بسم الله الرحمن الرحيم ..

كل ما يكبر الانسان تصغر حاجات كثيره فعقله كان معتبرها شي كبيررررر بالنسبه له
انا زي اي بنت عندي احلام كبيره وكثيره شي منها صرت احسو ابعد من المستحيل وشي اي شخص مقتدر يقدر يحققها وببساطه ..

كل ما اتقدمت فالعمر تقل وتتلاشى احلامي اختنقت في كثير من اللحظات حسيت اني عاجزه عن تقديم ابسط الاشياء لمن حولي حتى الابتسامه كانت ما تفارق وجهي الآن بصعوبه ابتسم وعيوني تدمع انا لساتني فالعشرينات لكن تفكيري وعقليتي صارت فالستينات كبرت وصرت افكر فالماديات المستحيله ...

تعبت اضحك على حالي وانا وضعي ما تغير فيه شي سنين عدت وانا نفس حالتي بل زاد تعقيدا والحمدلله على كل حال اصعب شي لما تكون انت مصدر السعاده لاشخاص والآن انت النكد والالم والحزن لهم نفسيتي تعبت بسبب اني اجامل واجامل على حساب نفسي والأن وصلت لوضع صعب اني اجامل فيه حتى نفسي ..

عاجزه جدااا والفقر دمرني ودمر احلامي و مستقبلي حتى دراسه او دوررات استفيد منها ما قدرت ادرس بسبب الظروف والفقر اكره اطلب من شخص وانا اعلم انو محتاج اكثر مني فاضطر اكبت كل رغباتي وابتلعها و اقووول ما انكتبت ليا
سبحان الله ساعات تجيني قوه واتحمل وساعات طول الليل ابكي وبالساعات من شده قهري ..

خلاص تعبت من الانتظار وعرفت انو ما راح يتغير شي ف وضعي بس نفسي ترجع ابتسامتي وحيوتي معد ابغى افكر فالدراسه والفلوس والمستقبل لأني جالسه اتعذب تحت مخدتي كل يوم و عالفاضي ما راح اطول شي ...

والحمدلله على كل حال مجرد فضفضه لأني اختنقت وماعندي احد احكيلو عن اللي بداخلي ...

حبيبتي واختي في الله

احلامنا اللي بالصغر كنا نشوفها شي عظيم وكبير ونتمنى نكبر لجل نحققها
ولما نكبر نلاقي ان احلامنا حتى وان كانت يسيره وسهله لكن صعب تحقيقها بسبب الظروف اللي تحيط فينا

وصرنا نتنازل عن الاحلام بحجة الاولى والاهم فيها .لحد ماتتقلص الاحلام شيئا فشيئا

حبيبتي
امر المسلم كله خير
لما ننظر للامور من زاويه مغلفه ومن ثقب صغير
شعور يبعث في انفسنا الالم
وشعور بالنقص
وشعور بعدم الاكتمال كباقي من هم في عمرتس
ونغلق ع انفسنا الظلام وما نسمح للامل واشعة الشمس في التسلل لحياتنا

حبيبتي
امر المسلم كله خير
وربي صرف عنتس الامور هذي كلها لان اكيد فيها خير
وربي كاتب لتس الخير والرزق لكن يبي منتس الصبر
يبي يشوف عبده كيف صبور وكيف يلح بالدعاء وكيف يتقرب له
وماينساه بوقت الرخا وبوقت الشده

الانسان لازم يطلع من القوقعه اللي عايش فيها
يفتش في نفسه
اكيد وحتما راح يﻻقي حاجه تفيده
حاجه يفيد نفسه ويفيد غيره

والابتسامه ماتطلع منتس الا باقتناع
ابتسمي كون رب العالمين وعد عباده الصابرين
ابتسمي ان بكرا اجمل بإذن الله
ابتسمي انتس ولله الحمد بصحه وعافيه
وانتس ماتشكين من شي

ابتسمي
في امور كثيره بحياتس تلزمتس ع الابتسامه
فكري فيها وتمعني في اللي حولتس

وجود الوالدين والاهل نعمه تستحق الابتسامه
امور كثيره لما تفكري فيها راح تقتنعين من نفستس ان الابتسامه واجبه
حتى بوجود المعوقات اللي تحيل بينتس وبين تحقيق احلامتس ومتطلباتس

بكرا اجمل لتس باذن الله
الزمي الاذكار والقران

ابحثي عن نفستس في نفستس
وكوني لتس من الشي اللي تحبينه وتتقنينه مهنه او عمل يسعدتس ويسعد اللي حولتس
ويرزقتس منه

اياتس تحزنين حبيبتي
ابتسمي وثقتس بالله ويقينتس الكامل فيه
استغفري ورددي دايم ( لا اله الا انت سبحانك اني كنت من الظالمين )

اسعدي نفستس بنفستس لجل تسعدين تللي حولتس
سعادتس احيانا تكون سبب في اسعاد الغير


وحنا هنا خواتس مابه شك

احترامي حبيبتي

بنتن لقحطان ..

الله يسعد قلبك كلامك لطيف ومثل البلسم على قلبي كل حرف كتبتيه انت صدقتي فيه واوافقك عليه لأن كل ما ذكرتيه كنت اقوله لنفسي واصبرها واصبر من حولي بس حالياً انا واصله لمرحله وجعت قلبي انا الآن جدا ضعيفه وهشه دمعتي معد اتحكم بيها ما عمري بكيت عند احد ..
و حتى احلامي معد ابغاها هيا سبب الامي وتعاستي بعد ما كنت ابتسم من اجلها الآن اكره حتى اتخيلها بس ابغى ارجع زي ما كنت ..

