السلام عليكم ورحمة الله وبركاته

يا اخوان انا رجل الله فتحها علي وصرت اشتغل بالتجارة متنوع بعد ما كانت موسستي مديونة للتامينات الاجتماعية وكنت من وظيفة لوظيفة المهم رجعت بطقطقة على تجارة بيع وشراء يعني هات وخذ وتركت مجال المقاولات والحمدلله عينت خير ورجعت موسسة المقاولات وسددت مديونتي واستقدمت عمال وكل وضعي بالسليم صار

قبل فترة بسيطة كلمني شخص يدعي انه مهندس سوري وانه في مشروع ويحتاجون 50 قلاب بسعر كذا لو انا قدرت اوفرهم بسعر اقل المكسب الباقي بيني وبينه قلت حلو عطاني بيانات المشروع وكل شي ورحت تواصلت مع معارف لي ووصلوني لصاحب شركة نقل كبرى مباشرة للرجال يوم شافني وكلمته وعن المشروع قال لي خلاص تم وش مطلوب الحين مني قلت يبون بس استمارات السيارات يعني القلابات وفورا كلم الي عنده وجابو لي صور 50 استمارة و 50 اقامة و 50 رخصة للسيارات وانا اخذتهم ومبسوط وفرحان لان فيها صفقة خيالية كانت ومصدق انا وركض للشرقية عند هذا الي يدعي انه مهندس وعطيته الصور وقال لي حلو الحين اليوم او بكره صيغة العقد تكون عندك قلت تم اجل انا بجلس بالشرقية

وفعلا مر يوم يومين 3 وكل يوم يجيني بعذر شكل ورجعت الرياض على امل ان الاسبوع المقبل يوصلني صيغة العقد لاجل اوقع مع شركة النقل وبنفس الوقت منحرج من الرجل الي امن لي وعطاني الاستمارات ومنحرج من قرابتي الي هو صديقه ووصلني له وبدت الشكوك تدخل لي انه الموضوع كذب او شي واتفشل وهذا الي صار المهم نزل بعد فترة واتصل علي ها السوري ومعاه 3 رجال سعودين الواحد منهم معاه 3 جوالات وبس وحنا جالسين يسولفون عن مشاريع وعن عقود والتزامات والخ والخ والخ وطبعا السوري من جهة يعتذر لي ويوريني اوراق وانه الشركة لقت سعر ارخص واخذت ووقعت العقد وكان منحرج وما الى ذلك

المهم قالو نبي نعوضك وها المره السوري واثنين سعودين من الثلاثة انه في مشروع مقاولات ضخم ووروني الاوراق وكل شي وانه بس المطلوب مني ان موسستي يكون بها 40 عامل وفني وانزل فورا لنجران لتوقيع عقد المشروع مع جهة حكومية هناك وابدا بس شرطهم بعد توقيع العقد اعطيهم نسبة وكذا وقلت مافي مشكلة يا بخت من فاد واستفاد


وفعلا انا موسستي الحمدلله بها اكثر من 40 وقطعت تذكرة ونزلت واستقبلني هناك شخص من الجهة وجلس وارتحت انا انه الموضوع هذا صدق مو كذب يوم رحنا لادارة المشاريع بهذه الجهة طلع الموضوع ماله اي دخل بالي قالوه لي الموضوع كان باختصار تشجير الارصفة بشارعين بنجران !! اصغر موسسه فيها 3 عمال تسويها ومبلغها طفس الطفس مو حق جيتي والفندق الي اخذته ورجعتي بامانه قلت بالله هذا الموضوع وكذا

المهم جلست مع صديق لي لبناني يشتغل مهندس بشركة سعودي اوجيه وهذا صديق من سنين واعرف وضعه زين ويعرفنا وقال لي في مشروع بسعر فلاني انت قدم بسعر فلاني عشان تاخذ المشروع وفعلا صار وكل الامور طيبة وفجاءة يتصل علي يقول لي ترا انت عليك بلاك ليست بالشركة عنا هون كيف ليه ما عمري اشتغلت مع سعودي اوجيه ولا سويت معهم اي ارتباط ولا سويت شي كيف يصير علي بلاك ليست وكيف وكيف قال لي نبي نتقابل لازم اليوم وفعلا المغرب رحت له عنده بالبيت وجلسنا ويوريني الابروف انه تم رفضي بسبب اني بلاك ليست ويسالني شوف وش مسوي ما مسوي فا قلت له الامور الي صارت لي هذه وجلس كذا قال اهااا طيب طيب ما عليك ويتصل على صديق له ويفهمه الموضوع وقاله صديقه خليه يحول موسسته الى شركة ويدخل معاه شريك ويحط اسم تجاري لان تقريبا صارت المنشاة حقته بلاك ليست باكثر من مكان والسبب ها القروب الي في اكيد منه قروبات كثير

هدفهم الاول والاخير تسجيل المنشات ببلاك لليست لاجل بعدين تتقلص عدد المنشات الى النص او اقل من النص والله اعلم اذا ياخذون فلوس ورواتب من شركات وجهات حكومية ممكن لعمل مثل كذا امور فا انتبهو يا اخوان انا قلت لكم قصتي الان بالموضوع هذا لاجل الانتباه واي مشروع يكون عبر :

ادارة المشاريع بالشركة او الجهة المعنية

اخذ صيغة العقد والاوراق المطلوبه للمشروع والذهاب الى المشروع ورؤيته على ارض الواقع والتاكد ان المشروع متاح لدخول شركات وموسسات له

الانتباه من بعض السورين والسعودين للاسف لان من يقودون هذه القروبات حاليا وكثير من الاصدقاء تعرضو لما تعرضت له

اي شخص يتكلم معك بمشروع لا تبدا وتتصل وتكلم وتجهز الى عندما تتاكد فعليا من الشخص والمشروع


هذا ما حدث لي وحبيت انبهكم انتبهو يا اخوان موضوعين بسيطين ومجرد كلام فورا تسجلت ببلاك ليست بعدة شركات