي عليه وان م يتعدا حدوده وقلت له انت هنئ بالسعوديه يعني تحترم نفسك وكلام وأيد من العصبيه م اذكره واليوم الثاني طلبت اني اطلع والمدير رفض اطلع قالي خلج معانا لين شهر 10 وطلعي عشان الموسم وضغط علي ورجعت داومت رجعت من اجازة عيد الفطر بشهر 10 وبعد 15يوم كنت مأخذه اجازه لزواج اختي وماكنت ناويه ارجع أصلا خلاص ، كلموني قالو لي في زبونه استلمت فستانها ودفعت المبلغ ومافي سند قبض مع فاتورتها والمبلغ مب موجود وين راح ؟
قلت لهم انا الي استلمه أسجله قالو لي تعالي عشان الزبونه تتعرف عليج رحت قالو الزبونه راحت وكل يوم اروح يقولون الزبونه رافضه تجي أخذت رقمها كلمتها قالت انا م اذكرها الي عطيتها المبلغ حتى لو جيت م راح اعرفها وترجيتها تجي ورفضت وطلعو بزبونه ثانيه انها دفعت ومافي سند قبض لها المهم انهم. رفعو علي دعوه حقوق ماليه


كانت الجلسه قبل 4ايام تقريبا حضرت الجلسه وكان بالدعوه الي جاتني مسجل 4000ريال
ولما حضرنا الجلسه عند الشيخ قالو المبلغ وصل حول 12الف قال الشيخ شلون قالو اكتشفنا أشياء جديده والشيخ استغرب شلون من 4الاف الى 12الف قالو كل شي مسجل باسمها !!!
شي طبيعي كل شي بيتسجل باسمي لان انا المديره والمسؤوله عن ادخال الفواتير بالنظام



انتهت الجلسه ان الشيخ طلب منهم يصورون الفواتير الي متهميني فيها ويعطوني منها نسخه
وأسجل ع كل فاتوره التفاصيل وبصراحة م فهمت شي من الي طلب الشيخ اول مره يصير معاي جذي 😰

موعدنا ب20 شهر 6



عطوني مشورتكم ورايكم .!



انا الحين موظفه بشركة ثانيه وموقعي جدا حساس م ابي هالموضوع يأثر علي
الي يقدر يساعدني بالمحكمة ويقولي شلون اثبت برائتي م اعرف بالسوالف كلش
وشكرا مقدما 🌹

روحي مكتب العمل وتكلمي مع مدير مكتب العمل هو أكثر شخص بعد الله يقدر يساعدك ومرت عليه هالأشياء كثير

__________________
كن بلسماً إن صار دهرك أرقما ....... وحلاوة إن صار غيرك علقما

اخوي " عاطل " أكيد يقدر يساعدني ؟؟

وشلون ؟ أتوقع م يقدر يسوي شي م ادري احد عنده علم عن كلام اخ عاطل اذا صحيح او لا !

بختصر قصتك عزيزتي بعنوان ( نهاية الحماس الزايدهي نهايتك)
انتي علي اي اساس تستلمي مهمة مثل هذي فواتير وامور مالية خاصة بالشركة بدون اي عقد يحفظ حقوقك
حماية لك اكتبي لي في الخاص وبقولك وش راح تسوي بالتفصيل بس بشرط انك تكوني جد بريئة والقصة الي حكيتها صحيحة مية بالمية

اخوي سي فود ..
صح كنت مندفعه حيل للشغل بالاحرى كنت ابي أي شي اشغل نفسي بيه عشان أنسى واطلع من الي كنت فيه من موضوع انفصالي عشان هيك كنت حيل متحمسه وحابه الشغل ومندفعه له

ويمكن يكون غلط بس هيك انا اذا دخلت مجال احبببه واندفع فيه عشان أعطي واحْلُل راتبي ،
من اول م توظفنا لين طلعنا انا وكل البنات م وقعنا عقود وكل مره نسال عن العقود يصرفونا وماجى ع بالي ان هالموضوع بيكون فيه ضرر كان ع بالي انو كل الشركات جذي تجرب الموظفه ويعد فتره توقع معاه العقد
الموضوع مثل م كتبته بالضببببط والله العظيم ان هذا الي صار وإني بريئة من كل شي نسبوه لي

