السلام عليكم ورحمة الله

سؤالي جدا بسيط ولكن احتاج لبعض الاسهاب لزيادة التوضيح ..

السؤال : كيف ارتاح من هم الوظيفه وعبودية الراتب واستقل ماليا ؟؟

كان في بداية البشريه يشتغل الفرد بشخصه يصطاد قوت يومه عشان يشبع نفسه واسرته ،

- وبعدها كان العصر القبلي الفرد للكل والكل للفرد ،

- وبعدها العصر الزراعي وكانت الاراضي الزراعيه ان ملكها افراد يشتغلون فيها لانفسهم ولكن الاغلب كانت للملوك والامراء وبدا الاستعباد ينتشر في استغلال طاقات العاملين مقابل القليل لاشباعهم على مقولة ( جوع كلبك يتبعك ) اكرمكم الله ،

- وبعدها العصر الصناعي العصر اللي صنع الوظائف ( عدوي اللدود ) ، وصارو الناس منهم اللي سبقو عصرهم مثل غيرهم من القله القليله في كل عصر وبنوا المصانع وافتتحو الشركات وصارو الناس يبيعون مجهوداتهم مقابل مبلغ من المال كل نهاية شهر ومن هنا بدأ موضوع الوظيفه والراتب والمفهوم السائد لكل العقول القديمه ،

- والآن بدأنا عصر المعلومات واللي يحتاج فيه الانسان فقط للجهد الذهني وماعدنا نحتاج للجهد البدني ، هنا فعلا المال عباره عن فكره ، الانترنت قرب البعيد والمحلات والمعارض صارت موضه قديمه نوعا ما ، الآن فيه اسواق عالميه على الانترنت وبأسعار تنافسيه جدا والواحد صار من بيته وهو جالس يتسوق وتوصله المنتجات بانواعها إلى باب بيته ، حتى الطلب من المطاعم كأبسط مثال كان بالتلفون اما الآن تطبيق بالجوال تحط لهم المعلومات وتسوي طلبك ويطلع لك مجموع الطلب ويوصلك لباب بيتك بكل بساطه والله اعلم ايش اللي جاي.


- عن نفسي انا ، اعترف اني فاشل في الوظايف رغم ان حاجتي للوظيفه والراتب تحركني وتجبرني وليست رغبتي في ذلك

وابحث واقرا بشكل دوري عن الاستقلال المالي وانهاء المعاناة مع الوظيفه وعبودية الراتب.

لان عقل الانسان بحد ذاته مصنع الافكار بموجب المعطيات فـ الله سبحانه وتعالى سخر لنا الارض ومحتوياتها وعقولنا تقودنا بالبحث والاستنتاج والتنفيذ إلى امور منها الراحه الماليه.


- الشاهد بالموضوع ان بيع الجهد مقابل مبلغ من المال ( الراتب ) ، فكره قديمه جدا طاف عليها قطار الحياه ، ولابد من الاستقلال بالذات واستثمار الوقت ( الضايع في الوظايف ) هو اثمن ممتلكات الفرد حتى للجهد الذهني ، لان الشخص اوقات تواجده في الوظيفه مايقدر يركز الا في عمله وبعد عمله بكل تاكيد يحتاج للراحه الجسديه والذهنيه وهذا اهدار للوقت والوقت عباره عن عمر والعمر هو الحياه.

- وبدلا من اني اعمل عند غيري عشان يحقق حلمه ، اعمل لنفسي واحقق حلمي. وليش اشتغل واقضي عمري ( والعمر واحد ) - بوظيفه مافيها كلمة امان القطاع الخاص يبقى مشاريع كبيره او صغيره وقابله للنجاح وقابله للفشل وليش انا اعرض نفسي للقلق والتوتر في مجمل حياتي ، حتى القطاع الحكومي حتى لو انه آمن لكن حتى الحكومات ممكن تسقط والتشكيلات اللي تصير والامور الثانيه اللي حنا في غنى عنها وعن وجع الراس هذا كله.

- الافكار كثيره والمشاريع الجاهزه اكثر والدعم ، والتمويلات ، والقروض كثيره جدا والتجاره بحر وثلاثة اعشار الربح والبركه في التجاره

- لان التجاره تعتمد على الجهد الذاتي ومقابل جهدك تكسب ، اما الوظيفه ممكن ماتشتغل وتضيع الوقت لكن راتبك ثابت حتى لو ماحللت لقمة عيشك وهنا ممكن يكون مدخل للحرام عليك.



مابطول اكثر ، لكن فيكم الخير والبركه للرد على السؤال


احترامي
اخوكم محمد

احييك عالموضوع اخوي حفيد ادم
اما بالنسبة لعبودية الوظيفة فاعتقد يقدر الشخص يبدا بمشروعه وهو مازال في عمله حتى يتمكن من الية العمل ,,, ووقت مايشوف انه محتاج يعطي كامل وقته لمشروعه فاعتقد هنا يجي وقت التخلص من هالوظيفة واخذ المخاطرة في المشروع ...لان من غير مخاطرة مافي ربح لكن يجب اخذ المخاطرة بعد دراسة متأنية وواضحة ولازم يكون مقتنع 100% بمشروعه ...

كلامك عقلاني وما اختلف معك فيه حتى لو قناعاتي ضد اتجاه فكرة الوظيفه ،

وصحيح ان المخاطره شجاعه والفائده فيها ربح سواء ربح من تعلم اخطاء ودرس او ربح مادي

لكن المخاطره ومثل مانتفق انا وانت تقل اكثر بكثير بعد تثقيف النفس في المجال اللي راح يقبل عليه الشخص ، وتكاد تنعدم المخاطره رغم ارتفاع نسبتها بعد هذا الوقت لان العلم بالشئ يدعم ثقة الشخص فيه.


اهلا بتواجدك ، نورت

كلامك عين الصواب ، اسالني كنت بالقطاع الخاص الله وكيلك :؛(
باذن الله تتحقق امالنا وطموحاتنا

الله يسخر لنا من عباده الصالحين

كلنا مرينا بهذي المعاناه بس باذن الله راح تنتهي معاناتنا بهذا العصر لاننا حنا في بداياته وحنا اللي راح نبنيه

الله يوفقنا واياكم اجمعين ، نورت

من أروع المواضيع التي قراتها شكرا لك

شكرا لذوقك ولاتحرمنا من اضافاتك وافكارك

انطلق نحو تحقيق احلامك واعلم ان الطريق طويل ومتعب ولكنك ستصل باذن الله
تابع موضوع لي قريبا راح اطرحه لعله ينفعك يامحمد

بانتظارك وارجو انك ماتتاخر علينا

بالتوفيق