قصيدة تحكي الواقع المرير للبعض هداهم الله ونسي أن هناك الكثير من الأسر بأمس الحاجة للمال


لا والله جهلتـوا قيمـة المـال يـا هـل المـال
ولا حـد(ن) درا منكـم بـقـدره ومصلـوحـه

لون الجهل ما هو مخيـم علـى الجهال
مـا سقتـوا عبـث ستة ملاييـن فـي لوحـه

ما خفتو من الله عالم الغيب والاحوال
ما ربيتو نفوس(ن) على النقص مشفوحه

لونـكـم دخلـتـو فـالـحـواري يـمـيـن شمال
مـن الصالـحـيـه لا علـيـشـه لا منـفـوحـه

تشـوفـون مــا يـثـر عـلـى دمـعـة الرجال
وندمـتـو عـلـى غلـطـات يـــارب مدموحه

بعـضـكـم يـــدوج فالـمـطـارات بالبطال
من اســــبانيا للصين لجنيف للــدوحه

يــدور عـلـى عـقـدة خـنـا مالـهـا حـلال
مـا دور عـلـى الفنـجـال الاشـقـر ولا فـوحـه

وبعضكـم صرفـهـا فــي جـمـال ورا جمال
وهـو ماعرفـهـا الـعـام لــو جـتـه ممنـوحـه

تقـولـون نبـحـث للتمـيـز بــدون اشكال
وانـا اقــول ضاقـت مـنـكـم اقـلــوب مجروحه

فـقــارا يلـوعـهـم دهـر والــدهــر ميال
وثــورة غلا تـقـفل بــهـا بــيوت مـفـتـوحـه

يـا كـم واحد تمضي شـهور مامعـه ريال
ولا يـعـرف الجـيـه ولا يـعـرف الـروحـه

يكيـلـون لــه جمعـيـة الـبـر بالمكيال
وفـراشه لا جاه القـيض مـفروش بسطـوحه

ولا فـي أصبعـه خاتـم ولا فـي يـده جوال
ولا كرشـتـه مــن زبــدة الـسـوق مطـروحـه

يحـده صلـف دنيـاه يمـشـي بــدون نعال
ويـحـده عـلـى بـعـض الجـرايـم شـقـا روحــه

لو إنكـم أهــل خـيـر واعـــزوم وقـــدر واجلال
صرفتوه فيمــا يـخــدم الـمـجـد وصـروحــه

مساجد مـدارس سـوق فـي قبضـة البنقال
وشبـاب قطاعـات الفشـل تقتـل طموحـه

ومسـاكـن تشـيـد لا جـل مـحـروم وأم عيال
ومـواقـع تـغـذي واعــي الـفـكـر بـطـروحـه

هـنـا تهـدمـون الفـقـر والجـهـل والاخلال
و هـنـا تكـبـرون بعـيـن من يبـعد الشـوحه

تخـيـل يـابـو عـقـل مغـفـل وشـوفـة حال
لاجـاك الـقـدر والنـفـس ما هي بمكبـوحه

وحطـوك فـي قبـر(ن) ترابـه عليـك يهال
سألـك الملـك عمـا صرفـتـه عـلـى اللـوحه