توّلم للسفر جفنٍ على درب السهر مجبور
يخفّي عن بعَض حلمه قبل يرحل بعَض ياسه

وانا قبله مسافر بين أراضي وعدي المهجور
معي له كلمتين ودمعتين ابعين عسّاسه

و لي وجهٍ تعابيره بها ملح الحزن منثور
شتاته لو نثرته .. تجمّعهْ نظرات جلاّسه

حبيبي.. كثر ما تخطي علي بقول لك معذور
كثر طول إنشغال البال فيك وكثر هوجاسه

أحبك.. وانت تحكي عن خضوعك لي بكل غرور
مثل من يبكي دموع المذلّه رافعٍ راسه

أحد يصحى على صوتك ولا يصبّح صباح النور؟!
أحد يغفى على صوتك ولا يحلا له إنعاسه ؟!

أحد يقرا وصوفك لا ضَحَكت ويكتبك بسطور؟!
أحد يشرب دموعك لابكيت وينثرك كاسه ؟!

قبل ما احفر لشعري ياحبيبي فـ الضلوع اقبور
تعال تضمّك حروووووفه قبل مايلفظ أنفاسه

لك الله ياحبيبي صار لي يمكن ثلاث شْهور
أسيّل بالشعِر دم القلم وتموت كرّاسه

وانا ماهمّني لو يوم صرت الشاعر المشهور
إذا ما اطرب قصيدي من قراه ولامس إحساسه

عسى بيت القصيد إن ما بنى له فالصدور اجسور
وحرّك في نفوس الناس حاجه .. ينهدم ساسه

إذا ما كان من صادق معاناه وعميق شعور
عسى ريح الشمال يطير به لا هبّ نسناسه