كيفكم انا شالله بخير؟


المهم انا ابي دراسه كامله عن مغسلة السيارات من ناحية التكلفه

والعماله واللات والموقع يعنى دراسه كامله..

اذا سمحتوا الى يقدر يفدينا لايبخل علينا

اخي الكريم
انا اقدر افيتك في التكلفه فقط
شوف جبيبي كل يوم راح تحتاج وايت قيمة الوايت 150 ريال
احسبها في الشهر 4500 ريال...وتقيس الشيء هذا على حسب الشغل عندك في المغسله ... يمكن بعد ماتحتاج كل يوم يمكن تحتاج كل يومين
الشي الثاني إذا كنت تبغى المغسله تشتغل صح لازم يكون عدد العماله اقل شيء اربعه
الشيء الثالث تحتاج صابون واكياس ومعطر سياره واستوب
والشي الرابع في شيء لازم تسويه اعمل كروت للمغسله واعمل فيها عشرة خانات تعباء من قبل العامل بحيث تكون كل عشر مرات غسيل يحصل الزبون على مره غسيل بــ كذا راح تجذب الزبائن

فكرة حلوة الله يوفقكم بس كمان موقع المغسلة يحسب وعادة ايجارات المحلات هيا اللي بتوقف في طريق اي مشروع

صباح الخير
اللي قالوه الاخوان كله تمام..وبمحله..
لكن..
نصيحه مني لك من أخ لأخته إنكم ترسلو أي احد يسوي جوله على محلات غسيل السيارات ويجيب ورقه وقلم ويسجل اسم المغسله ومكانها ويركز بمكانها ويتعب له كم يوم يسنتر كم ساعه بالنهار والليل يشوف كم زبون يجي وكم ياخذون وقت العمال عشان يغسلون سياره وحده فقط ويشوف الضغط غالبا بالليل ولا بالنهار فلو كان بالليل يصير يقلل العمال بالنهار ويخليهم يتناوبون البقيه ولو كان بالنهار يصير العكس ويركز بالاماكن مواقع المغاسل عشان لاقررتو يصير كل شي جاهز عندكم تقدرون تحددون وين تبون تسوون المغسله وبحسب الكم يوم اللي قضووها جماعتكم وسنتروو هناك يكونو عرفو مقدار الدخل ويصير تعرفو ميزانيتكم ممكن كم تكون والعمال كم وكذا تكونو ان شاءالله قدرتم تكونو فكره مجمله مهمه عن المشروع..
اعتذر للاطاله..بس اعتبرت المشروع مشروعي وابديت راي ووش كنت بسوي لو فكرت فيه..
ربي يوفقكم ويسعدكم
اخوك\ احمد عبدالله

صباح الخير وهذي تكمله لك..يمكن تفيدك

كل دراسة مشروع تحتوي على التالي:

• فكرة المشروع
• إيجابيات المشروع
• سبب اختيار فكرة المشروع
• اختيار الاسم المناسب للمشروع
• الموقع & تقسيمات المكتب
• الأيدي العاملة
• مصادر الخدمات ( مزودة بأسماء الشركات والمحلات وأرقام الهواتف )
• التسويق التجاري والإعلان
• شعار المشروع (Logo ) لكل مشروع تم تصميم شعار خاص به
• تصميم الدعاية والإعلان
• العناصر الأساسية لنجاح المشروع التجاري
• استبيان خدمات
• جداول بالأسعار
• رأس المال
• الربح الشهري المتوقع & رسم بياني للربح
عاد عبيها بطريقتك
رأس المال لا يقل عن مبلغ 200000 الف (هذا في حاله انه تبون مغسله اليه متطورة)إذا استأجرت حوش فاضي تماما..
عماله جيده لا يقلون عن 7 عمال ويفضل من جنوب افريقيا..لرخص رواتبهم او تعاملونهم بالنسبه وهو الافضل..70 بالميه لكم..30 بالميه لهم..حسب الاتفاق تزيد او تنقص..
الأشراف المباشر من طرفكم(اخ-زوج-قريب) على العمل ..شي ضروروي ومهم يعني لاتعتمدون على واحد تجيبونه يسنتر من خارج اطار العائله..مجرد اقتراح..ممكن يكون امين وشاطر بس ماراح يكون زي حماسكم وامانتكم واهتمامكم لانه هذا مغسيله سيارات لافواتير ولاشي يحكمها مجرد سياره تنغسل وتطلع..
توفير تغليف لفرش السيارات (عشان العماله ماتوسخ فرش السياره وهي تنظفها من الداخل)وملمعات (خارجيه داخليه)ومعطرات للسياره(اختارو روائح خفيفه حلوة ومحببه مو اي بخاخ والسلام لانه مهم جدا) لأن ماشاء الله شبابنا يحبونها كثير
في ركن المغسله سوي كفتيريا(بوفيه صغيره) (شاي-قهوة-عصيرات-الخ بس اهم شي النظافه)هذا في حاله لو مافي بوفيه قريبه من مشروعكم ومحل زينه سيارات..
بجد اعتذر للاطاله بس تحمست للمشروع ههههههههه
ربي يوفقكم ويرزقكم من اوسع ابوابه...
اخوك\احمدعبدالله

فكرة المغسلة جبارة ولا تنسى القهوة والشاي والجرائد فهي ذات اهمية كبرى في المشروع اخسر في اليوم 50 ريال على اكواب وسكر وشاي وغيرها من المسليات وجرائد وياحبذا تلفيزيون والعربية والجزيرة لتسلية الزبون .

اختي الكريمه السلام عليكم
بحكم انه كان عندي مغسلة سيارات سابقا فعندي نقطتين احب انبه عليها:
النقطه الاولى: المشروع تراه مربح عشان كذه اذا جيتي تستاجرين موقع المغسله حاولي تسوين مدة العقد اقل شي خمس سنوات عشان بعض اصحاب المواقع فيهم طمع اذا شاف المغسله شغاله يرفع عليك الايجار في نهاية العقد اذا قلك العقد مدته سنه لاتستاجرين لانه بيرفع عليك نهاية العقد
النقطه الثانيه:التعامل مع العماله بيكون بطريقتين : الطريقه الاولى ياأنك تجلسين على راسهم (يعني وكيلك يجلس على راسهم مو انتي ) وتراقبينهم وتعطينهم رواتب
الطريقه الثانيه: تأجرين المغسله عليهم بمبلغ تتفقون عليه
وأي خدمه تراني حاضر

اخووي النجم الذهبي كم كلفك مشروك للمغسلة

النجم الذهبي أبي ااعرف كم تكلفت الآلت لرفع السيارة

والله مشروع حلو لاكن محتاجة رأس مال عالي وموقع و أهم شي وأصعب شي فيه
العمالة والعمالة الأفريقية أفضل في هذا المجال
لاكن غالبا ما ينتجون براتب أما بالنسبة راح يكون شغلهم حريقة