كل مابغيتك لاضوى الليل ماألقاكـ؟

ساهيةالبال · #1 (**permalink**) 18-10-2008, 01:25 AM

كل ما بغيتك لاضوى الليل ما لقاك
***
تطيب نفسي لابدا النور واغفا
***
من حر ما فيني على وجد لاماك
***
تعال وامرح في ضلوعي وتدفا
***
الله يصبرني على الشوق وانساك
***
متى على الله جمرة الشوق تطفا
***
مدري وش اللي من وراه اترجاك
***
ما عاد باقي في شواطيك مرفا
***
فرشت لك درب المواصيل لرضاك
***
وخليت لي روس المراقيب منفا
***
واهديت لك قلبي على كف يمناك
***
واهديتني جرح عميقن وشلفا
***
بكره تناديني وانا واقف هناك
***
واشوف هملولك على الخد يكفا
***
لا ناض براق الجفا وانتثر ماك
***
ما عاد تنفع دمعتينك وتكفا
***
لا تشقي ركابك ولا تتعب خطاك
***
رجلك على درب المقفين تحفا
***
مانيب متعذب على طول فرقاك
***
حاجه بسيطه كلها ايام واشفا

الشاعر

محمد سعود العضياني