بسم الله الرحمن الرحيم والصلاة والسلام على رسول الله الكريم
اما بعد مبروك للمقبولين مبدئيا في دورة الأمن العام المنعقدة ان شاء الله بعد رمضان
طبعا هذا مجرد توقع ..

اولاً ي اخوان المقبولين مبدئيا
اذا بتروح المقابله الشخصية جهز امورك بالكاامل ولاينقصك اي ورقه عشان بيرجعونك وتتعب وتتمشور ويروح دورك في السرا وبتتعب
المقابله عباره عن اسئلة عامة ..
مثلا قراءة المعوذات او قراءة سورة الكرسي
وسؤال من ولي العهد بالسعودية
مين ولي ولي العهد
مين قائد القوات المسلحة
النشيد الوطني
طبعا حاول تتمالك نفسك وتكون واثق بنفسك ولحد بيقص رقبتك عشان تتوتر او تخاف
طبعا بعدين بيطلب منك تعبي اوراق يعطونك ملف اصفر تعبي في بياناتك كاملة وكذلك من الادلة الجنائية تبصم وكذلك من الاحوال المدنية و من عمدة الحي الي ساكن في او شيخ القبيلة
وصور شخصية بالزي السعودي
وحاول تسلمها قبل الفترة المحددة عشان يدخل اسمك بالفرز والمسح الأمني
المسح الأمني يأخذ تقريبا من شهر الي شهرين على حسب العدد المقبولين بالدورة ..
وعاد بعد ماتخلص امورك تنتظر القبول النهائي ..
ي اخوان ماتتخيلو الفرحه يوم يجيك قبول نهائي عبارة عن رسالة فيها لخبطة شوي (تم قبولك نهائيا في دوره الأمن العام ونرجوا حضورك لإستلام طلبات الدورة وتفتح البوابة الساعة7 صباحاً ) طبعا انت تعتقد انك بتروح تاخذ طلبات الدورة وترجع البيت ؟ لا غلطان ولاتوقعوا في هذا الغلط .. الرسالة معناها جيب طلبات الدورة والساعة 7 تفتح بوابة مدينة التدريب وتدخل اول يوم لك بالدورة .. طلبات الدورة ملابس نوم لون كحلي تجيب ملاية للسرير وغطاء للمخده لون ابيض وملابس داخلية حاول تكثرررر يعني بتجلس 45 يوم حاول تكثر كذلك وانتم بكرامة شراريب الي تلبس ع الجزمة الرياضية كثرررو منها ومزيل عرق وعطور وكريمات لالتهاب الركب والشد بالعضلات وانصحكم بكريم فولتارين ولاتنسى تجيب موس حلاقة كذلك وادوات النظافة لمصلحتك وكذلك مقص اضافير وحاول تشتري جزمة رياضية اصلية من شركة نايك او اديداس وخذ مقاس اكبر منك بشوية عشان ماتتعب بالوقفة وتساعد على راحتك والاغراض الباقية بتحصلونها بالموقع قبل دخول الدورة بأيام
طبعا اول ماتوصل مدينة التدريب يستقبلونكم طابور الدخول معاك شنطتك ولبسك الرياضي السروال الكحلي والبلوزة البيضاء
وكل واحد يشوف اسمه وسريتة ويجلس بالمكان المخصص له لحين اكتمال العدد .. واحب انوهه القبول على مجموعات اذا العدد كبير يمكن اول يوم 200 بعدها اسبوع 300 بعدها اسبوعين 400 وهكذا .. وانا دخلت الدوره بعد ماعدا عليها شهر كامل لدرجة توقعت اني مانقبلت الى ان وصلتني الرسالة
طبعا بعد مايكتملً العدد ياخذونك على الميز تفطر .. والفطور عبارة عن جبنة وشاهي وعدس ومربى فراولة او فول وعيش وكذلك جبنة وحلاوة .. بعد الفطور يعلمونك مكان سكنك تروح تريح شوي الى ان يضرب او يدق البروقي
بعدها تنزل تتجهز للصلاة ويعلمونك حبة حبة النظام اذا كنت اول دفعة اذا كنت من الدفعات المتأخرة فقط يعلمونك مكان السكن والباقي على الموجودين سابقاً ..
طبعا تصلي الظهر وتروح تشكل موقع سريتك بالميدان يعلمونك موقعها واحفظ موقع سريتك لاتضيعة لأنك لو رفع التكميل او التمام وانت مو موجود هذا قد يضرك في البداية وتتعرض للعقوبة والجزاء العسكري ..
بعلمكم اول شي مفردات الدورة ..تشكيل او تكميل يعني تحضير بالاساامي .. البروقي هو الجرس الي يصحيك من النوم ويعني تشكيل او تنزل للصلاة من غير تشكيل
الميز .. هو مكان العشاء او الغداء او الفطور
المهم نرجع نكمل
بعد ماتصلي طال عمرك تروح تشكل وتكميل وكل تكميل ياخذ تقريبا ساعة او 45 دقيقة حسب المستلم ..
