السلام عليكم ورحمة الله وبركاته
منتدى حلول البطالة "
طبعا البطاله اللكل يشتكي منها سوى بنات او شباب
وتأثيرها ع الشباب اقوى منا يالبنات تحسسه انه انسان مقيد
وبنفس الوقت البطاله فيها شي حلو انها تخليك تفكر انا موهوب بأيش ؟
ايش الشيء اللي مبدع فيه ؟!
انا ماخلييت ولا شي مافكرت فيه كل المشاريع خطرت ببالي
وكلها محتاجه دعم مالي"وذا الشيء اللي يحبط الجميع .
...
حابه أقدم فكرة مشروع خطر بالي "

احنا كمجتمع سعودي فينا فطرة حب الخير بشكل كبير
من يوم نحنا صغار نحب نعطي ونتصدق حتى البخيل تحصله يعطي
لو بالقليل الكل يشوف ذا الشيء بعينه ولله الحمد انه فيناا خيير
المشكلة اللي تواجهه كثير فينا نفسه يتصدق ونفسه يعطي
يبغى مكان مضمون موثوق لأن كثير ناس تستغل ذا الشيء
باللإرهاب والفساد بديرتنا فالجمعيات الحمدلله ماقصرت
فرضاً : انا ماعندي غير 30 ريال وابغى اتصدق فيهاا
الجمعيات أغلبها تحويل واغلب اوقافهم من 50 وفوق
ففكرت لو نسوي (قروب ) جمعيه صغيرة
بنات وشباب ’ طبعاً راح يكون ذا التعاون لهدف " الأجر ..ودخل مادي
قوله تعالى : *(وتعاونوا على البر والتقوى ولا تعاونوا على الإثم والعدوان)*
ونسوي مشاريع تطوعيه وبنفس الوقت ماديه لنا " حد يبي يتصدق بإفطار العمال الصباح يحول لنا المبلغ
نحنا نتكفل بشراء وتوزيع الكميه اللي يبغاها ونوع الفطور اللي حاب "
او مثلا سقيا ماء "افضل الصدقات سقيا الماء وإطعام الطعام " وبالبرد نوفر كسوة الشتاء
يعني افكار لصدقات واللي عنده فكرة وحاب نسويها له بنعملها
ذا المشروع ممكن تتكفل فيه مجموعة بنات وسائق للتوزيع فقط
بس انا ابي الخير للشباب انه يكسبون ويكون لهم دخل مادي "
يفيدنا انه يشتري الاغراض ويوزع ذي الصدقات ع العمال ومنها يأخذ اجر ماراح يتعب على الفاضي
والبنات نستقبل الطلبات بالواتس نرتبها نسوي منشورات اعلان لنا وننشرهه ممكن بالبداية نحتاج
ندفع مبالغ لمشاهير يعرضوا اعلان لنا بصفحاتهم وهكذا
اكيد راح يكون المشروع ببدايته صعب والأرباح قليلة جداً " بسس افضل من العطاله وانتظار الوظائف
ويمكن بعملك ذا ربي يفتح لك باب رزق وتتوظف ويمكن ذا المشروع يكبر ويصير جمعيه معترف فيها
محد يعلم الغيب "
المطلوب اشخاص يكونون جاديين بعملهم وحابين ذي الفكرة واهم شيء الأمانه الأمانه الأمانه
اذا مو عاجبتك الفكرة او حاس انك شخص مو أمين ابعد عنااا"
ومراقبة الله اهم شي "
مدري عجبتكم او حسيتوا انها شيء سخيف بس والله اكتب وانا متحمسه
اللي خلاني اطرح ذا الفكرة وابي حد يشاركني ويدعمني
لأني والله افكر اتصدق ع نية ابوي الله يرحمه كل يوم نفسسي ماتنقطع عنه الصدقات
ولا يوم وبنفس الوقت ماقدر ولا تتوفر لي الفرصة واكتفي بالدعاء له "
فقلت لو في ناس كذا وموثوق فيهم وأمينين
يصير اقول لهم نوع صدقتي اللي حابتها وهم يتكفلون بالباقي "
(معليش على الكلام العفوي ) ..
اول مرا اكتب موضوع فأحسه مخربط
المهم توصل لكم الفكرة "
واذا حد عندهه خبرة وبينتقد " ينصح " اياً كان يقول لايردهه اإلا لسانه.