بسم الله الرحمن الحيم

السلام عليكم ورحمة الله وبركاته

اسعد الله اوقاتكم بكل خير

اخوكم عضو جديد بالمنتدى واتشرف بأن اكون احد اعضاء هذا المنتدى الرائع أسال الله لي ولكم التوفيق

بداية وبعد تفكير كثير بحكم ان ليس في التجاره اي مجال سابق وقررت أن أبدأ بشي بسيط يكون له عائدا شهريا لي غير راتبي الفكرة هي عمل مطعم شرق اسيوي وبالاخص (مطعم اندونيسي صغير) وجبات شبه سريعه وليس مطعم كبير ومكلف بيكون طريقة المطعم سفري ومحلي فكرت بالعوائل بس كبداية صعبه علي ومتعبه حيث ان راس المال محدود والعوائل يبي مساحه اكبر والاجار بيكون ايضا كثير علي ففضلت كبداية اني اقتصرها علي سفري ومحلي فقط
طبعا انا حريص ان يكون المحل المستأجر فيه سكن بالدور الثاني او حتى سكن ملاصق للعمال او في نفس المحل اذا هو كبير اقسم الجزء الاخير منه حسب الحاجة وافتح له باب من الخلف بحيث يكون خاص لنوم العمال وتقطيع الاكل وتجهيزه لاني بتابع المحل اول باول وبيكون للعماله رواتب وانا بنكفل بكل شي من دفع ايجار وخلافه حصلت محلات كثيره ولاكن الاجارات تتفاوت من 70 الف الى 85 الف الى 100 الف وكل مازاد الاجار كل ماكان المحل موقعه ممتاز جدا جدا طبعا بستاجر فتحه واحد فقط فيه محل عجبني بجانب فندق وفيه امكانية سكن عمال بس مساحته مو كبيره مره وايجاره 100 الف مع العلم ان ايجارات المنطقة اللي فيها غاليه سواء كسكن او محلات .

فيه نقاط بأسردها لكم حى تكون واضحه وخارجه عن سرد الموضوع ويهمني راي كل شخص منكم ممن لديه الخبرة والتجربة في هذا الشأن أن يعطيني رايه ونصيحته .

أولاً : السيولة اللي عندي 200.000 هل هي كافية لايجار مقدم 6 اشهر بقيمة مثلا 80 الف وتلييس المحل وتجهيزة من ديكورات وادوات وغيرة مع العلم ان السيولة (قرض بنكي).

ثانياً : كم بيكلف التشطيب كامل تقريبا لمحل مساحته 16 متر طول في 8 عرض مع العلم اني ماراح اتكلف في الديكورات في البداية والادوات ايضا باخذها مستعمل لان الادوات غير مكلفه في الاساس وكلها ادوات بدائية .

ثالثاً : وش اول شي اسويه بعد استئجار المحل هل يعطوني تاشيرات قبل الرخصه والا بعد .

رابعاً : الطريقة الصحيحة اللي اجيب فيها عمال او بالاصح اضمن فيها عمالي عشان لمن استاجر المحل ابدا اشتغل ومااجلس ادفع الايجار كذا عالفاضي .

خامسا ً بالنسبة للعمال أعرف عامل يشتغل في مطعم اندونيسي طبعا هو المعلم الشيف حقهم ضبط لي معلم ممتاز في اندونيسيا وقال الرجال بانتظار الفيز فقط وجاي ع حسابك , هل العامل مضمون بهذه الطريقة .

سادساً : هل من الافضل اطلع اجيب العمال والا انتظرهم انا .

سابعاً : بصراحة الشي الوحيد اللي مخوفني وهو ان يحل علي ايجار الدفعه الثانية والمحل مااشتغل تمام او نقول اونو وقتها ماعندي قيمة الايجار اللي هي مثلا راح تكون 50 الف فرضا . هل اضع الشي هذا عقبة لي لانه هو اللي مرددني والا اتوكل ع الله حتى لو دخلت في ديون وبعدين اسددها من مردود المطعم .

ثامنا ً : في شخص يمكل مطعم اندونيسي في منطقة اخرى استعد انه يساعدني في التجهيزات الخاصة بادوات المطعم من والى باسعار ممتاز ورخيصة والله يجزاه خير هذا الشخص دخلت مطعه واعجبني شغلهم فجاني فضول اني اساله عن المطعم وطبيعة الشغل والمردود المادي بصراحة الرجال ماتحفظ وتجاوب معي وافادني مع العلم ان اطباقة رخيصة جدا مقارنة بالمطاعم الاندونيسية الاخرى وقالي بنفسه ان دخله يوميا لايقل عن 3000 واحسب بالشهر كم يطلع له الله يرزقه ويرزقنا واياكم جميعا .

تاسعا ً كشخص بادئ في التجارة هل من الافضل افتح اي مشروع واسلمه العامل ويعطيني مبلغ كل شهر حتى اكون نفسي مع الوقت والا امشي على طريقتي اللي سبق وسرتها لكم .

عاشرا ً كيف اضع ميزانية لرواتب العمال لاول شهر ولنرفض كل عامل ياخذ 1500 .

الحادي عشر : كم بيعطوني تأشيرة .


ملاحظة :
اتمنى تشجعوني ومااحد يقولي ابعد عن الدين وغيره لاني بصراحة ماعندي سيولة غير القرض وانا شخص لازلت عازب غير متزوج اي متفرغ ماعندي مشكلة اضغط نفسي واشتغل واسس لي شي قبل زواجي افضل من اني اخلي لبعد الزواج وادخل في خسائر اضر فيها اهلي ونفسي وياليت الله يسعدكم تركزون لي ع النقاط اللي قلتها لك وتعطوني نصايحكم لاعدمتكم واسال الله ان يرزقكم من حيث لاتحتسبون .

سامحوني طولت عليكم وكثرة في الكلام لكن كنت حريص اذكر كل شي حتى تكون الصورة واضحه لكم والله يكتب لي ولكم اللي فيه الخير .