المهم تتغدا طال عمرك وتروح السكن تريح ويدق البروقي قبل صلاة العصر بنص ساعة تنزل تتوضى وتروح المسجد تصلي وبعد الصلاة تشكيل وتكميل وحصة العصر .. يعلمونك حركات عسكرية وكلام كثير ويعلمونك النظام وتهديد وتخويف لكن لاتشيل هم سهالات .. الحصة تقريبا ساعة ونص وقبل المغرب يصرفونك ترتاح في البوفيه او الكفتريا لذلك جيب معك مبلغ 800 ريال كافي او 1000 ريال لايمنع وانصحك تسوي سستة او خراطة في جيب سروالك عشان تحفظ فلوسك من السرقة .. ومن الأيادي العابثة حسبي الله عليهم
طبعا اذا تفكر تجيب جوال حاول تزبنه كويس ويكون ابو كشاف او اذا لك معرفة بالمركز يجيب لك جوال والافضل ماتجيب
عشان لاتنفس بالخمس واربعين يوم وحاول تتعرف على ناس كويسة تنبسط معاهم وتضحك وينسونك هم الدورة
ماخفيكم علم الدورة نفسية ي اخوان لكن اذا معك رجال صدورهم وسيعة بتنبسط وحاول تبعد عن المنفسين عشان ماتنفس
المهم تصلي المغرب بعد الراحة وترجع تشكل وتكميل اما يصرفونك الميز او ترتاح الى صلاة العشاء على حسب البرنامجً
بعد صلاة العشاء يكون الميز جاهز تكميل سريع ماياخذ دقايق وتتوجهه للميز تتعشاء رز ودجاج وايدام وببسي او رز ولحم او مكرونه او نواشف على حسب الجدول الغذائي
بعد ماتخلص من العشاء ترجع تشكل وتكميل ياخذ وقت شبهه طويل وبعدها تروح تنام وترتاح
....
اول صحيان لك يدق البروقي قبل صلاة الفجر بساعة تقريباً
تصحى تتوضى تتوجهه للمسجد تصلي ..
تطلع تشكل بعدين يوجهونك للميدان الكبير
وتبدء رحلة العسكرية من هذا الوقت ..
هرولة خفيفة بالتدريج اول يوم نص لفه ثاني يوم لفه وهكذا
ماتتعدى 3 لفات خلال فترة 9 شهور
وبعدين تمارين سويدي خفيفه الى الساعة7 ونص
بعدين تتوجهه للميز تفطر وترجع الميدان على 8وربع
تعليم حركات عسكرية التحية والدورانات والامور العسكرية الى الساعة 11 تقريبا او 10 ونص ..
بعدين يصرفك ع السكن وعشان ماتنام او ترتاح يقولك تفتيش اداري على السرير ونظافة المهاجع .. (مهجع) يعني غرفتك الي تنام فيها وطبعا الغرفة ينام فيها قريب 18 شخص كل سرير دورين ويعلمونك كيف ترتب السرير .. طبعا التفتيش الاداري كلام فاضي يقولك انزل شكل وقفه داخلية عشان بعضكم مو مرتب السرير زي ماعلمناه ويخليك بالشمس طال عمرك تتشوط صلعتك الى الساعة 11 ونص يعني تاخذ بالكثير 45 دقيقة واقف بالشمس اوً اقل وتسمى هذي وقفة داخلية او تصليب او نوبة ثبوت عشان تتعلم الصملة وكيف تتحدى الصعاب او بمعنى اخر فحص اخلاق عشان يشوفون مين يصمل ومين يسحب
ولو سحبت فيه 100000 غيرك برا ينتظر هذي الفرصة
طبعا مع الايام تتعود ولاتحسب للشمس حساب ولاتاثر فيك وتتعود ع الثبوت والوقفة
طبعا هذا جدولك خلال 45 يوم
وللمعلومية مستحيل تاخذها 45 كاملة
يمكن 30 يوم ويفكونك اجازة خمسة ايام او 10 ايام على حسب
وناس تاخذها 40 يوم تختلف لكن 45 كامله مستحيييل
وانا لحسن حظي ولله الحمد اخذتها 14 يوم فقط في الامن العام بمكة المكرمة بسبب اننا جينا متاخرين وماكان في وقت على رمضان ومهمة رمضان وخرجوناا اجازة 5 ايام
المهم جدولك واضح خلال 45 يوم
والاشياء الي تجيبها علمتك وانوهه كثر ملابس داخلية وملابس رياضية ولاتنسى تجيب قفل عشان تقفل شنطتك وتحميها من عيال الحرام ..
وعلى فكرة حتى بالكلية الامنية وكليات الضباط فيه حرامية فما بالك بالأفراد ..
طبعا بعد ماتخلص 45 تاخذ اجازة حلوه 10 ايام
وبعدها تطلع خميس وجمعة وتحضر السبت على حسب بالظهر او العصر
ويبداء مشوار التزبين جوالات ودخان وهذي الامور ..
طبعا عشاق الدخان في الدورة بتنقطع تماماً اول يومين لكن بعدين بقدرة قادر يطلع دخان وينباع في الميز وتحصل الي حولك يدخنون واسال الله العظيم ان يبعدكم عن الدخان وفرصة للي بيترك الدخان وكذلك الدورة فرصة للي بينزل وزنه
وعلى فكرة في ناس دخلوا الدورة نحاف وخرجو ماشاء الله متان ههههه من النعمة الموجودة ولله الحمد ..
الكفتريا في دورة مكةة يبيع همبرقر وببسي وحمضيات واسكريم جالكسي وشاهي ونسكافية وجميع انواع البساكيت كت كات وتوكسً ومارس وبسكوت شاهي يعني امورك تمام ان شاء الله
وانتبهه لايستفزك مدرب بكلامة او شيء
لكن غالبية مدربين مكه محترمين صراحة ورجال وونعم فيهم
لكن فيه منهم ورعان ولسانه طويل ..
طبعا اكثر كلمة بتسمعها ي طالب وياوحش ..
واستكمل لكم الباقي بعد ماتتخرجو من ال45 ان شاء الله