السلام عليكم ورحمة الله وبركاته

بدخل بالموضوع

انا حبيت افتح مشروع طبعا حبيت اخذ رايكم لئن لو سالت احد من قريبين مني قالو وش تبغي بالمشاريع خلك عالراتب
الشركه وانت جالس بالبيت ذحين المعاق مو من حق يعيش مثل غير ليش هالنظره ؟!!

المشروع الاول

يالي صراحه كثير فكرت فيه اشتري لي فان واحووله لمطبخ طبعا وقت الشتاء ببيع مشروبات ساخنه
مع ماكولات خفيفه والصيف بضيف على الفان مكينة ايس كريم واعرف اماكن تجمع الشباب والعوائل

والسياره مستعمله حصلتها 16 ونص نظيفه وعدل عليها اش رايكم


المشروع الثاني

افتح محل مطبوعات كروت افراح وتصاميم


المشروع الثالث

مغسلة ملابس


اش تنصحوني فيه

المبلغ يالي معي 80000

م بغي ردود تحطيم ماني ناقص والله

وعليكم السلام ورحمة الله وبركاته

ما شاء الله عليك , الله يوفقك وتجد المشروع المناسب لك

بالنسبه لسيارات الوجبات اتوقع تحتاج تصريح من البلديه حاول تبحث عن اشتراطاتهم واتوقع يحددو لك اماكن بيع ثابته ( تأكد )
وهي فكره جميله - شرط اختيار الموقع الجيد وتقديم اصناف مطلوبه

مغسلة الملابس : تعتمد على الموقع بحيث يكون على شارع حيوي

لاي مشروع تعمله حاول تسوي دراسة جدوى لو بشكل مبسط بحيث تعرف المصاريف والايرادات المتوقعه
ودائماً خذ في الاعتبار بانك تحتاج مصاريف سنه او سنه ونصف بدون ايرادات ( دورة تشغيل ) حتى يبداء المشروع يصرف على نفسه .

وفقك الله , عليك بالاستخاره ثم الاستشاره , وتوكل على الله .

الله يوفقك وتاكد لايوجد مستحيل مدام الرغبه والاصرار موجوده

وقبل هذا كله انت شوف اللي نفسك تميل له وافضل ومرغوب عشان تبدع فيه وتطور نفسك للافضل

موفق

اخوي مشاريع التصريح وكل شي مزهول امرها

والمغسله في سكن للعزابيه

الله يوفقك ويرزقك المشاريع كثيرة
اخي لا تستعجل خطط صح والافضل تفتح مشروع في شي تحبة
واستخدم نص المبلغ في المشروع كالبداية

وعليكم السلام ورحمة الله وبركاته

مشروعك بإذن الله بينجح

في منطقة القصيم عندنا شفت نفس فكرتك 2 واحد في مدينة بريدة
و الثاني في مدينة عنيزة

كلهم سيارات مسوينها كوفي يبيع المشروبات الساخنة و الباردة
واكيد مع بعض الاضافات اللي تشوفها مناسبة مثل ماقلت حلويات
او ماكولات خفيفة

طبعاً اللي بمدينة عنيزة كان يشتغل بنفسه يدير عمله بعد فترة وظف عامل معه

واكيد لو المشروع مو ماشي معه ماجاب العامل و ماسك للحين الشغلة

ومهم تختار الاماكن اللي يكثر فيها الناس

وجميل تضيف القهوة العربية ترى لها سوق كبير و السينبون من كربس سينمون رول

و ربي يوفقك

شف يااخي مدامك اصريت انك تعمل مشروع هذا بداية النجاح
بس فيه شغله لازم تعرفها اي مشروع وخاصة الي ناجح منها
يحتاج لصبر لنفرض السيارة جهزت وبديت تجارة يمكن تاخذ اسبوع مايجيك زبون او شهر او شهرين
لاتيئس وتترك المشروع التجارة لازم صبر وكفاح وتعب
لنفرض بعد 3 شهور جاك زبون واعطاك 1 ريال واحد راح يكون الريال عندك له قيمة وكانه 100 ريال
ويجيك زبون اخر بعد اسبوع يعطيك 5 ريال ونفس الشي بتفرح فيها الى ان يتزايد ربحك هذا سر التجارة
لو كل شخص فتح مشروع وجاه ارباح هائله من اول يوم ماتجد احد سعى لرزقه ولانفع غيره من الناس
الانسان مخلوق انه يكافح ويسعى لرزقه الى ان يتقدم بالسن
كل المشاريح ناجحه اذا اخلص الشخص في شغله وتوكل على الله ولاتنسى المعادله
الاخلاص في العمل+الخوف من الله =التوفيق والنجاح والسمعه الطيبه والارباح الطائله والبركة في الحياة

الله يرزقك من واسع فضله
ماشاء الله تبارك الله الاجواد ماقصرو بمعلوماتهم
حابه اقولك مشاريعك الثلاث كلها ان شاء الله ناجحة وانت خذ اللي ترغبه اكثر وتوكل على الله
واهم شيء الاصرار في العمل
والله يوفقك

وعليكم السلام ورحمة الله وبركاته ..

الاخوان والاخوات ماقصروا معك الله يعطيهم العافيه ..

وفقك الله دنيآ وآخره ..