خطاوي اعمى

لبرد والخوف والتشريد والساري
والعزف ع النـزف والآهات والظلما


وأنفاس سلمى وانا ..( لا ).. صدري العاري
كلما تنفّست ضيق .. تنفّست (سلمى)


خمّارة الحرف

ويني ؟

وينها دياري؟

تعبت ارتّب وجيه الناس ع الاسما
الأرض .. كف التعيس ،، وخطوتي (قاري)

مع كل خطوة

أضيع

وانجرح

و ادما

خطاوي اعمى .. بــ ليل اْظلم من اقْداري
جيتك وكُوني إذا جيتك (عصاة اعمى)


اشعلك ظلما ،، تكسّر خاطر أنواري
والقاك ظلما .. تودّيني عيون الما


واشربك واضح وازيد اشربك متواري
خلف الظما بس مهما أشربك أظما


مهما تكونين .. أكونك غُربة افْكاري

تعبت منْكُ

ومن افكاري

ومِنْ

مهما


عبثت أصابعك بشفاهي وبازراري
يا ضيقة الصدر لو ما فكّته .. لو ما


اتنفّسك ذنب واستغفر .. وانا داري
اذا تنفّستك أغرق بس اكون اسما


عشان اعلّم ذنوبي .. قيمة اعذاري
وآعلّم (الضي) وش هي قيمة (الظلما)