شلووونكم

عساكم بخير انشاء الله

هذا اول موضوع اطرحة بهالمنتدى القوي والفريد من نوعه لأنه بإعتقادي منتدى متخصص

ومن اول يوم اكتشفت فيه هالمنتدى حسيت انه منتدى

جميله هي الافكار اللي قاعدين تطرحوونها بهالقسم والأجمل التفاعل مع هالأفكار والمشاريع

شبابنا وبناتنا طموووحين وعندهم عقلية تجارية جيده بس تحتاج لبعض من التشجيع والتحفيز

ومن هالمنطلق <<< ياروحي يالفلفسه

أرتأيت من وجهة نظري الشخصانية إني من المفترض بي المساهمه في طرح الافكار لكم والتشجيع والتحفيز لكل شخص او شخصه ودهم يفتحون مشروووع


المشروووع هو التجارة في الرخام والسراميك والأدوات الصحيه

أهاااااااااااااا ولكن وحطو خطين تحت ولكن

مشروعي غير تقليدي...يعني ماراح يكون هناك معرض للرخام ولا مستودعات ولاعمال ولا ونش ولا دينات ولاهم يحزنوووون

مرت علي فتره اهتميت بهالمشروع وحاولت انفذه لقيت انه بيكلفني الشي الكثير تقريبا 300 الف ريال او اكثر.. يعني اقل ايجار لأي معرض على طريق الخرج مايقل عن مايقارب 100 الف ريال
فكرت وفكرت وخرجت بفكره اخرى

الفكره هي فتح مكتب في منطقه راقية نوعا ما...(محل فتحه وحده)50 متر مربع مثلا

نسوي تعتيق حلو وإضائه ايضا حلوه ونشتري مكتب كشخه على شوي تحف وابجورات وكنب وكراسي مريحه .ونركب مكيف سبلت.ونشتري شاشه بلازما ونعلقها.

طبعا الشاشه تكون موصوله بالكمبيوتر وتكون كشاشة عرض

طريقة عمل المكتب كالتالي

يحضر العميل للمكتب ويطلب سراميك لبيته او شقته او الفيلا
يطلب رخام مثلا او يطلب مواد صحية ...مغاسل مرايات..احواض استحمام..برج عربي ..برج افرنجي غيره وغيره

لكل نوع نسويله ملف بالكمبيوتر بالصور

يعني السراميك مثلا يكون عندنا صور لخمسين بلاطه سراميك مصوره تصوير احترافي يعني خلفيه بيضا والبلاطه معروضه كذا وجنب البلاطه تحفة صغيره والسعر كمان معروض والصناعه <<ينعن ام الحركات

وتكون الصوره واضحه وصافيه وتبهر العميل..شغل فوتوشب مو اي كلام..طبعا واحنا قاعدين نعرض علية الصور نقدم له بيالة شاهي نظيفه او كوب كابتشينو..عشان نكسب اعجاب العميل

اذا اعجب العميل بأي نوع نتفق معاه على الكميه ونوع الترويبه اللي بيها وهذي كمان فيها مكسب
واذا كان يبي غرى كمان فيه مكسب

طبعا بتقولون وين البضاعه؟؟

طبعا انا مافتحت المحل إلا وانا متفق مع كذا شركة او مؤسسة لبيع السراميك والرخام والمواد الصحية انهم يوردون لي بسعر الجمله وفيه شي اسمه سعر خاص للمعرض وهذا بروتوكول معروف عند شركات الرخام والسراميك

بعد مايختار العميل النوعية اللي بيها اقووله اصبر بدق على المستودع اشوف متوفره الكمية اللي تبيها ولا لأ

طبعا انا ماعندي مستودع ولاهم يحزنون انا ادق على مستودع الشركه اللي جايب منها العينه
اذا متوفره اتفق مع العميل يسلمني الكاش استنادا إلى فاتوره بيني وبينه واقوله بكره التحميل اقووم انا اروح اشتري البضاعه من الشركه بسعر الجمله ولنقل مثلا 30 ريال للمتر بالنسبه للسراميك . واكون قد اتفقت مع العميل على سعر 45 ريال للمتر

اكون بهالحاله كوسيط بين العميل والشركات

بتسألوني نفس السؤال اللي سألناه لأخونا مبرمج طموح

طيب ليه مايروح العميل بنفسه للمعرض ويشتري من هناك

العميل سواء شرى من عندنا او شرى من الشركه نفسها راح يشتري بنفس السعر الشركه لايمكن انهم يبيعونه بسعر التكلفه او الجمله لأنهم لو باعو بهالطريقه يقطعون على انفسهم باب رزق كبير لهم اللي هو المعارض الصغيره اللي تاخذ منهم بضاعه بالجمله وتبيع للعملاْ يعني وكأن مكتبي والمعارض الصغيره مناديب ومسوقين لبضاعة هالشركات فهمتوا؟

وياكثرهم اللي مايحبون يروحون المعارض .عاد احنا نجيبه المكتب ونقهويه ونخليه يختار على مزاجه .. وممكن العميل يحضر هو وزوجته وتنقون على رواقه بدون ازعاج ... او ان تصيبهم الحيره من كثره الانواع والاسعار اللي نشوفها بالمعارض...والله ياخي تخش تلقالك الفين بلاطه وكل بلاطه لها سعر شكل من جد يلف راسك لين تدوخ يالله تختار

طبعا بين كل فتره وفتره تروح للمعرض والكاميرا معك وتصور جديدهم


مشروع جيد ولا؟

اللي عجبه المشروع امانه عليه يدعيلي ولوالدي وولدي الصغير