خواتي :
اعملوا بالتجارة الالكترونية .. فيه موقع اسمه البوابة الرقمية فيه قسم للتجارة الالكترونية راح يفيدكم كثير فيها ..

او تشترين من سوق الجملة درازن اكسسوارات او شنط او جزم الله يكرمكم او اي شيء ثاني يحبونه البنات ..
وتصورينه وتسوقينه عن طريق وسائل التواصل الاجتماعي تويتر وانستقرام وسناب وغيرها ..
وتطلبي دعم بنشر حسابك من اللي عندهم حساب مليان متابعين

او تسوين شيء يبيه الناس .. اذا لك خبرة في الطبخ سوي لك مشروع ( طبخ البيت ) وصوري طبخاتك وسوقيها على النت وحطي رقم مخصص للعمل تستقبلين فيه طلبات الشغل .. واذا عندكم سواق ترسلينه بالطبخه للزبون ويستلم منه القروش او تتفقي مع سواق انه يوصل لك طلباتك للزباين بمبلغ شهري .. خصوصا ً ان اغلب الناس الان ما يلاقون في بيتهم اكل او طبخه ويبي اكل بيت بدل اكل المطاعم الغير نظيف .. هذا غير ان فيها ربح جيد لك لو قلنا في اليوم بتبيعين الطبخة بـ 40 ريال لـ 5 بيوت على الاقل باليوم بيجيك 200 ريال باليوم يعني 6000 ريال بالشهر هذا للغداء فقط .. واذا فيه مناسبات تسوين بوفيه مفتوح لهم او ذبيحه من 1000 وطالع ..

او تسوين صواني تقديم : للشبكات .. اذا عندك موهبة التصميم والترتيب ..
هالصواني فيها ربح كبير ما تكلفك غير 200 ريال وتبيعينها بـ 600 الى 800 ريال للوحدة
وهي مثل هالصورة تحت :



مع ان هالصورة مش ولا بد ولكن شبيهه من هالنوع يعني فيها اشكال ثانية تقدرين تطلعينها من قوقل وتسوين مثلها بالبيت ..
اذكر واحد من اقاربي وقت شبكته لقى له وحدة بالانستقرام يبيعها واحد سوري قاله بـ 600 ريال
جات وحدة من قريباتي قالت هات 500 واسوي لك احلى منها .. وفعلا سوت وحده افضل منها وخذت الـ 500 منه ولا راح للسوري
وهي ما يبيلها شيء .. خصوصا ً اللي دارسه اقتصاد منزلي يعرفون لهالتصاميم وطريقتها ..

وكذلك صواني تقديم للحلى والمواليد وغيرها ..


الافكار كثيرة وراس مالها قليل بس يبي لنا نعمل ونشتغل و ( نجرب - نجرب - نجرب ) وبعدها بينفتح لنا باب التجارة من واسع ابوابه

اهم شيء :
- التوكل على الله عز وجل قبل كل شيء .
1. الفكرة .
2. الدراسة للمشروع بشكل مبدئ وكم يحتاج .
3. البدء بتجربة براس مال من 500 الى 1000 ريال كحد اقصى - شراء بالدرزن وبيع بالتجزئة بربح صافي / او تصنيع صواني وبيعها بربح جيد .
4. شراء جوال ورقم جديد مخصص للعمل .
5. فتح حسابات على الانستقرام وسناب وتويتر وفيس بوك وغيرها من مواقع التواصل الاجتماعي .
6. تسويق هذه الحسابات ويكون رقم التواصل موثق فيها ويطررح فيها صور للاعمال لجذب الزبون .
7. اي شيء اخر يدعم المشروع تبعك من ناحية توصيل وشحن للمناطق وغيرها ..
8. القراءة والاستماع لتجارب الاخرين من التجارة في اليوتيوب لها فائدة كبيرة لك - خصوصا قناة الغرفة التجارية بالرياض على اليوتيوب فيها تجارب كبيرة لتجار كبار بالمملكة يطرحون تجاربهم وكيف بدأو من الصفر الى ان وصلو للملايين والمليارات .
9. الصبر - الصبر - الصبر + التجربة والدراسة وبيجيك الخير مع الوقت .
10. الاعمال الحرة الصغيرة توجه الدولة الآن وهي افضل مليون مرة من الوظيفة العقيمة اللي مافيها ابداع وحرية وتطوير ذاتي .. والافضل اننا نبدأ ونجرب والرزق على الله عز وجل بعد توكلنا عليه .


الله يوفقكم

شوفي وش انتي مبدعة فيه كيك أكل جيبي كفرات حق الجوال وزينيها وسوي لكي حساب انستقرام وانشري بضاعتك ومشعل العنيبي الملقب بالاسباني ماقصر سوا حساب دعم الشباب ينشر لهم اعلاناتهم اذا كانو افراد

انا كان عندي فكرة سبق وان طرحتها في بعض المنتديات التجارية
وانا فكرتي اختصار

المطلوب عدد (2 ) بنات او اكثر
النشاط عمل حلويات بيت مميزه ومعمول .....الخ
وتكون جادة ومستمرة في عمل الحلويات لضمان الاستمرارية
المكان الرياض
وهو عبارة عن محل فتح واحدة او فتحتين يعمل ديكور مناسب واسم مناسب والمطلوب عامل واحد من الجنسية الفلبينية او النيبالية
ويقوم المحل في استقبال طلبات الحلويات المنزلية التي تم اعدادها من قبلكم ويؤمن سيارة صغيرة لاستلام الحلويات والمعجنات المتفق عليها وكذلك يعمل بروشرورات وتوزع على الاحياء والاصدقاء مع استعداد تمام لتلبية الطلبات وهكذا
هذا المشروع باختصار
اما شغلة التكاليف والارباح وخلافة فيتم وضع الاسعار قبل وصولها او بالاتفاق وتوزيع الارباح بيننا وهكذا

تحياتي

تاخذ دورة خياطه وتتمكن منها وبعدين تسوي تصماميم خصوصا على الفساتين فيها دخل كبير جدا .. طبعا بالبداية تسوي تصماميم على فساتين جاهزة مثلا تضيف تصميم او حركة حلوة على فستان جاهز تخلي منظره افضل واحلا وتنشره بين اللي حولها من اقارب واهل واصحاب وجيران وراح تنتشر سمعتها بين الناس بسرعه اذا كانت مصممة بارعه وبعد كذا ممكن تقدر تصمم وتنتج فساتين من تصميمها وابداعها

هذه مجرد فكره عابرة مدري تنفع او لا ..

عموما بالتوفيق ..

من كثر ما اسمع عن الفساتين واسعارها جنيت من الفائده اللي تطلع من وراها .. لي صاحب ( يقول ) يجيبها له الموزع مثلا قمية الفستان بمئه وخمسين ويمكن اقل ويعرضها بالمحل بمبلغ ستميه ريال واكثر يعني فايده كبيره بالفستان الواحد وحنا ماشاءالله ياكثر مناسباتنا وكل مناسبه بفستان جديد .. والناس تشتري بسرعه وتخلص البضاعه سريع سريع يطلب غيرها ..

الصراحه انهبلت يوم سمعته لدرجه ان ودي اصير خياطه ههههههه