لك رساله ع الخاص 🌹

انا افترض الخير .
في حالة أنك تصدري الفاتورة أنت وسند القبض ايضاُ إذن هذا تفريط من صاحب العمل والمفرط اولى بالخسارة .
ولكن من يستلم المبلغ منك أو انت تذهبي للبنك بنفسك وهذي مصيبة لو كانت انت ايضاً
اولاً : انت لا تقري (تعترفي ) بأي مبلغ أو أي امر وانت لا تعلمي عنه نهائياً لأنه سيعتبر اعتراف ولو سكتي نكول إي اقرار بأنه حقيقي ولكن قولي غير صحيح إذا تعلمي أنه غير صحيح واطلبي ببينه ما يقولوا أو اطلبي فترة للرد في الجلسة التالية وانت واثقة حتى لا يشك القاضي انك سارقة . وخافي الله قبل ان تخافي الناس .
ثانياً: إذا كان هناك فاتورة يعني تم بيع الفستان فعلاً أو بشكل صوري يعني لم يخرج من المكان والمبلغ بعد أن يستلم إين يذهب من يقوم بإيداعه في البنك .
ثالثا: انت لازم تقرئي وقت اصدار الفاتورة المكتوب بالإله وكنت وقتها متواجدة أو لا ولازم تذكري مين ممكن يدخل بالرقم السري للجهاز غيرك وهل دخل من مستخدمك أو لا في حالة انه دخل بمستخدم مختلف سوف تعرفي ولازم تثبتي وقت العملية إين كنت ومن شهودك لان النظام ممكن اختراقة ولكن توقيعك عليها أو لا .

مثل ما قال moll
على فكرة مافي احد بيفيدك بالخاص
عموما خلي دفوعك القائمة بعدم الاختصاص بالتحصيل
فقط تقومي بعمل سند قبض وعمل الفواتير (كيف تعملي سند قبض بدون قبض ؟)
اما المبالغ فهي من اختصاص من يقوم بأخذها حيث انه لم تقومي يوما بإستلام أي مبالغ
اذا عندك اثبات بأنك تسلمي المبالغ الى المسؤل عنك ارفقيها

واذا هذا كله ما نفع ادفعي الفلوس اللي يطلبوك هيه
و بنفس الوقت ارفعي دعوه تحرش على المسؤل حقك

والله اعلم أخاف اقلك شوفي محامي ما راح تحصلي الا وكلاء نصابين او مدعين محاماه

اخ منتم..

ركز الله يرضى عليك

انا ادخل الفواتير وسندات القبض للمعارض اثنينهم الي الموظفات واليمني ينهونها من بيع وقبض المبالغ لان انا المسؤوله عن ادخال الفواتير بالنظام (هذا جواب كيف اعمل سندات قبض بدون قبض )

حبل الجذب قصير بس من الباب لطاقه اروح ادفع لهم لا والله سلامة عمرك م دفعت ريال
انا الي اطالبهم براتب اخر شهر اروح اعطيهم !!!

ماني محتاجه محامي ولا وكيل
وكيلي الله

السلام عليكم ورحمة الله وبركاته ,,

أختي الفاضله :

موضوعك بسيط بأذن الله

سؤالي : سندات القبض هل يكون عليها اسم المستلم وتوقيعه ولا ؟

ثانيا أدخال الفواتير ما يثبت شيء عليك الا بتوقيعك اما أن الفواتير مدخله باسمك بدون توقيعك كل شخص يستطيع يدخل ويعمل فاتورة !

أتمنى تشرحي لنا أكثر علشان أفيدك يا أختي

انتم كيف نظامكم

هل سند مع توقيع ولا فقط سند ؟

هل أدخال الفواتير ع النظام تكفي أو يوجد توقيع للموظف علشان الاثبات

في أنتظار ردك

وفق الله الجميع