السلام عليكم يا أخوان انا بالرياض عاطل وحاب أشتغل باي شي وماعندي راس مال الا 500 ريال وسوق الخضار كله اجانب ومحتكر وماعندي وانيت ماعندي غير جيب شورو علي أشتري خضار من وين أو جح ووين ابيعها وهل الجيب ينفع لو كميه صغيره للعلم انا مقدر أطلع للسوق الفجر بسبب المدارس ومرتبط باخواني وبيتنا بعيد عن سوق العزيزية للخضار

اطلع الساعة 9 الصبح لسوق العزيزية .. وانت معك سيارة حمل بـ 300 ريال ( جح - بطيخ ) هذا وقته والناس تدوره الآن
عب الجيب حقك بطيخ ورح للبيت خلص امور اهلك وبعد صلاة العصر ابسط عند اقرب مسجد وافتح شنطة الموتر وقول للناس ( بطيخ على 15 ريال جح على 15 ريال )
انت بتشتري الحبة بـ 5 ريال او اقل او بالكثير 7 ريال وبتبيع الوحدة بـ 15 ريال يعني ربح من 8 الى 10 ريال
يعني لو شريت بـ 300 ريال وبعتها كلها يعني ربحك صافي من 600 ريال الى اكثر او اقل بشوي .. صافي ربح يعني مدخل راس مالك اللي هو 300 ريال وفوقها 600 ريال ربح .

وترى هذا وقت البطيخ والسوق استغلال الفرص واوقات المواسم ..
وخل هالشيء بداية لك .. وبعد ما تطلع ربح ابدأ بتجربه ثانية لحد ما توصل لـ 5000 ريال وبعدها اشتر لك ونيت وخله مخصص للشغل عليه ..

لا تقول ما وما .. ابو يمن يجي من بلاده ما عليه غير ثوبه .. ويدخل في اليوم من 700 الى 1500 ريال من هالخضار ..
انت اولى منه .. والشغل مهب عيب لكن العيب اننا نجلس بالبيت ونقول الاجانب والاجانب ..
ابدأ والرزق عند الله ما هو بيد عبادة .. توكل على الله وابدأ وكل التجار بدأو بفتات المال .. والان معهم ملايين
صالح كامل الملياردير يقول : بديت ببسطه بليلة على كورنيش جدة .. والان عقارات واموال بالمليارات عنده

ابدأ وتوكل على الله والله بيرزقك ..

الله يوفقك ويرزقك من واسع فضله

جزاكم الله خير ع اردود والله يعين

اسأل البوفيهات والمطاعم اللي حولك اذا يحتاجون أحد يوفر لهم الخضار يوميا واذا وافق أي واحد منهم اسأل عن احتياجاتهم اليوميه وكم سعر كل نوع عشان ترجع انت للسوق وتحاول تجيب بسعر منافس تقدر تكسب به كم مطعم يتعامل معك بعدين.. وأسأل الله لك التوفيق والرزق الحلال المبارك