اشكرك مره ثانيه اختي الغاليه اعطيتيني من وقتك اسئل الله لك التوفيق والسداد في الدارين ...


جريح شعور ..

جزاك الله كل خير ردك جميل ومريح للقلب الله يبارك فيك ويعطيك حتى يرضيك اسمي مملوء بالتفاؤل لأن انا كذا وشخصيتي كذا من صغري عندي امل وطموح وثقه ويقين بربنا لكن حاليا ما ادري ايش اللي أمر فيه شي متعب جداَ انا مني عارفه نفسي ليش وصلت لذي المرحله والحمدله على كل حال....

ستفرج بإذن الله

انا افداتس
ويسعدتس ي رب
الحياه صعبه مابه شك
بس فيه جوانب وزوايا سهله حنا نتمسك ونحاول نعيش الحياه بالسهل
والسهل يجر وراه السهل لحد مالصعب رب العالمين يسهله وييسره لنا
الحياه بكل مافيه من الم الا انه فيه متعه ولذاذه
وهو الصبر والثقه بالله
وغير كذا رب العالمين اعلم باحوال عباده وسبحانه امور عباده كلها بين ( كاف ونون )
ابتسمي حنا كلنا حولتس ومعتس

......

ايفوني خربان

ي بعد عمري
تسلمين لي غلاتي
شكرا لتس خجلتيني
وما اتعداتس بالحكي
كلامتس سليم

احترامي

الله يسر امرك ويفرج همك ويفك ضيقتك ويفتح ابواب الخير بوجهك .. الكل لابد يعاني من شي والنفوس ضاقت ولكن رجائنا بالله سبحانه مايخيب مهما اشتدت علينا الضيقات ..

وتذكري .. كل ما اشتدت الاوضاع وزادت الضيقات .. كل مايقرب الفرج اكثر واكثر

اكثري من الدعاء وخلي املك بالله كبير ..

وقولي معي : يافارج الهم .. وياكاشف الغم .. فرج همي ، ويسر امري ، وارحم ضعفي وقلة حيلتي ، وارزقني من حيث لا احتسب يارب العالمين ..

الله يفرجها علينا وعليك يارب ويسر امرنا وامرك ويفتح لك ابواب الخير والسعاده وراحه البال ويشرح صدرك ..

اشكرك اخي الفاضل وجزاك ربي خير الجزاء ..

والله ييسر امورنا جميعاً ويبعد عننا الضيق والاحزان ..

ربنا كريم ..

يافارج الهم .. وياكاشف الغم .. فرج همي ، ويسر امري ، وارحم ضعفي وقلة حيلتي ، وارزقني من حيث لا احتسب يارب العالمين ..


دعاء رائع اشكرك ..

مساء النور والورد
اللي عندك يمكن
اكتئاب وهذا يجي اغلب اوكل البشر ويمكن لا
يمكن سبب اللي حولك
او يمكن انتي ولاتزعلين بتكفخني ههههه
تبين نصيحتي اعتبري العمر مجرد رقم
شوفي العجيز مريم نور عمرها ٨٤ وتقول
احس عمري ٣٥ وتسولف الى الان في
سوالف تدخل مخ وفي لا بس حافظت على نفسها هذا مغزى
وادري مجتمع هو سبب انهم يحسسون البنت
اذا كبرت خلاص عجزت مجتمع مريض
ماعليك منه وكبرتي خير ياطير انك بصحه
جيده ومحافظه علی نفسك الف حمد وشكر
بسلامتهم هم وتفكيرهم

ساعدي نفسك بكل ماتقدرين انك تطلعين من هل دوامه
الفقر كلنا فقراء مهو بس انتي توظفي
بيصير وضعك افضل
شغلي مخك ادخلي قسم مشاريع وافكار
في افكار بسيطه وماتكلف
وتقولين عاجزه حبيبتي في معاقين وهم
بكراسيهم ماقالو حنا عاجزين
ونفسيتهم تهبل وعايشين حياتهم
الوظايف ياكثرها الحين اذا توظفتي اقلها
تطلعين من عند مخدتك
تابعي قسم توظيف هنا ا
و اذا كنتي بالرياض روحي مكتب عصر الاريبيه للتوظيف او تلقينهم بتويتر
او اقرب موارد بشريه
وفي اشياء بالحياه ماتحتاج فلوس
منها الضحك زيارة الناس الايجابين او
حتكاك فيهم اقلها تكلمينهم لاين مجانا
وفي اشياء بين ايدينا وحنا مو مقدرينها نعم لاتعد ولاتحصى
التنفس النظر الاهل انك تنامين ب امان
الاكل
حبي الحياة وانبسطي حطيلك جدول يومي بجوالك وطبقيه
تقربك الى الله اهم شيء تابعي باليوتيوب ابراهيم الفقي وغيره من ايجابين حملي كتب اراده وغيرها
اكتبي باليوتيوب فيلم السر نصه صدق ونصه خبال هههههه وفي كتاب لهم المهم قسمي يومك للعنايه ببشرتك وشعرك لو ب اشياء من مطبخ بتلقين خلطات بالنت لين تدوخين سوي رياضه كيجل وسكوات وكثري
قراءه وزيدي المعرفه تعلمي لغه اذا والدينك
عايشين خصصي وقت لسوالف معهم اذا
يمدي اقلها اطلعو للحديقه حاولي تستمتعين
ب اقل اشياء واهم شيء
الوظيفه اوتجاره صغيره تبدين فيها
ضيفي بسنابك