انا موظف مساعد اداري بمدرسة (مسمى الوظيفة ليس مناسب لشهادتي الجامعية) على مراتب حكومية تعينت بالسادسة ولي 5 سنوات خدمة ولم تتم ترقيتي للسابعة وراتبي الآن 7200، شهادتي جامعية حاسب آلي و عندي دبلوم تربية و لغة انجليزية ممتازة.
هنا مميزات الوظيفة ساعات عمل اقل، واجازات كالمعلمين.
...
جائني عرض من شركة الكهرباء، محلل حسابات تجارية (مسمى وظيفي مناسب لشهادتي الحاسب الالي) على الدرجة 49 (بقي درجتين لمرتبة مشرف) راتبها الاساسي 10،000 وتقريبا الاجمالي سيكون 11،900.
...
حسمت امري، لكن بقي يومين على توقيع العقد، واحب ان آخذ رأي اخوتي العاملين بالقطاع الحكومي والقطاع الخاص لاستفيد من خبرتكم ولعل تعم الفائدة للجميع.

رايي ان تبقى بوظيفتك لو انك موقد التعب والشقى وتبي الراحة حتى لو انه راتب قليل, لأن لازم تعرف ان الشركات الخاصة قد مايعطونك راتب عالي قد مايكرفونك كرف ويحللون الراتب منك تحليل قبل لاتستلمه,
لكن لو عندك إلتزامات مالية مثل قروض, إيجار بيت, قسط سيارة, مصاريف أهل وعيال...إلخ, فتوكل على الله وروح الشركة.

استخير ربك
والله يوفقك

انت تعرف نفسك اكثر.
هل انت انسان تحب التحدي والتطور او انسان مالك حيل

الراتب كلما زاد زادت مصاريفك صدقني مايفرق كثير


الساعات راح تتغير الجهد راح يتغير
لازم تتعلم اشياء كثير وتطور نفسك باستمرار وكانه سباق لاينتهي ان هديت سبقوك


راح تنقلب حياتك في القطاع الخاص وتصير تعيش لتعمل ماتعمل لتعيش.

عني انا احب القطاع الخاص والتحدي واكره الركود وصرت مدمنة شغل، مارتاح او اخذ اجازه الا لما اخلص مرحلة وانجز اشياء

لو اخذ اجازه وانا ماخلصت بعض الاشياء مارتاح
يعني اصبح الشغل هو همي

شركة الكهرباء قطاع خاص !! ؟؟

شوف وانا اخوك محد يقدر يعطيك الاجابة اللي تناسبك لان كل شخص وظروفه وميوله ..

يعني ، في اشخاص ماشاءالله حريصين على دواماتهم من ناحية حضور وانصراف وانضباط وبذل مجهود كبير في العمل ويحاول يطور نفسه بالدورات التدريبية ويتحصل على شهادات تفيده علميا وعمليا وهذه النوعية انصحهم بالقطاع الخاص او بالشركات شرط انها تكون شركات كبيره ومعروفه وفيها نظام منصف ومميزات زينه وسلم وظيفي واضح ..

اما اللي يداوم اي كلام وانسحابات ومزاجات وغيابات ومشاكل بالعمل ولا عنده نية للتطوير وكل همه بس متى يخلص دوامه عشان يروح البيت انصحه بالقطاع العام لان العمل فيه تقريبا ( شبه فلــتٌه )

اول شي وانا اخوك راتبك ماشاءالله ماهو ضعيف انا استغربت من العنوان وقلت شلون حكومي وراتبه ضعيف يعني توقعته الفين او ثلاثه
مؤهلاتك زينه ماشاءالله واذا تشوف راتبها ضعيف ووانت ودك بشي اعلا واكبر روح الله يوفقك بس اهم شي تكون عارف نفسك انسان عملي ومجتهد ومنضبط في دوامك .. ميزه الشركات ان الترقيات ماهي على مده الخدمه ، بالعكس تعتمد اكثر شي على انتاجيه الموظف والتزامه وانضباطه بالعمل وحسن سيرته يعني على مجهوده ويقابلها تأمينات طبية وبدلات و و و

اما القطاع الحكومي سلمه واضح ويختلف عن القطاع الخاص بالامان الوظيفي والاستقرار رغم تأخير الترقيات احيانا وحتى لو كنت مجتهد ومكافح لان مافي رقابة تهتم بأنتاجيه الموظف .. حتى بعض الشركات فيها امان وظيفي ولكن برضو ماهي مضمونه مثل الحكومي ..

انت ادرى بنفسك ممكن بمؤهلاتك هذه تحصل شركات افضل من الكهرباء بعشر مرات ورواتب جامده لك حرية الاختيار بين الحكومي والخاص استخير وشوف وضعك هل انت ملتزم بالدوام او ( مبزوط ) وذيك الساعه تقرر

اعتذر على الاطالة بالكلام .. كل التوفيق لك والله يكتب لك اللي فيه الخير

هو فرق الراتب مغري ماشاءالله و المسمى الوظيفي كذلك مقارنة بوظيفتك الحالية و شركة الكهرباء من اقدم الشركات في البلد وشبه داخلة مع الحكومة مدري عن دوامهم كيف لكن اتوقع انه مريح بغض النظر عن عدد الساعات 8 او 6 ، صراحة اذا انا مكانك بقبل بالعرض وانا مغمض بدون ما اشاور احد .. شد حيلك و الله يوفقك