السلام عليكم ورحمته الله وبركاته


اخواني حبيت استشيركم في مشرووع ان شاء الله راح ادخل فيه بس ابي ارآكم



بس ابي اعرف كيف شغل القلابات

كيف الشغل هاذي السنه

وايش احسن راس تريله يصلح قلاب ومتوفره قطعها

المبلغ الموجود بس 90 الف

90 الف ماتكفي للقلاب

ولاتكفي لصيانته ولا متابعته

وصعبه انتي تتابعينه

المشروع مايصلح لك نهائي نصيحه

طبعاً تختلف الرؤس على حسب نوعية السياره


الافضل مورسيدس ومورسيدس عدة انواع

البي هو الأفضل للقلابات ولكن غالي


بعده يجي الاكتروس وفيه عدة انواع وافضلها الهاف ميقا


بعده يجي الاوكسر وهو ارداء نوع من المورسيدس وسعره رخيص ولكن لاينفع ابداً



بعدها تجي الماركات الثانيه الفولو والمان وغيرها


نصيحه القلابات قروشه وتعب واعطالها كثيرررررررررررره كل شوي متعطله في مكان وتشترين سياره نظيفه بعد فتره الا حديد متكسر مايسوى عشان كذا الناس يشغلونها اي شي غير القلاب حتى لو الدخل أقل


انا عندي عدة سيارات طبعاً مأجرها بنظام التأجير المنتهي بالتمليك ولو مافيها تعب ونكد كان شغلتها لحسابي لكن مفتك منها واهم شي قسطي يجيني والله يرزقهم



هالمشاريع تحتاج جهد مضاعف وتحتاج متابعه واذا كانت اقل من ثلاثه مافيها فائده بحيث لو تعطل واحد اثنين يغطون لكن رأس واحد مالها فائده الا التعب والهم


وبالتوفيق

عليكم السلام

القلاب متوسط الحجم ممتاز كبداية مشروع بس في هالمشروع
او اي مشروع في الحياة لازم الصبر ثم الصبر

عندي قصة مختصرة حق احد الأقارب :

تخرج من الثانوي كأي طالب يبحث عن مصدر رزقه
لكن حب يشتغل مع ابوه في محل المقاولات وهو
كــ شاب يملك الطاقة و الأفكار حب يطور من مؤسسة ابوه
لكن للأسف كل ما اقترح عليه شي ما يتقبل ابوه اي شي من ولده
و الولد ما استسلم اكتسب بعض الخبرات من العمال و عرف كل شغلة
وكم تطلع و بعد فترة شراء قلاب صغير و طلع من محل المقاولات حق ابوه
المهم ... نشر الأعلان و وقفها على طريق عام و قامت تجيه الأتصالات
و يرتب معهم و يجيب ( سمنت , طابوق . تراب ) و لله الحمد الله فتح له
ابواب رزقه كل اربع ايام تقريبا يطلع 1200 ريال اقل اكثر احيانا
يعني في الشهر تقريبا يطلع 9000 ريال . أنتهى


هاذي قصة مختصرة للفائدة و لكي تعطي حماس لشباب الطموح
و عذرا ع الأطالة و الله يسهلك و للمسلمين .

مشروع ممتاز

90 الف تجيب لك راس فولفو موديل 2006 fh لا تتعبين في البحث عن غيرة لاني اعطيك الزبدة في هالوقت
والصندوق استاجريه بدون كفرات ب 2000 ريال حتى تشوفين الشغل كيف وبعدين تشترين مع ان الصناديق رخيصة جدا هاليومين ممكن تلقين ب 28 الف نظيف
والشغل متوفر
لكن الاهم انك تبحثين عن السواق الجيد وهذا اصعب مافي الموضوع

بنفتح شركه نقليات ان شاءالله باسم ابوي وعمي

اذا حابه نشتري سياره انا وانتي ونستفيد من ترخيص الشركه ونشغلها باسم شركتنا

نتقاسم الارباح انا وانتي بالنص

الكلام هذا لاي شخص

90 الف ماتسوي لك شئ

وتحتاجين سواق وترخيص ووو الخ

راس مال ابدا غير كافي

بغض النظر عن رأس المال وعن نوع الشاحنة سواءاً رأس الشاحنة أو المقطورة..

مجال المعدات حالياً وأخص بذكري (((التريلات))) سوءاً قلابات أو سطحات..

السوق له فترة طويلة في ركوود غير معقول نهائياً, والعمل حتى وإن توفر المردود جداً بسيط ولا حتى يستاهل راتب السائق وأجور الصيانة

والكفرات والفلاتر والزيوت والخ من وجع الرأس..!

والآن حتى أصحاب معارض الشاحنات بدأو في تقبيل المعارض..

والعرض يفوق الطلب بمليون مره..

نصيحة لوجه الله لكل واحد يفكر في المعدات في الفترة الحالية يبتعد نهائياً عن هذا المجال ولا حتى يحاول مجرد التفكير فيه..

لأنه خسارة 100%..

ومحدثكم من المنسحبين من السوق..

والله يعوضنا خير..